Read MUKANDA WANZAMBI Zakaria 1 Bible Online

Zakaria 1 - MUKANDA WANZAMBI bible

Zakaria 1

¹Mukakweji kamuchitanu nachisatu, mumwaka waDariyusa wamuchiyedi, izu daYehova denjili kudi kaprofwetu Zekariya, mwana kaBerekiya, Berekiya mwana kaldo,

²nindi, Yehova wazuwili nankashi nawankakulula jenu.

³Dichi kayili neyi, Yehova wamazaza nahoshi nindi, Funtenu kudami, dimu mwanahoshiyi Yehova wamazaza, ninami nakafunta kudenu. Dimu mwanahoshiyi Yehova wamazaza.

⁴Yehova wamazaza nahoshi nindi, Bayi mwikalaŋa neyi ankakulula jenu abidikilaŋawu kudi atuprofwetu akusambilaku; nawu, Funtenu mufumi munjila jenu jatama, muleki yuma yatama yimwelaŋa. Ilaŋa wena kutiya nehi, hela kuntiyilila nehi. Dimu mwanahoshiyi Yehova.

⁵Ankakulula jenu adi kudihi? Hela atuprofwetu, wowu ahandaŋa haya nyaka?

⁶Ilaŋa mazu ami ninshimbi jami jinalejeli ambuŋami atuprofwetu, hiyalondeleli ankakulula jenu nakuyiwanaku? Niwena nawa abalumukili, nawu, Mwatoŋweliyi Yehova wamazaza kutukoŋa, mwaya njila jetu nimwaya yuma yitwelaŋa, dimu mwanatukoŋiyi.

⁷Hefuku damakumi ayedi nakawana, dakakweji kekumi nakamu, yowu kakweji Shebati, mumwaka waDariyusa wamuchiyedi, izu daYehova denjili kudi kaprofwetu Zekariya mwana kaBerekiya, Berekiya mwana kaldo,

⁸nindi, Namweni nawufuku hikudi iyala wudi nakwenda hakawalu kachinana, hakwimana mukachi kayibubu yadiŋi muchibukubuku; kunyima yindi kudi tuwalu nituchinana, nituchiluluka, nitutooka.

⁹Hinukwihula nami, Eyi Mwanta wami, wenawa hiyanyi? Kaŋelu wadiŋi nakuhosha nanami hakuŋila nindi, Nukukuleja chaduwu.

¹⁰Owu iyala wemeni mukachi kayibubu hakwakula nindi, Wenawa diwu anatemeshuwu kudi Yehova kuya nakutambatamba mwahita iseki.

¹¹Wena hiyakumwakula kaŋelu kaYehova wemeni mukachi kayibubu, nawu, Tunayi dehi nakutambatamba mwahita iseki, tunamoni iseki dejima didi nakushakama zo-o, didi chamwena.

¹²Kaŋelu kaYehova hakwakula nindi, Eyi Yehova wamazaza, Yerusalema nanyi kala yawaYuda yiwunaswejeli dehi kuzuwila iyi nyaka makumi atanu nayedi, wukulekaŋa tuhu kuyitiyila luwi nikumwakanyi?

¹³Yehova hakumwakula kaŋelu wadiŋi nakuhosha nanami, hakumuleja mazu amawahi, mazu akukundeja.

¹⁴Dichi kaŋelu wadiŋi nakuhosha nanami, hakuŋila nindi, Bidikaku neyi, Yehova wamazaza nahoshi nindi, Natiyili Yerusalema naZiyona mukawu wasweja nankashi.

¹⁵Nidi nakuzuwa nankashi nanyuza yinashakami chamwena. Ami nazuwili chantesha hohu, hakwila wena hiyakuswejesha yatama.

¹⁶Dichi Yehova nindi, Ami nafunti dehi kuYerusalema nawushona, akatuŋamu cheŋi itala dami. Dimu mwanahoshiyi Yehova wamazaza. HaYerusalema akatanjika mwonji.

¹⁷Bidikaku cheŋi neyi, Yehova wamazaza nahoshi nindi, Nyikala yami yakashakama chachiwahi, yakatandama nawa cheŋi; Yehova wakakundeja cheŋi Ziyona, wakatonda cheŋi Yerusalema.

¹⁸Nafumbwili mesu ami, nami nitali, hikudi nseŋu jiwana.

¹⁹Hinukumwihula kaŋelu wadiŋi nakuhosha nanami, nami, Yeniyi hiyumanyi? Hakuŋakula nindi, Yeniyi hinseŋu jinapalaŋeshi Yuda naIsarela naYerusalema.

²⁰Yehova hakunleja achi awana.

²¹Hinukwihula nami, Wenawa anenzi nakwiladi? Hakuhosha nindi, Iji diji nseŋu jinapalaŋeshi Yuda, mwaka mubuli muntu niwumu wukubanduka kunamutu windi. Ilaŋa wa anenzi nakuyizaalisha woma, anati heseki nseŋu janyuza yanyamwini nseŋu jawu, nawu ahumi ituŋa daYuda adipalaŋeshi.