Read MUKANDA WANZAMBI Zefania 3 Bible Online

Zefania 3 - MUKANDA WANZAMBI bible

Zefania 3

¹Yayo, wadikaŋa, wamajilu, mukala wakabishaŋa kwawu!

²Hatiyilaŋa mwizu damuntuku; hetŋilaŋa kumuleja maanaku; hakuhwelelelana Yehovaku; hakundaminaŋa kwakwihi naNzambi yinduku.

³Atulamba twindi adi mukachi kawu hiyanyitupa abulumaŋa, ansompeshi indi hiyatuŋiwidi amelela; hiyashiyaloŋa chuma chishi ka kubudiduku.

⁴Tuprofwetu twindi hiyantu akuhemesha, akwatilaŋa akwawu makasu. Atupristu twindi anajiloli malala, anamotoki nshimbi.

⁵Yehova mukachi kawu waloŋa kwindi; hakela yakuheŋaku. Budidi hibudidi wedishaŋa wuŋaji windi hatooka, hakaŋanyaloŋaku; ilaŋa antu áheŋa hiyeluka nsonyuku.

⁶Ami nafumishuhu dehi nyuza, tuposhi twakumpwembu jawu twashala dehi twamukunkulwayi; nabundishi dehi nyikwakwa yamunyikala yawu, mubuli kuhita antu. Nyikala yawu yakisika dehi, himudi nawa muntuku, himwashakama nawa muntuku.

⁷Nelili nami, Chalala wakantiva woma, waketŋia kukuleja maana, kulonda akabuli kufumisha hindi hashakamaŋayi munamufuukwilili mwejima; ilaŋa wena amenekeli budidi nakutokesha mwelilaŋawu mwejima.

⁸Yehova nindi, Nchiŋililenu kushika nikwifuku dinakanyamuka nakukwatana. Muloŋa natoŋola dehi kupompesha nyuza, nakakumaŋeji mawanta, kulonda niichili kuhila kwami hadi wena, kwokuzuwa kwami kwasweja kwejima; muloŋa iseki dejima dakanoŋa nakesi kamukawu wami.

⁹Eŋa, henohu nakabalumuna madimi anyuza akekali idimi ditooka, kulonda wejima wawu akatambikaŋa ijina daYehova, kulonda akamukala kelaŋa namuchima wawu wumu.

¹⁰Akwakunlembelela, wowu anyana kawantu ami amwaŋala, akafuma kwishinadi datuloŋa twamuEtiyopiya, akaleta himulambu wami.

¹¹Hefuku odu hiwakatiya nsonyi yayuma yejima yiwelilaŋa yakumotoka izu damuku. Muloŋa henohu mukachi keyi nakafumishamu akwenu aluŋilaŋa nakudinka wanta, hiwakadivuna nawa cheŋi kumpidi yami yajilaku.

¹²Ilaŋa nakashiya mukachi keyi atuzweŋi amona ihuŋu, diwu akabatama mwijina daYehova.

¹³AIsarela akashalaku hiyakela mwakuheŋa, hela kuhosha mwakutwambaku; namutunwa twawu himwakamwekana nawa idimi dakudimbanaku. Muloŋa wena akadyaloŋa, akakambamaŋa, hikwakekala wakuyitiyisha womaku.

¹⁴Eyi mwana kaZiyona, imbaku chakola. Eyi Isarela, dikuwi. Eyi mwana kaYerusalema wamumbanda, tiyaku kuwaha, luŋaku namuchima wejima.

¹⁵Yehova nafumishi dehi kusompesha kweyi, nahaŋi dehi chilumbu cheyi. Mwanta wawaIsarela, yowu Yehova, wudi mukachi keyi. Hiwakamona cheŋi yatamaku.

¹⁶Hefuku denodu akamwila Yerusalema nawu, Eyi Ziyona bayi wutiya womaku; makaseyi bayi azeyaku.

¹⁷Yehova Nzambi yeyi wudi mukachi keyi, hichilobu wemikaŋa mushindu. Wakakuzaŋalela eyi nakutiya kuwaha, wakanooka mukukeŋa kwindi, chakakumonayi wakaluŋa nakwimba tumina.

¹⁸Antu adishonashonaŋa, adiŋi eyeyi, nakayipompesha kuchawija chakushiika; awa asendelaŋa chiteli chindi chadiŋi chakusawuka.

¹⁹Henohu nakayikoŋa antu ejima akukabishaŋa. Nakamwamwina wabalakataŋa, nakapompesha cheŋi ahaŋiluwu, adiŋi nansonyi yatiyakeni hanu heseki dejima nakayibalumuna kwikala chuma chakushimeka niijina.

²⁰Henohu nakayiŋa, henohu nakayipompesha. Muloŋa chinakafuntisha cheŋi kumesu enu akwenu ayili muwukoli, nakayibalumuna kwikala ijina nichuma chakushimeka mukachi kanyuza yejima yawantu ahanu heseki. Dimu mwanahoshiyi Yehova.