Read MUKANDA WANZAMBI Hagai 2 Bible Online

Hagai 2 - MUKANDA WANZAMBI bible

Hagai 2

¹Mukakweji kamuchitanu nachiyedi, mwifuku dakakweji damakumi ayedi nakamu izu daYehova denjili kudi kaprofwetu Hagayi,

²nindi, Ihulaku dinu naŋuvulu wawaYuda Zerubabeli mwana kaSheyaleteli, nakapristu muneni Yoshuwa mwana kaYehozadaki, nawantu anashaluku,

³neyi, Hadenu anyi amweni italidi nakulema kwadu kwakusambila? Katataka munadimoni ŋahi? Kumesu enu hidinekali chuma chamukunkulwayuku?

⁴Yehova nindi, Hela chochu, eyi Zerubabeli, dikwatishi; nineyi kapristu muneni Yoshuwa mwana kaYehozadaki, ninenu antu amwituŋa ejima; Yehova nindi, Dikwatishenu mukoŋi. Muloŋa Yehova wamazaza nindi, Ami nidi nenu.

⁵Mwomwizu dinatiyaŋeni nenu himwafumini muEjipitu, niSpiritu yami hiyikushakamaŋa mukachi kenu. Bayi mutiya womaku.

⁶Muloŋa Yehova wamazaza nahoshi nindi, Cheŋi nawa, kunashali mpinji yantesha nakakankisha mawulu namaseki, nikalupalwiji, niiseki dawuma.

⁷Yehova wamazaza nindi, Nakakankisha ninyuza yejima, niyuma yatiyaloŋa nyuza yejima kuwaha yakenza, nakenzesha italidi nakulema.

⁸Yehova wamazaza nindi, Mwenisiliva, yami; mweniwuru, yami.

⁹Yehova wamazaza nindi, Kulema kwakukuminina kwetalidi kwakabadika kwakusambila. Yehova wamazaza nindi, Muchipela chinu nakenkamu kuwunda.

¹⁰Hefuku damakumi ayedi nakawana, dakakweji kamuchitanu nachiwana, mumwaka waDariyusa wamuchiyedi, izu daYehova denjili kudi kaprofwetu Hagayi,

¹¹nindi, Yehova wamazaza nindi, Ihulaku dinu atupristu mwaya nshimbi,

¹²neyi, Neyi muntu wukusendela mbiji yajila kwihina danavwaliyi, akunka nehina dindi hela mankendi, hela mafu, hela vinyu, hela manji, hela yakudya hiyakudya, yikubalumuka yajila, tahindi? Kuchinka atupristu nawu, Nehi.

¹³Hagayi hakuyila cheŋi nindi, Neyi muntu wadiŋilola dehi namufu akunka kuchuma chimu chayena yumiyi, chakekala chajilola, tahindi? Kuchinka atupristu nawu, Chakekala chajilola.

¹⁴Hagayi hakwakula nindi, Yehova nindi, Dichi chaduwu antu awa, dichi wudi muziwu kumesu ami; dichi yidi ninyidimu yamakasawu yejima; niyuma yakulambulawu kwenoku yajilola.

¹⁵Ichi dinu mwani, toŋojokenu chachiwahi, kufumisha kwifuku idi nakutwala kumbidi, kufumisha hadiŋi kanda anaŋiki ilola dimu helola di kwawu mutembeli yaYehova,

¹⁶mwejimomu, muntu chakwinzayi kumulumba wamabaŋu makumi ayedi, kuwana hikudi ikumi hohu; muntu chakwinzayi kungungungu yavinyu nindi atehuni nswaha makumi atanu, kuwana hikudi makumi ayedi hohu.

¹⁷Nayibabesheli nakúumisha yakudya, nambuwa, ninvula yamalola, munyidimu yamakasenu yejima; hela chochu, himwafuntili kudamuku. Dimu mwanahoshiyi Yehova.

¹⁸Toŋojokenu mwani chachiwahi, kufumisha kwifuku idi nakutwala kumbidi, kufumisha kwifuku damakumi ayedi nakawana, dakakweji kamuchitanu nachiwana, kufumisha kwifuku daaliluwu chikuku chatembeli yaYehova, chitoŋojokenu chachiwahi.

¹⁹Mbutu yashika dehi munkalana, tahindi? Mwalala, hela nyivinyu, hela yikuyu, hela nyibula, hela nyiolive kanda yisoŋuku; kufumisha kwifuku idi nakayikiswilaŋa nkisu hohu.

²⁰Izu daYehova denjili kamuchiyedi kudi Hagayi, mwifuku dakakweji damakumi ayedi nakawana,

²¹nindi, Hoshaku nanguvulu wawaYuda Zerubabeli, neyi, Nakakankisha mawulu namaseki;

²²nakahinuna itanda damawanta, nakakisaŋana Ŋovu jamawanta anyuza; nakahinuna nimakálu niantu akwendamu; nituwalu nawakwakwendahu akadimbuka nampoku jatubali jawana kwawu.

²³Yehova wamazaza nindi, Eyi kambuŋami Zerubabeli mwana kaSheyaleteli nakakutambula hefuku odu; Yehova nindi, Nakakubalumuna kwikala neyi kazeya kakusha chinjikijilu, muŋa ami nakutondi dehi. Dimu mwanahoshiyi Yehova wamazaza.