Read MUKANDA WANZAMBI Zakaria 10 Bible Online

Zakaria 10 - MUKANDA WANZAMBI bible

Zakaria 10

¹Mulombenu Yehova nvula muchilaaka chanvula yakukuminina, mulombenu Yehova wakeneshaŋa mavu; yena wakayinka nvula jawo-wo-wo, kulonda enki antu ejima matahu mumpata.

²Nkishi jakupanda jinahoshi yamukunkulwayi, akwakuhoŋa anamoni chuma chakutwamba; anashimuni yilota yakutwamba, anakundeji antu mwamukunkulwayi; dichi wena adi nakululuta neyi nyikoku, anamoni kukala muloŋa wákubula kabiŋa.

³Nayitatashanina dehi atubiŋa kuzuwa, nakababesha yizamba yampembi. Muloŋa Yehova wamazaza wahempula dehi mukanka windi wanyikoku, wowu mutaŋa waYuda, wakayibalumuna kwikala neyi kawalu kindi kakawahi kadi kunjita.

⁴Kudi yena kwakafuma ilola dakwiwombu, kudi yena kwakafuma mpopu, kudi yena kwakafuma wuta wamukunji wakunjita, kudi yena kwakafuma akwakuyula ejima hamu.

⁵Akekala neyi ayilobu, nakudatola ayilumbu jawu kunjita, mumaseki amunyikwakwa achakata; akalwa, muloŋa Yehova wudi nawu. Akwakwendela hatuwalu akabaya.

⁶Nakakolesha mutaŋa waYuda, nakaamwina mutaŋa waYosefu, nakayifuntisha cheŋi, muloŋa ami nayitiyili luwi, akekala neyi hinayumbiluku. Muloŋa yami Yehova Nzambi yawu, nakayitiyaloŋa.

⁷AkwaEfweremi akekala neyi ayilobu, nyichima yawu yakazaŋalala neyi chazaŋalalaŋawu navinyu. Eŋa, anyanawu akachimona, akazaŋalala; nyichima yawu yakaluŋa mudi Yehova.

⁸Nakayimbila muloji wakuyitambika, nakayipompesha; Muloŋa nayikuula dehi. Akavula neyi chavuliluwu.

⁹Hela nayikuwakuwa dehi mukachi kanyuza, akaŋanukaŋa mumatuŋa akwakulehi. Akahandaŋa hamu nawanyanawu, akafunta cheŋi.

¹⁰Nakayifumisha mwituŋa daEjipitu, nakayifuntisha cheŋi kwawu, nakayifumisha muAshuri, nakayipompesha; nakayishikŋa mwituŋa daGileyadi naLebanoni; hiyakawanina hakushakamaku.

¹¹Wakahita mukaluŋalwiji kayihuŋu, waketa mankanda amukaluŋalwiji, nimanyiŋi amuNile akoma ejima chau. Niwanta wadinkeluwu aAshuri akawushikumwisha, ninkunyi yaEjipitu yawanta yakayifuma.

¹²Nakayikolesha mudi Yehova; akadisamba mwijina dindi. Dimu mwanahoshiyi Yehova.