Read MUKANDA WANZAMBI Habakuki 2 Bible Online

Habakuki 2 - MUKANDA WANZAMBI bible

Habakuki 2

¹Nukwimana hami hinatalatalilaŋa, nukwimana hakaposhi, nukutalatala nimoni chuma chakahoshayi nanami, nimunakaakula namatopi ami natopekeli.

²Yehova hakuŋakula nindi, Sonekaku chimwenu, wuchimwekeshi hanyikanda chalumbuluka, kulonda wukuchitaŋa ayi lufuchi.

³Muloŋa chimwenu ichi chichidi kanda, chakumwaka wakutoŋola dehi, chidi nakunyakala chishiki kunsa, hichakatwambaku. Hela chikulabajala, chichiŋilili, muloŋa chakenza chalala, hichakalabaku.

⁴Tiya, muchima windi wadivwimba dehi, hiwoloka mukachi kinduku. Mukwakuloŋa wakahandila kukwitiya kwindi.

⁵Eŋa, nivinyu nawa adimbekaŋa antu chatama, himuntu wadivuna, wakashakamaŋa kwitala dindi, watoheshaŋa lwisu lwindi neyi kaluŋa, wudi neyi kufwa nawa, hatweshaŋa kwikutaku, wadikuŋwilaŋa nyuza yejima, wadilumbikilaŋa antu akumatuŋa ejima.

⁶Awa ejima hiyakumutila chishimuku? Hiyakumutila chishimu chakumuseha nachuku? Akumwila nawu, Yayo, muntu wavulishaŋa yuma yambala yawakwawu! Kushika nikumwakanyi? Muntu waditwikaŋa chiteli chatupopu!

⁷Antu akakudya chatama hiyakakunyamukila chakukukasumwishaku? Awa akakubindaŋesha hiyakahinduka namutuluku? Kudi wena hiwakekala neyi yuma yakupupapupaku?

⁸Ochu chiwunapupapupi nyuza yayivulu, nineyi akakupupa nawa kudi antu amumatuŋa anashalashali; namuloŋa wamashi awantu, nayamadombu yiwunakoŋi niituŋa, nimukala, niantu ejima ashakamamu.

⁹Yayo, owu muntu wahetelaŋa kunŋalanyi yatama kulonda eŋgi mwitala dindi, ashi chisakala chindi hewulu hahalehi, kulonda kupuluka kuŊovu jyuma yatama!

¹⁰Ochu chiwunafumishuhu antu amatuŋa amavulu, wunakwati mpùŋa yakusawisha mutaŋa weyi, wunavulumuni chakuditamisha eyi aweni.

¹¹Muloŋa malola akakaloka mumbaŋu, ninyalachi yasokawu nachu yakaakula.

¹²Yayo, muntu wukutuŋa mukala namashi awantu, wukukolesha mukala nakuheŋa!

¹³Tiya, antu amumatuŋa chakabakenaŋawu kesi, ninyuza chadizeyeshelaŋawu yuma yamukunkulwayi, hichinafumi kudi Yehova wamazazaku?

¹⁴Muloŋa hanu heseki hakenzala nakwiluka kwakwiluka kulema kwaYehova, neyi meji chabutaŋawu kaluŋalwiji.

¹⁵Yayo, muntu wukumwinka mukwawu walwa, wawejelamu dehi niwulembi weyi, hiwukumushetesha nawa, kulonda wutali wusonyi wawu!

¹⁶Eyi watelela kulema hikukwinzala nsonyi. Nwaku nineyi nawa, wikali neyi chidima. Luŋasa lwakuchikasa chaYehova chachidiilu lwakanyeŋumuka, lwakashika kudeyi, nsonyi yatama yakekala hakulema kweyi.

¹⁷Muloŋa yamadombu yiwakoŋeli Lebanoni yakakushikena eyi aweni, nikujilumuna kuwajilumwini anyama kwakakufwisha mutentu; muloŋa wamashi awantu wunapwekeshi, nayamadombu yiwunakoŋi niituŋa nimukala niantu ejima ashakamamu.

¹⁸Mukishi wakusoŋa wanasoŋuwu kudi mukwakusoŋa, hela mukishi wakusuŋununa wawuleji wakutwamba, wakwashaŋa muntu ŋahi, mwaka mukwakuwumba, chakuwumbayi mukishi wakahoshaŋa, akuhweleli chuma chanawumbiyi?

¹⁹Yayo, muntu wukwila kamutondu, nindi, Hinduka! Wukwila ilola dakahoshaŋa, nindi, Nyamuka! Chumichi chikuleja muntu kwaamu? Talenu, achila mika tuhu wuru nasiliva, mukachi himudi muuya hela wantuku.

²⁰Ilaŋa Yehova wudi mutembeli yindi yajila. Iseki dejima dimweni zo-o kumesu indi.