Read MUKANDA WANZAMBI Nahumi 1 Bible Online

Nahumi 1 - MUKANDA WANZAMBI bible

Nahumi 1

¹Wuprofwetu wakutena Nineve. Mukanda wachimwenu chaNahumi wakuElekoshi.

²Yehova hiNzambi wukweti mukawu, watendaŋa; Yehova watendaŋa, walendumukaŋa; Yehova waditendaŋa hadi akwankunyi nindi, walaminaŋa ayilumbu jindi kuzuwa.

³Yehova hazuwaŋa swayuku, wasweja Ŋovu, hakayiŋisha akwanyiloŋa nihantuku. Yehova muwendelu windi muchinjimbi, nimunvula yeneni yasweja mpepela, mavu diwu lunkuŋu lwakumadachilu indi.

⁴Wahosholaŋa kaluŋalwiji, hakuuma nichau, womishaŋa tuloŋa twejima. Bashani hakuzeela. Karameli niwuluya wakuLebanoni hiwukuzeela nawa.

⁵Mapidi amaneni hiyakukanka kumesu indi, mpidi janyanya hijikusuŋunuka; iseki hidikunoŋa kumesu indi, mwalala nimpata yamunu mwishina niantu ejima ashakamamu.

⁶Neyi yena nahili dehi wukutwesha kwimanaku hinyi? Neyi kuzuwa kwindi kwasweja dehi kutata wukutwesha kushakamaku hinyi? Kulendumuka kwindi anakwichili neyi kesi, malola anayibaluli kudi yena ntwe ntwe.

⁷Yehova himuwahi, himpwembu yakudikaŋila muntu mwifuku dayihuŋu, yena weluka antu abatamaŋa mudi yena.

⁸Ilaŋa yena wakakumisha chikupu chipela chakwenoku nadibaji dasumpokaŋa, wakahaŋila ayilumbu jindi mumwidima.

⁹Mudi nakumufuukwila Yehova yumanyi? Wakakumisha chikupu; kukaba hikwakanyamuka cheŋi kamuchiyeduku.

¹⁰Hela wena adi neyi nyiŋa yaditaŋila dehi, hela adi neyi antu anakumini dakuzowa nayakunwa yawu, akayinoŋesha zo chikupu neyi chanoŋeshaŋawu ntotu kudi kesi.

¹¹Mudeyi munafumi muntu wumu wamufuukwilaŋa Yehova yatama, walejaŋa akwawu mpùŋa yatama.

¹²Yehova nindi, Hela Ŋovu jawu jawanina chikupu, nikuvula anavuli, akayitemamu tuhu kwawu, hiyakekala nawa kwokuku. Hela nakukabishi, hinakakukabisha nawa cheŋuku.

¹³Ichi dinu nukukukotwela mpanda yindi yidi hanshiŋu yeyi, nukukuketula nyonji yakukasawu ngwa ngwa.

¹⁴Yehova nashimuni dehi nsaŋu yeyi, nindi, Kwosi muntu mukwejina deyi akatu mbawuku. Nukufumisha mwitala dawakishi eyi akishi akusoŋa, niakishi akusupununa. Nukukupundila ŋamu muloŋa wudi watama nankashi.

¹⁵Tiyenu, hamapidi hadi lushindu lwanyendu yanowu wudi nakuleta nsaŋu yayiwahi, wudi nakubidika jakumona kuwunda! Eyi Yuda dyaloŋa yawija yeyi, ilaku yiwadishiililumu. Muloŋa mweyeyi himwakahita chiŋa muntu watamaku; amufumishahu dehi chikupu.