Read MUKANDA WANZAMBI Habakuki 1 Bible Online

Habakuki 1 - MUKANDA WANZAMBI bible

Habakuki 1

¹Wuprofwetu wamweniyi kaprofwetu Habakuki.

²Eyi Yehova, nukudila dile-e kushika kumwakanyi chakadi eyikutiya? Nabidiki kudeyi jamadombu, eyi kwamwina nehi.

³Wanmwekeshelaŋadi kuluwa? Wantalishilaŋadi kuyuma yakala? Muloŋa kumesu ami kudi nakumwekana nikukisaŋana nimadombu, kudi nakunyamuka nikuzuŋazuŋa niyidjokojola.

⁴Dichi nshimbi jazeya dehi, wuŋaji hiwamwekanaŋaku. Antu atama hiyakukuchika antu aloŋa; dichi wuŋaji chiwukumwekana wunaheŋi dehi.

⁵Enu mudi munyuza, talenu mumoni, muhayami nimukanwa loku. Muloŋa ami nukukoŋa mudimu mumafuku enu, mudimu owu himukuwitiyaku hela akuyishimwinawu.

⁶Muloŋa tiyenu, ami nakanyamuna aKaladeya, muza wukweti ndulu, wanyakala kuzuwa; watambatambaŋa mwatohela iseki kulonda atambuli nyikala yambala yawakwawu.

⁷Kuyitala wutiya niwoma nikuzaala. Niwuŋaji wawu ni kulema kwawu kwakudinka awenawu.

⁸Tuwalu twawu twabadika yiseŋantambu lufuchi, abadika tuŋiwidi twamelela kuzuwa; akwatuwalu twawu atandamaŋa, eŋa, akwatuwalu twawu afumaŋa kwakulehi, atúukaŋa neyi ambuulu anyakalaŋa kuya nakuvwota.

⁹Chakwinzawu wejima wawu akulonda wowu madombu hohu; kumesu awukudi chipepa chidi neyimpepela yakumusela; akuŋulaŋa ankoli neyi wusekulula.

¹⁰Asehaŋa anyanta ankanu, atulamba ayimona adi neyi akuhemesha; yipaka yejima mwadikaŋilaŋawu antu ayiyiŋilaŋa, alumbikaŋaku maseki hiyakuyitambula.

¹¹Henohu wakahita naŋovu neyi mpepela, wakapandakana, wakatanya. Nzambi yindi joji Ŋovu jindi.

¹²Eyi Yehova Nzambi yami, eyi Wami Wajila, hiwudi wakufumisha kunyaka yahaya nyakaku? Hitwakafwaku. Eyi Yehova, wunamufuukwili kumusompesha; nineyi, eyi Ilola, wunamushimatishi kulonda kubabesha.

¹³Eyi wukweti mesu atooka abulaŋa kutwesha kubanjila yatama, abulaŋa kutwesha kutala yaheŋa, muloŋanyi watalaŋa antu akwatilaŋa akwawu makasu, hiwukumwena nizo-o helaŋa muntu watama hakumuminya mukwawu wamubadika kuloŋa?

¹⁴Muloŋanyi wabalumunaŋa antu hiyakwikala neyi inshi jamukaluŋalwiji, hela neyi yuma yazalalaŋa, yabula nyuli yawu?

¹⁵Yena wayikwataŋa wejima wawu nelowa, wayikwataŋa nakaleŋi kindi, wayikuŋulaŋa muchikokela chindi. Dichi chazaŋalelaŋayi, hakuluŋa nikuluŋa.

¹⁶Dichi hakupesha nikaleŋi kindi, hakwochela nichikokela chindi yuma yamavumba amawahi; muloŋa diku kwatohelenayi mujimba windi, kwadiilaŋayi niyuma yindi yayiwahi.

¹⁷Komana asukuli tuhu kwindi kaleŋi kindi abuli kwanakena kujaha nyuza hefuku hefuku?