Read MUKANDA WANZAMBI Habakuki 3 Bible Online

Habakuki 3 - MUKANDA WANZAMBI bible

Habakuki 3

¹Kulomba kwalombeliyi kaprofwetu Habakuki, kwakwimbila muShiŋiyonoti.

²Eyi Yehova, natiyi nsaŋu yakukuteneyi, natiyi niwoma. Eyi Yehova hizumwishaku mudimu weyi munu mukachi kanyaka, munu mukachi kanyaka wuwutiyakeshi, mundombu anukaku luwi.

³Nzambi wenjili, wafumini kuTemani; niWajila wenjili, wafumini kuParani. Sela. Wukeleŋi windi wabutili mawulu wi-i, iseki denzeli nakushimeka kwakumushimeka.

⁴Kuzúuma kwindi kwadiŋi neyi chejeji; nyiteeta hiyikutamuka kuchikasachindi. Hakusweka Ŋovu jindi kwenoku.

⁵Kwakuyayi hikukuya chipupu, kunyendu yindi hikukufuma nimakalaakesi.

⁶Wemeni, wesekeli iseki; watalili, wamwaŋili nyuza. Mapidi amaneni akunyaka yahaya nyaka apalaŋeni ndu-ndu, mpidi janyanya jakunyaka yakumashiita oku-u, jabandamini; kuyayaya kwindi kwakunyaka yakumashiita oku-u.

⁷Namweni matenti akuKushani hiyakumona ihuŋu; nimahina akukudeka amwituŋa daMidiyani hiyakuza ala.

⁸China chiwendeli hatuwalu tweyi, hamakálu eyi awamwinu. Yehova watiyili kutama natuloŋa, tahindi? Wazuwilili tuloŋa, tahindi? Waleteli ndombu nakaluŋalwiji, tahindi?

⁹Wedishili wuta weyi wamukunji hatooka. Izu dakusanyika diwasanyi-kilili nyuza dadiŋi izu dalala. Sela. Wabalwili iseki natuloŋa.

¹⁰Mapidi chakumwenuwu hiyakutiya niwoma; meji asumpokeli ahitanikuhita. Inyiŋi datiyakesheli izu dadu, hidikwolola nimakasadu kwiwulu.

¹¹Itaŋwa nakakweji emeni hawu hashakamawu; anamoni dehi chejejichansewu jeyi jidi nakuhita, nikutoŋaeka kweyoŋa deyi didi nakubebema.

¹²Wendeli mwituŋa nakuhila, wahulili nyuza nakuzuwa.

¹³Wedi kili kulonda kwamwina antu eyi, kulonda wamwini weyi awayishawu dehi manji. Wakatishili mwanta wamwitala damukwakutama, wamushili hatooka kufumisha kwishina ndo nikunshiŋu.

¹⁴Walokweli nyitu yawayilobu jindi nanyitondu yindi yomweni. Enjilineyi chinjimbi nawu ampalaŋeshi. Chuma chatiyawu kuwaha yowu kudya atuzweŋi kumbadi.

¹⁵Wadatili kaluŋalwiji natuwalu tweyi, wowu mulumba wachimeji chaŋovu.

¹⁶Natiyili, mwivumu muzaala nikuzaala, nyivumbu yami yahenyeni nezudinatiyili; mumafwahami mwepilili kutoka, nadini nakuzaala kunashakamini. Hela chochu, nukuduŋumika zo-o, nakuchiŋilila ifuku dayihuŋu dakayiwana antu akeŋila mwituŋa dindi nanjita.

¹⁷Muloŋa hela chikuyu chikubula kukenuka, hela nyivinyu yikubulakusoŋa, hela nyiolive yikucheluka, nimaha ákubula kwidisha yakudya yawu, niyimuna yikumana mwiyinda, ni aŋombi ákubula mumataŋa,

¹⁸Ami kwami nukuluŋila mudi Yehova, nukutiya kuwaha mudi Nzambi yawamwinu wami.

¹⁹Mwanta Yehova diyi Ŋovu jami, wabalumunaŋa nyendu yami hiyikwikala neyi nyendu yankayi, wukuŋendesha hayinaŋanaŋa yami. Kamukulumpi wawakwakwimba, kakwimbila hatudada twami.