Read MUKANDA WANZAMBI Zakaria 12 Bible Online

Zakaria 12 - MUKANDA WANZAMBI bible

Zakaria 12

¹Wuprofwetu wezu daYehova wakutena aIsarela. Yehova watanjikaŋa mawulu, waalaŋa chikuku cheseki, welaŋa spiritu yamuntu mukachi kindi,

²nindi, Tiyenu, nakabalumuna Yerusalema kwikala lupasa lwakupedaŋila kudi nyuza yejima yanyeŋumukaku; lwakekala lwakumutamisha niYuda nawa hakakuchikawu Yerusalema kudi antu.

³Hefuku odu nakabalumuna Yerusalema kwikala ilola dalema kudi antu akunyuza yejima. Antu ejima akaditwikadu akadikatisha nankashi, ninyuza yejima yahamaseki yakapompa nakulwa nawu.

⁴Yehova nindi, Hefuku odu nakafwisha tuwalu twejima mutentu, niakwakwendelahu nakayizalukisha. Mutaŋa waYuda nakawutonena mesu ami, nakaputisha mesu atuwalu twejima twanyuza yawantu.

⁵Ayilolu awaYuda akahosha munyichima yawu, nawu, Akwakushakama muYerusalema diyi Ŋovu yami mudi Nzambi yawu Yehova wamazaza.

⁶Hefuku odu nakabalumuna yilolu yawaYuda kwikala neyi inuŋu yinabutuki kesi mukachi kanyitondu, neyi chimunyi chakesi chidi mukachi kayita; akavwota antu ejima anyeŋumukaku kwi-ndo, nikuchikasa chachidiilu nikuchikasa chachimunswa. Yerusalema wakashakama cheŋi mwomuchipela chindi, mwomuYerusalema.

⁷Yehova wakasambila kwamwina matenti awaYuda, kulonda lubanji lwamutaŋa waDavidi, nilubanji lwawakwakushakama muYerusalema akabuli kulubadisha aYuda.

⁸Dena ifuku odu Yehova wakalwila akwakushakama muYerusalema. Dena ifuku odu wabula Ŋovu mukachi kawu wakekala neyi Davidi, mutaŋa waDavidi wakekala neyi Nzambi, neyi kaŋelu kaYehova kadi kumesu awu.

⁹Dena ifuku odu nakakeŋa kujilumuna nyuza yejima yakenza nakulwa naYerusalema.

¹⁰Hamutaŋa waDavidi nihadi akwakushakama muYerusalema nakechilahu spiritu waluwi niwakulembelela; akatala hadami alokweluwu. Akamudila neyi chadilaŋa muntu mwanindi wasemuka kanka windi, akamutiyila kulula kumuchima, neyi chatiyaloŋayi muntu kulula hadi wedi windi.

¹¹Dena ifuku odu muYerusalema mwakekala kudila kwasweja nankashi, neyi kudila kwadililuwu kuHadadirimoni muchinekineki chaMegido.

¹²Ituŋa dakadila, chisaka nahachu, chisaka nahachu; chisaka chamutaŋa waDavidi nahachu, aŋodi jawu nahawu; chisaka chamutaŋa waNatani nahachu, aŋodi jawu nahawu;

¹³chisaka chamutaŋa waLevi nahachu, aŋodi jawu nahawu; chisaka chawakwaShimeyi nahachu, aŋodi jawu nahawu;

¹⁴niyisaka yakashalaku yejima, chisaka nahachu, chisaka nahachu, aŋodi jawu nahawu.