Read MUKANDA WANZAMBI Mika 4 Bible Online

Mika 4 - MUKANDA WANZAMBI bible

Mika 4

¹Ilaŋa hamafuku akukuminina antu amba kamona mpidi yetala daYehova yinashimati dehi hewulu damapidi, yakasompoka mpidi janyanya; kwakahwila nyuza yawantu.

²Nyuza yayivulu yakaya nakuhosha nawu, Tuyenu, twakakanduki kumpidi yaYehova, nikwitala daNzambi yaYakoba; akatu leji mwaya yaaku yindi kulonda twakendaŋa munjila jindi. MuZiyona mwakafuma nshimbi, kuYerusalema kwakafuma izu daYehova.

³Wakekala hakachi kanyuza yayivulu nakuyisompesha, wakahoshola nyuza yaŋovu yidi kwakulehi; mpoku jawu jatubali akajichila matemwa, mayoŋawu akayichila nyipanŋa. Muza hiwakanyamwina muza wukwawu mpoku yakabaluku, hiyakadiza nawa cheŋi njitaku.

⁴Ilaŋa kashakama iwu mwishina damuvinyu windi, iwu mwishina dachikuyu chindi kwosi wakayitiyisha womaku. Muloŋa kanwa kaYehova wamazaza kanahoshumu dehi.

⁵Muloŋa nyuza yawantu yejima yakenda, iwu mwijina damukishi wawu, iwu mwijina damukishi wawu, hakwila etu twakendaŋa mwijina daYehova Nzambi yetu chahaya nyaka nanyaka.

⁶Yehova nindi, Hefuku odu nakapompesha abalakataŋa, nakakumaŋeja cheŋi ahaŋawu dehi, ninawa inamweshi dehi ihuŋu;

⁷abalakatilaŋa nakayibalumuna kwikala akushalahu, akinjikewa kwakulehi nakayibalumuna ekali muza waŋovu; Yehova wakekala Mwanta wawu kumpidi yaZiyona, kufumisha henohu nichahaya nyaka.

⁸Eyi kaposhi kamukanka wanyikoku, eyi mpidi yamwana kaZiyona wamumbanda, wakenza kudeyi, wanta wakusambila wakenza, wanta wamwana kaYerusalema wamumbanda.

⁹Mudi nakukalokeladi nyiteti? Mukachi kenu himudi mwantaku? Mukwakuyileja maana nanoŋi dehi, mwaka mutiyaloŋa nyisoŋu yidi neyi yamumbanda wudi nakufunyisha?

¹⁰Eyi mwana kaZiyona wamumbanda, tiyaku nyisoŋu, kabakanaku wuvwali neyi mumbanda wudi nakufunyisha. Katataka wakafuma mumukala, wakashakama mumpata, wakashika nikuBabilonia diku kwakakupulwishilawu; diku kwakakukuulayi Yehova kudi ayilumbu jeyi.

¹¹Katataka nyuza yayivulu yinakupompeli chandombu; adi nakwila nawu, Muleki amujiloli kwindi, disu detu ditali chuma chidakeŋa kumona Ziyona.

¹²Ilaŋa wena hiyeluka yitoŋojoka yaYehovaku, hela mpùŋa yindi hiyanayishinshikuku. Muloŋa yena nayipompeshi neyi chapompeshaŋawu nyikuta yatidiku kuwuhulilu.

¹³Eyi mwana kaZiyona wamumbanda, nyamukaku, wubuli. Muloŋa ami nakakwinka nseŋu jayikuŋu, nakakwinka yikwa yawuneŋu. Wakachikachika nyuza yayivulu; nŋalanyi yawu wakamujilikilayi Yehova, nimahetawu wakamujilikilawu Mwanta weseki dejima.