Read MUKANDA WANZAMBI Nahumi 3 Bible Online

Nahumi 3 - MUKANDA WANZAMBI bible

Nahumi 3

¹Yayo, mukala wamashi! Wenzala namazu akutwamba nikubuwabuwa; yuma yakupupawu hiyamanaŋaku.

²Yikoti vupu vupu, tufumbu twamakálu kalakata kalakata, tuwalu tukutumboka, makálu akumotoka motoka,

³akwatuwalu akulotoka lotoka, mpoku jatubali keji keji, mayoba be-be-be, nyilaŋalaŋa yawafu, nyilumba yayivuvuma, yibimbi yawu hiyakumaŋaaku hiyakudimbukila hayibimbi.

⁴Chinafumi hamawuvumbi achivumbi walubanji, yena mumbanda himwanta wyuma yakupandapanda, walandishaŋa nyuza yawantu kumawuvumbi indi, walandishaŋa yisaka yawantu kuyuma yindi yakupandapanda.

⁵Yehova wamazaza nindi, Tiya, nidi neyi nandombu, nakakuvúula jisanya jeyi hadi antu, nakaleja nyuza yawantu iheŋu deyi, nakaleja nimatuŋa awantu wusonyi weyi.

⁶Nakakwasola wuzondu watama nankashi, nakakutamisha nankashi, nakakusha hatooka kulonda antu akakutali akakuhayami.

⁷Antu ejima akakutala akakuchina, akela nawu, Nineve washeshekadehi; akumudila kudinyi? Akwakumukundeja nukuyiwana kudihi?

⁸Komana eyi wunabadiki Nowamoni wadiŋi mukachi katuloŋa, wadiŋi nameji niniku niniku kwi-ndo, mpwembu yindi yowu kaluŋalwiji, mbaŋu yindi yamunyeŋumuka wowu meji akaluŋalwiji nawa?

⁹Ŋovu jindi jafumini kudi aEtiyopiya nawaEjipitu, Ŋovu jindi jakakumaŋa; aPuti nawaLibiya diwu adiŋi ankwashi jindi.

¹⁰Hela chochu, amutweli kwawu, wayili muwukoli. Anyanindi anyanya ayichikachikili kunsa janyikwakwa yejima. Antu indi alema ayisakwili nayinjikijilu yakusakula nachu; antu indi asweja kutiyakana ayikasili mumaleŋi.

¹¹Wakasheta walwa, wakabatama; wakakeŋakeŋa kwakudikaŋila kwakola nansaŋu yachilumbu.

¹²Nyikala yeyi yejima yakuhata muyipaka yakekala neyi yikuyu yahaŋahu dehi, kulukumunaku hiyikuholokela namutunwa twawakwakudya.

¹³Tiya, amayala adi mweyeyi hiyambanda tuhu kwawu, yisu yakumpwembu jamwituŋa deyi yachashi tuhu, kulonda ayilumbu jeyi epili. Nyikomenu yeyi yanoŋa dehi nakesi.

¹⁴Tahaku meji, keŋa akukuchiki; koleshaku nyikala yeyi yakuhata yipaka. Iŋila muwina, wuchaaki maseki, wunoni chikombola chakutuŋa nachu matafwali.

¹⁵Kesi kakakunoŋesha kwenoku; mpoku yakabali yakakufumishahu, yakakuvwota neyi atubola achidi kumotoka. Kadivulishi neyi atubola achidi kumotoka, kadivulishi neyi atubola aweni.

¹⁶Wunavulishi akwakulandujola eyi, kubadika tutumbwa twamwiwulu kuvula. Atubola achidi kumotoka hiyakutandama nakukisaŋana, nkumininaku hiyakuditúukila.

¹⁷Antu eyi avwikawu yibaŋula adi neyi atubola, anyanta jeyi amajita adi neyi mazaza ampasu ateekaŋa kumakoli hefuku dachishika, chidikusela itaŋwa hiyakuditúukila, kwosi niniwu wukwiluka kwaduwu.

¹⁸Eyi mwanta wakuAshuri, atubiŋa tweyi adi nakukama tulu. Ayilobu jeyi anashakami dehi. Antu eyi anaŋalaŋani hamapidi; hikudi wakuyipompeshaku.

¹⁹Hikudi kuwundisha yikatu yeyuku; chitu cheyi chinasweji. Antu ejima akatiya nsaŋu yeyi aketa mumakasa hansaŋu yeyi; ochu hanashalinyi hanabuli kuhita kutama kweyi kwakakumaŋa?