Read MUKANDA WANZAMBI Mika 1 Bible Online

Mika 1 - MUKANDA WANZAMBI bible

Mika 1

¹Izu daYehova denjili kudi Mika wakuMoresheti hadiŋuwu anyanta awaYuda aYotami naAhazi naHezekiya, izu damweniyi hansaŋu yaSamariya naYerusalema.

²Enu nyuza yawantu, tiyenu wejima wenu. Eyi iseki, ninenu yuma yejima yekalamu, tiyililenu. Mwanta Yehova ekali chinsahu chakuyitota, Mwanta omu mutembeli yindi yajila ayitoti.

³Muloŋa tiyenu, Yehova hakwidika mwindi mwekalayi, hakukunkumuka nakudatola hayinaŋanaŋa yaheseki.

⁴Mapidi akusuŋunuka mwishina dindi, niyinekineki yikubaluka neyi nsela yidi kukesi, hela neyi meji adi nakupwapumuka mwasweja kukunkumuka.

⁵Cheji michi chinafumi hamuloŋa waYakoba, nihanshidi jawakwamutaŋa waIsarela. Muloŋa waYakoba himuloŋanyi? Hidiyi Samariyaku? Yinaŋanaŋa yawaYuda hiyumanyi? Hidiyi Yerusalemaku?

⁶Dichi Samariya nakawubalumuna ekali neyi mulumba mumpata, kwakutumbatumbaŋa itempa danyivinyu. Malolawu nakayimwaŋila muchinekineki, malola ashimatila matala nakayimwekesha hatooka.

⁷Nakafumpola akishi indi akusoŋa ejima puchi puchi, nyondelu yindi yejima akayocha mukesi, niakishi indi akutuŋa ejima nakayikamika heseki damukunkulu. Muloŋa yena wayipompeshela dehi kunyondelu yawuvumbi, dichi yakaya nawa cheŋi mwomunyondelu yawuvumbi.

⁸Hachumichi nakadila ikumbu, nakakaloka, nakadivuulavuula, nakenda nzekesi. Nakadila ikumbu didi neyi chadilaŋa anyumbu, nakashikela neyi anyamalanda.

⁹Muloŋa chilonda chindi hichokewaŋaku; chashika dehi nikuYuda; hichikushika nikuchisu champwembu yawantu ami, kwoku kuYerusalema.

¹⁰Bayi muchishimuna muGatuku, bayi mudila nihantuku. Dikumbenu mulunkuŋu kuBeteleyafwera.

¹¹Enu mwashakama kuShafwiri hitenu nzekesi nansonyi. Ashakama muZaanani hiyanedikuku. Kudila kwaBetezeli kwakayitambula hawimenu.

¹²Mwashakama muMaroti mwachiŋililaŋa yayiwahi chakwakama ho-o. Muloŋa yatama yinafumi kudi Yehova, yinakunkumuki kuchisu champwembu yaYerusalema.

¹³Enu akwakushakama kuLakishi, kasenu makálu kutuwalu twasweja lufuchi. Diyi wamubuzilili mwana kaZiyona wamumbanda njila yanshidi, muloŋa mudeyi dimu mwawenuwu nyiloŋa yaIsarela.

¹⁴Dichi wakamwinka Moresheti Gati chamukunkulu chakudishalika nachu. Kudi anyanta awaIsarela matala amuAkisibi akekala chuma chakudimbana nachu.

¹⁵Enu mwashakama muMaresha, kena niyileteli wakayiheta. Kulema kwaIsarela kwakashika nikuAdulami.

¹⁶Tetatetenu nsuki, mutewuli kawewa hansaŋu yawanyanenu mwatiyilaŋa kuwaha nankashi; toheshenu tuwewa twenu neyi makubi; muloŋa nyanenu anayifumi, anayi dehi muwukoli.