Read MUKANDA WANZAMBI Zakaria 13 Bible Online

Zakaria 13 - MUKANDA WANZAMBI bible

Zakaria 13

¹Dena ifuku odu akajikwila mutaŋa waDavidi, niakwakushakama muYerusalema, kaseloki kakutookesha nachu nshidi namajilu.

²Yehova wamazaza nindi, Dena ifuku odu mwituŋa nakajiyishamu majina awakishi akutuŋa, hiyakayanukaŋa nawa cheŋuku. Mwituŋa nakafumishamu nawa atuprofwetu nispiritu yamajilu.

³Akelaŋa chakelayi muntu nindi aprofweti, atata yindi namama yindi amusema akamwila nawu, Eyi hiwukuhandaku, muloŋa wudi nakuhosha yuma yakutwamba mwijina daYehova. Chakaprofwetayi tata yindi namama yindi amusema akamupwika zwa.

⁴Dena ifuku odu atuprofwetu ejima chakaprofwetawu akatiya nsonyi yayimwenu yawu, iwu nachindi, iwu nachindi; hiyakavwala nawa mahina awuvuji kulonda kudimbana nachuku.

⁵Ilaŋa yena wakela nindi, Ami hinikaprofwetuku, nidi mukwakudima kwami; ami kwami ankwata dehi wuduŋu kufuma kuwansi wami.

⁶Muntu wumu wakamwihula nindi, Indi iyi yitu yidi mukachi kamakaseyi yanka? Yena wakaakula nindi, Yoyu yantapiluwu mwitala dawamabwambu jami.

⁷Yehova wamazaza nindi, Eyi mpoku yakabali, hindukaku namutulu wulwi nakabiŋa kami, wulwi namuntu mwinetu. Mutapi kabiŋa, nyikoku yipalaŋani ndundu; ninami nibalumuni chikasa chami hadi anyanya.

⁸Yehova nindi, Mwituŋa dejima mwakela yibalu yiyedi akayifumishahu yakafwa, chamuchisatu chakashalamu.

⁹Chibalu chimu nakachihanwisha mukesi, nakayitookesha neyi chatookeshaŋawu siliva, nakayeseka neyi chesekaŋawu wuru. Akatambika ijina dami, ami nakayitiya. Nakela nami, Hiyantu ami; wena akela nawu, Yehova hiNzambi yami.