Read MUKANDA WANZAMBI Mika 6 Bible Online

Mika 6 - MUKANDA WANZAMBI bible

Mika 6

¹Tiyenu dinu chanahoshiyi Yehova, nindi, Nyamukaku, wahosheli muloŋa weyi kumesu amapidi amaneni, nimpidi janyanya jitiyi izu deyi.

²Enu mapidi amaneni, ninenu yikuku yeseki yakola nawa, tiyenu muloŋa waYehova; muloŋa Yehova wudi namuloŋa nawantu indi, nakeŋi kuwuhosha nawaIsarela.

³Nindi, Enu antu ami, ami nayili ŋahi? Nayizeyeshi nachumanyi? Shimunenu wunsahu wenu wakumbayisha.

⁴Ami nayifumishili mwituŋa daEjipitu, nayikùulili mwitala dawuduŋu, nayitwamŋililuku aMosi, naAroni, naMiriyami.

⁵Enu antu ami, anukenu mwehwililiyi mwanta wakuMowabi Balaki, nimwa-mwakwililiyi mwana kaBeyori Balami; anukenu kuShitimi ndo nikuGiligali, kulonda mwiluki yuma yaloŋa yeliliyi Yehova.

⁶Chinukwinza kumesu aYehova, chinukubandama kumesu aNzambi wahewulu, nukwinza nanka? Ninzi kumesu indi nanyilambu yakushita, nanyana kaŋombi yashika mumwaka wumu, tahindi?

⁷Yehova atiyi kuwaha namakombakaji ayizamba yanyikoku? Hela namakumi amakombakaji atuloŋa twamanji, tahindi? Nihani wedi wami kumuloŋa wami, tahindi? Nihani wakufuma mwivumu dami nifuti nachu nshidi yamumuchima wami, tahindi?

⁸Eyi muntu, yena nakuleji dehi chuma chinawahi. Indi Yehova nakeŋi chumanyi kudeyi? Nakeŋi wili chaloŋa, wukeŋi luwi, wendi naNzambi yeyi chakudizoza.

⁹Izu daYehova hidikubidika mukala, kutiya ijina deyi woma chi kweti maana. Tiyenu mbwechi ninowu wayikunjikili kumudimu.

¹⁰Mumatala awantu atama komana muchidi yuma yalema yafuma hakwila chatama, nichesekelu chakuminamu chi kweti niwunyeŋu, tahindi?

¹¹Ami nukuyiŋisha ŋahi antu akweti jipezu jatama, akweti njeki jikweti yikuŋu yakutwamba yakupezelesha nachu?

¹²Akwakuheta aduku enzala namadombu; ashakamaku anatwambatwambi, madimi anamutunwa twawu adimbanaŋa.

¹³Dichi ami nawa nakutapi, wunamoni chitu chakata nankashi; nakubalumuni wikali kwachihembi hohu nanshidi jeyi.

¹⁴Kudya wakadya kwikuta nehi; mukachi keyi mwakekala kwakusawuka hohu. Waka tuntuka nakuya kwacheŋi, Ilaŋa hiwakasenda yuma yeyi chachiwahuku, niyiwakasenda nakayihana kumpoku yakabali.

¹⁵Kudima wakadima kwaŋula neliŋa wakasohola nyikabu ya olive ilaŋa kuwaya manji nehi wakasoholaŋa nyikabu yavinyu ilaŋa kunwa vinyu yeyi nehi.

¹⁶Muloŋa mwahembaŋa yidika yaOmiri, ninyidimu yawakwamutaŋa waAhabi yejima; mwendaŋa mwaya mpùŋa jawu, kulonda nikubalumuni wikali wakuhayama hohu, niàshakamaku ekali akuyiŋila hohu; mwakasawuka nakusawuka kunasawuki antu ami.