Read MUKANDA WANZAMBI Hagai 1 Bible Online

Hagai 1 - MUKANDA WANZAMBI bible

Hagai 1

¹Hamwaka wamwanta Dariyusa wamuchiyedi, hakakweji kamuchitanu nawumu, hefuku dakakweji dakusambila, izu daYehova denjili kudi kaprofwetu Hagayi, dishika nikudi nguvulu wawaYuda Zerubabeli, mwana kaSheyaleteli, nikudi kapristu muneni Yoshuwa, mwana kaYehozadaki,

²nindi, Tiyenu mwanahoshiyi Yehova wamazaza, nindi, Antu awa nawu, Mwaka wakutoŋa itala daYehova kanda wushiki.

³Henohu izu daYehova hidikwinza kudi kaprofwetu Hagayi,

⁴nindi, Iwu komana himwaka wenwenu aweni, himwaka wakushakamaŋa enu mumatalenu akusha mapalanga mukachi, iku italidi saŋa dashakamina kwanyilumba hohu?

⁵Dichi dinu Yehova wamazaza nindi, Toŋojokenu chachiwahi yuma yimwelaa.

⁶Kudima munadimi yayivulu, muneŋŋi yantesha; kudya mwadyaloŋa, kuwanina nehi; kunwa mwanwaŋa, mpwila kuketuka nehi; yakuvwala mwavwalaŋa, kwosi muntu natiyi iyenaku; niwakalakelaŋa wufwetu, wakalakelaŋa wufwetu wakusha munjeki yalokoka.

⁷Dichi Yehova wamazaza nindi, Toŋojokenu chachiwahi yuma yimwelaŋa.

⁸Yenu mwakakanduki hampidi, mwakaleti nyitondu, mwakatuŋi itala; nakaditiyi kuwaha, ami nakekali walema. Dimu mwanahoshiyi Yehova.

⁹Mwadiŋi nakutalila yayivulu, aka, kwenjili yantesha; chimwayishikŋili mwitala, nayipekumwini kwami. Yehova wamazaza nindi, Muloŋanyi? Muloŋa wowu wetala dami dinashakami kwanyilumba hohu, enu himukuditemukila iwu kwitala dindi yomweni, iwu kwitala dindi yomweni.

¹⁰Dihu hanafumi iwulu denu kubula kuleta wuumi, niiseki kubula kusoŋa yakudya yindi.

¹¹Natambikili chaaŋa chinzi mwituŋa, nikumapidi, nikutidiku, nikuvinyu, nikumanji, nikuyuma yasoŋaŋa heseki, nikudi antu, nikudi ayimuna, nikunyidimu yejima yakabakana antu yamakasa.

¹²Henohu aZerubabeli mwana kaSheyaleteli, nakapristu muneni Yoshuwa mwana kaYehozadaki hamu nawantu ejima asheluku, ovwahilili izu daYehova Nzambi yawu, nimazu akaprofwetu Hagayi, mwomwamutemesheleluwu kudi Yehova Nzambi yawu; antu atiyili woma kumesu aYehova.

¹³Ntemesha yaYehova Hagayi wahosheli mwomwizu daYehova damutemesheluwu kuhosha kudi antu, nindi, Yehova nindi, Ami nidi nenu.

¹⁴Yehova hakusaŋumuna spiritu yanguvulu wawaYuda Zerubabeli mwana kaSheyaleteli, nispiritu yakapristu muneni Yoshuwa mwana kaYehozadaki, nispiritu yawantu ejima asheluku; hiyakwinza nakukoŋa nyidimu mwitala daYehova wamazaza, Nzambi yawu,

¹⁵hefuku dakakweji damakumi ayedi nakawana, mukakweji kamuchitanu nakamu, mumwaka wamwanta Dariyusa wamuchiyedi.