Read MUKANDA WANZAMBI Nahumi 2 Bible Online

Nahumi 2 - MUKANDA WANZAMBI bible

Nahumi 2

¹Wabalolaŋa puchi puchi nanyamuki dehi, hakwinza kumesu eyi. Hembaku chachiwahi itala dayitwa yanjita, talatalaku kunjila, koleshaku kumaya, koleshaku nankashi Ŋovu jeyi.

²Muloŋa Yehova hakuleta cheŋi wukelepi waYakoba, neyi wukeleŋi waIsarela. Muloŋanayisukuli dehi kudi akwakusukula, anatamishi dehi nyitayi yanyivinyu yawu.

³Nkebu jawayilobu jindi ajichinanisha dehi nge; amayala omika anavwali dehi yichinana. Ifuku dakaloŋejayi, makálu indi enda abebema kwayikuŋu hohu be-be-be, enda anyinkesha nimayoŋa chi kweti niwoma.

⁴Makalu adi nakuzuwa nankashi munyikwakwa, hiyakudishinjeka shinjeka mumalubanza. Kuyitala adi neyi yimunyi, hiyakwenda lufuchi neyi chakenaŋa nvula.

⁵Hakwanuka ayilobu jindi; hiyakwenda nakuhukana. Hiyakunyakala nawu ashiki kumpwembu yamukala, chuma chakuyijika hewulu achiloŋesha dehi.

⁶Yenzelu yatuloŋa ayenzulula dehi, itala damwanta hidikunowa.

⁷HaHuzabi ajikulahu dehi, amutwala dehi, ambuŋindi awambanda hiyakudila namazu adi neyi awatumbolu, iku adi nakudetola hantulu jawu.

⁸Nineve kufumisha kunyaka wekala neyi ŋiya dameji. Hela chochu, hiyakutemukamu. Akwawu akuyila nawu, Imanenu! Imanenu! Kwosi wukutala nihanyimaku.

⁹Pupenu siliva yawu, pupenu wuru wawu! Ochu yuma yawu yaswekawu, nimahetawu yuma yayiwahi amanaŋa wanyi.

¹⁰Washala dehi wamukunkulwayi, mwosi nawa chumaku, kwachihembi hohu. Muchima wawu hiwukunowa mwivumu, manuŋu awu hiyakudeta bwaki bwaki, antu ejima atiya dehi nyima hakachi niŋwa, kumesu awu wejima wawu hikukufumunuka.

¹¹Kuchididi chawanyitupa nikuwudiilu wanyenzi yanyitupa, nikwendelapa mutupa naŋodindi nimwanawu, kwabulilaŋawu wakuyitiyisha woma kudi kudihi?

¹²Mutuŋa wadiŋi nakutabola yakwikutisha anyanindi, wadiŋi nakushotomwena aŋodi jindi anyama kunshiŋu jawu, wadiŋi nakwinzesha mayeŋu indi nawanyama anakwatiyi, kumatalindi kwalumbaminana mbiji jindi.

¹³Yehova wamazaza nindi, Tiyaku, ami nidi neyi nandombu, nakakwochela makálu eyi kwawishi hohu fwi-fwi-fwi, nyenzi yeyi yanyitupa akayivwota kudi mpoku yakabali. Anyama iwakwatilaŋa nakayifumisha hanu heseki, izu dawatuŋanda tweyi hiyakaditiya nawa cheŋuku.