Read MUKANDA WANZAMBI Zakaria 11 Bible Online

Zakaria 11 - MUKANDA WANZAMBI bible

Zakaria 11

¹Eyi Lebanoni, enzululaku yenzelu yeyi kulonda kesi kalashi nyisida yeyi.

²Eyi munjunŋa, kalokaku, muloŋa musida wakotokadehi, muloŋa nyitondu yayiwahi yakisika dehi. Enu nyikula yamuBashani, kalokenu, muloŋa ivunda dakunduka dehi.

³Tiyenu izu dawatubiŋa adi nakukaloka, muloŋa kuwaha kwawu kunakisiki dehi. Tiyenu izu danyenzi yanyitupa didi nakubuluma; muloŋa itu daYodana dakisika dehi.

⁴Nzambi yami Yehova nahoshi nindi, Diishaŋa mukanka wanyikoku yanatoŋoluwu kujaha;

⁵ayilandaŋa ayijahaŋa tuhu, chakadi kumwenamu muloŋa; ayilandishaŋa elaŋa nawu, Kisu kisu Yehova, muloŋa ami naheta dehi. Atubiŋa twawu awenawu hiyayitiyilaŋa luwuku.

⁶Muloŋa Yehova nindi, Hinakatiyila nawa cheŋi akwetuŋa luwuku. Ami kwami nakayihanahana amayala ejima, iwu kudi mukwawu, iwu kudi mukwawu, iwu kudi mwanta windi walukanu. Wena akatapa ituŋa, ami hinakayipulwishaku.

⁷Dichi nadiishili mukanka wanyikoku watoŋweluwu kujaha, twotu tunyikoku twatamatama. Nanoneni nkobu jami jiyedi; yimu nayitumbili nami, Lubanji, yi kwawu nayitumbili nami, Kunuŋa; hinukudiisha nimukanka wanyikoku.

⁸Nakisaŋenuhu atubiŋa asatu kakweji kawu kamu; muloŋa ankumishili kumuchima, niwena nawa antiyili kumuchima bwi.

⁹Ami nawa hinukwila nami, Hinukuyidiisha kwamuku. Wakufwa afwi tuhu kwindi, wakukisika akisiki tuhu kwindi, anashali akadidya, iwu nakudya mbiji yamukwawu, iwu nakudya mbiji yamukwawu.

¹⁰Hinukunona nkobu yami Lubanji, hinukuyiketula hakachi ngwa, kulonda nŋahi chitiyaŋenu chami chinatiyaŋeni nanyuza yawantu yejima.

¹¹Dena ifuku odu chifwa ni kufwa. Dichi tunyikoku twamumukanka twatamatama twantiyililaŋa hitukwiluka nawu hiizu daYehova.

¹²Hinukuyila nami, Neyi munatoŋojoki nenu chinawahi, nyinkenu wuseya wami, neyi nehi lekenu. Dichi hiyakumpezeleshela makumi asiliva asatu awuseya wami.

¹³Yehova hakuŋila nindi, Yinatilenu kaŋemi, hiwuseya wawuwahi waŋesekeluwu kudi wena. Hinukunona owu makumi asiliva asatu, hinukuyinatila kaŋemi, mwitala daYehova.

¹⁴Hinukuketula nkobu yami yi kwawu Kunuŋa hakachi ngwa, kulonda nŋahi wusoku wasemukiluwu aYuda naIsarela ivumu dimu.

¹⁵Yehova hakuŋila nindi, Nonaku cheŋi yuma yakabiŋa wasupa.

¹⁶Muloŋa ami kwami nakemika kabiŋa mwituŋa, wakabulaŋa kuhempula ajimbala, hela kukeŋakeŋa apalaŋana, hela kuuka akotoka, hela kudiisha akola, yena kwindi wakadya mbiji yawanuna, wakasansola niyikwa yawu.

¹⁷Yayo, kabiŋa wamukunkulwayi washiyaloŋa mukanka wanyikoku! Mpoku yakabali yakekala hachikasa chindi, nihadisu dindi dachidiilu. Chikasa chindi chakoma chau, disu dindi dachidiilu dakeyila bwi.