Read MUKANDA WANZAMBI Mika 5 Bible Online

Mika 5 - MUKANDA WANZAMBI bible

Mika 5

¹Eyi mwana wamumbanda wanyikanka, dipompeshi nyikanka nyikanka. Yena natukuchiki dehi. Mukwakusompesha Isarela akamweta mutondu kwikidi.

²Hakwila eyi Betelemi Efwarata, eyi wasweja kukehela mukachi kamakombakaji awaYuda, mudeyi mwakafuma wumu wakenza kudami, diyi wakekala mukwakuyula muIsarela; kwidejeka kwindi kwakufumisha kushankulu, kunyaka yahaya nyaka.

³Dichi wakayileka tuhu kwindi, kushika nikumwaka wakela owu wudi nakufunyisha navwali dehi. Henohu ana kwindi anashali akafunta kudi anyana kaIsarela.

⁴Wakemana naku diisha mukanka windi wanyikoku naŋovu yaYehova, nawukeleŋi wejina daYehova Nzambi yindŋ niwena akashakama chachiwahi; muloŋa henohu nekali dehi muneni kushika nikunsa jeseki.

⁵Yeniwu diyi wakekala kuwunda kwetu, hakenzawu aAshuri mwituŋa detu, hakadatawu mumataletu awanta, twakayinyamwina atubiŋa atanu nayedi, niatulamba atanu nasatu.

⁶Wena akakisaŋana ituŋa dawaAshuri nampoku yakabali, akakisaŋana niituŋa daNimirodi kumawiŋililu adu. Wakatupulwisha kudi aAshuri hakeŋilawu mwituŋa detu, hakadatawu muŋinza yetu.

⁷AkwaYakoba akashala akekala mukachi kanyuza yayivulu neyi wuumi wakudi Yehova, neyi nvula jawo-wo-wo jikunoka hamatahu, jikubula kulabila antu, jikubula kuchiŋilila anyana kawantu.

⁸AkwaYakoba akashala akekala mukachi kawajentili, mukachi kanyuza yawantu yayivulu, neyi mutupa wudi mukachi kawanyama amwisaŋa, neyi mwenzi wamutupa wudi mukachi kanyikanka yanyikoku; yena neyi ahitamu wukudatola, wukutabola chakadi niniwu wukupulwisha.

⁹Chikasa cheyi chiyinyamukili akwankunyi neyi, ayilumbu jeyi ejima ayifumishuhu.

¹⁰Yehova nindi, Hefuku odu nakafumisha tuwalu twenu mukachi kenu, nakakisaŋana makálu enu.

¹¹Nakafumisha nyikala yamwituŋa denu, nakasandola yipaka yenu yimwadikaŋila yejima.

¹²Nakafumisha yakupandapanda mumakasenu; himwakekala nawa cheŋi nawakwakuhoŋa natutumbwaku.

¹³Nakafumisha akishi enu akusoŋa, nituposhi twenu twakupeshela twekala mukachi kenu; himwakadifukula nawa cheŋi kunyidimu yamakasenuku.

¹⁴Nakabwita nyiyombu yenu yidi mukachi kenu. Nakajilumuna nyikala yenu.

¹⁵Hanyuza yabulili kutiyilila nakakoŋahu yakutenda chakuzuwa nakulendumuka.