Read MUKANDA WANZAMBI Mika 2 Bible Online

Mika 2 - MUKANDA WANZAMBI bible

Mika 2

¹Yayo, akukasakasa yakuluwa, akukeŋa yatama hatudidi twawu! Chikukucha to-o hiyakuvikoŋa nikuyikoŋa, Muloŋa Ŋovu yakuyikoŋa yidi kumakasawu.

²Afwilaŋa maha, hiyakuyitambula naŋovu; nimatala nawa, hiyakuyihukula. Akabishaŋa muntu nimutaŋa windi kumu, yowu muntu nawuswana windi.

³Dichi Yehova nahoshi nindi, Tiyenu, chisakichi nukuchikasila chuma chatama chimwakakaŋanya kufumisha nshiŋu jenu, himwakenda nakudivunaku; muloŋa wakekala mwaka watama.

⁴Hefuku odu akayitila chishimu, akayimbila mukeŋa wakudila, nawu, Tunanoŋi dehi chikupu; wabalumuna dehi iseka dawantu ami. O chaditutululaŋayi dehi nakudifumisha kudami! Maha etu wayibalwila dehi akwakudikaŋa.

⁵Dichi wakabula muntu wakanata mwonji wachinjikijilu chakusakula nachu muchipompelu chaYehova.

⁶Adi nakuprofweta nawu, Enu bayi muprofwetaŋaku. Nawu, Yuma yidi chochochu hiyayitenaŋa kukuprofwetaku; neyi ochu, kusawuka hikwakatufumaku.

⁷Enu akwamutaŋa waYakoba, antu hiyadi kuhosha mwenomuku; Spiritu yaYehova anayikeheshi, tahindi? Yumiyi diyi yelaŋayi yena? Mazu ami hiyawahishaŋa muntu wendaŋa cholokaku?

⁸Hakwinza mafuku awa antu ami ananyamuki neyi chilumbu. Antu adi nakudihitila chakadi kwakama, abula kukeŋa njita, mudi nakuyilotokela nakuyivùula yikutu yawu yavwalaŋawu hewulu dyuma yawu yakuvwala.

⁹Ambanda akumuza wami munayihaŋi mumatalawu amawahi; anyanawu anyanya munayifumishi kuwaha kwami chahaya nyaka.

¹⁰Nyamukenu muyi; muloŋa kunu hikuwunookelu wenuku; muloŋa wamajilu adi nakukisaŋana, kukisika kwakala nankashi.

¹¹Neyi muntuwudi nakwenda mumpepela, mwamakasu, hakutwamba nindi, Ami nukuyiprofwetelaŋa yavinyu nawalwa; diyi wukwi kala kaprofwetu kawantu awa.

¹²Enu akwaYakoba, chalala nakayipompesha wejima wenu; chalala nakakumaŋeja aIsarela anashaluku; nakayisha hamu neyi nyikoku yakuBozira; neyi mukanka wanyikoku wudi mukachi kawudiilu wawu, akasweja muyoyu muloŋa wawantu kuvula.

¹³Mukwakulokola ipana nayi dehi kumbidi yawu. Alokola dehi ipana, anahiti dehi nikuchisu champwembu, diku kwanedikiluwu. Mwanta wawu nayi dehi kumbidi yawu, niYehova natwaminuku kumbidi.