Read MUKANDA WANZAMBI Zakaria 14 Bible Online

Zakaria 14 - MUKANDA WANZAMBI bible

Zakaria 14

¹Tiya, ifuku daYehova hidikwinza diwakaanjana mukachi keyi yuma yeyi yakupupa.

²Muloŋa ami nakapompesha nyuza yejima kulonda yidasi njita naYerusalema. Mukala akawutambula, matala akayibuwa, ambanda akayishimba. Chibalu chamukala chakaya muwukoli, antu akashalahu hiyakayikisaŋana mumukalaku.

³Henohu Yehova wakedika nakulwa nanyuzoyu, neyi chalwiliyi hefuku danjita.

⁴Dena ifuku odu nyendu yindi yakemana hampidi yaOliveta, yekala kumesu aYerusalema kumusela, mpidi yaOliveta yakabaluka hakachi kayu chakutala kumusela nikumujika, kwikala nichinekineki cheneni nankashi; chibalu champidi chakaya kukabeta kakuchimunswa, chibalu nawa kukabeta kakuchidiilu.

⁵Enu mwakatemukila kuchinekineki champidi jami, muloŋa chinekineki champidi chakashika nikuAzeli. Eŋa, mwakatemuka neyi chimwatemukili mutentanshi mumafuku amwanta wawaYuda Uziya. Yehova Nzambi yami wakenza, niakwakujila ejima akenza neyi.

⁶Dena ifuku odu kucha hikwakekala kutooka hela kwiyilaku;

⁷ilaŋa dakekala ifuku dimu delukawu kudi Yehova; himwaanaku, hiwufukuku. Ilaŋa kumelela kwakacha to-o.

⁸Dena ifuku odu meji amomi akafuma muYerusalema; chibalu chawu chakaya kukaluŋalwiji kakumusela, chibalu chawu nawa chakaya kukaluŋalwiji kakumujika. Chakekala choche nochu, nihamwaka wankanza, nihamwaka wachishika.

⁹Yehova wakekala Mwanta weseki dejima. Dena ifuku odu Yehova wakekala wumu, niijina dindi dimu.

¹⁰Ituŋa dejima akadibalumuna neyi chana, kufumisha kuGeba nikuRimoni kukabeta kaYerusalema kakuchidiilu; Yerusalema wakanyamuka kwiwulu, wakashakama kuchipela chindi, kufumisha kuchisu chaBenjamini, ndo nikuchisu chakusambila, nikuchisu chakwiwombu, kufumisha nawa kukaposhi kaHananeli kushika nikumakamwinu avinyu yamwanta.

¹¹Mwakashakama antu, himwakekala nawa cheŋi ishiŋuku, Yerusalema wakashakama chakadi kwakama.

¹²Tiyenu chipupu chaketayi Yehova nyuza yejima yalwili naYerusalema. Nyijimba yawu yakanoŋa iku saŋa emenawu zululu, mesu awu akanoŋela muŋoma jamesu awu, madimi awu akanoŋela namutunwa twawu.

¹³Dena ifuku odu mukachi kawu mwakekala muyoyu waweni wakufuma kudi Yehova; wejima wawu akela iwu akwata chikasa chamukwawu, iwu akwata chikasa chamukwawu, chikasa chaniwu hichikunyamukila chikasa chamukwawu.

¹⁴Hela Yuda nawa wakalwa naYerusalema; akapompesha hamu maheta anyuza yejima yanyeŋumukaku, niwuru, nisiliva, niyuma yakuvwala, yakasweja kuvula nankashi.

¹⁵Chipupu chakawana atuwalu, nawayingonŋavalu, nawanŋameli, nawayimbulu, nawanyama ejima akekala muyilombu oyu chakekala neyi chipupu ichi.

¹⁶Nyuza yejima yakashala hanyuzoyu yenjili nakulwa naYerusalema, yakakandukaŋa hamwaka hamwaka nakudifukula kudi Mwanta, Yehova wamazaza, nakudya chawija chamuyisolu.

¹⁷Chisaka chahayisaka yahamaseki chakabula kukanduka kuYerusalema nakudifukula kudi Mwanta, Yehova wamazaza, hivakamona nvulaku.

¹⁸Neyi chisaka chawaEjipitu, chabula kwikala nanvula, chakaleka kukanduka nakushikaku, niwena nawa akamona chipupu chakababeshayi nachu Yehova nyuza yabulaŋa kukanduka nakudya chawija chamuyisolu.

¹⁹Mwenimu dimu mwakababeshelawu aEjipitu, dimu nawa mwakababeshelawu ninyuza yejima yabulaŋa kukanduka nakudya chawija chamuyisolu.

²⁰Dena ifuku odu hangezu jawatuwalu akasonekahu nawu, Wajila waYehova; manuŋu amwitala daYehova akekala neyi yeŋa yakumesu akameŋa yakunama,

²¹Ena, manuŋu amuYerusalema namuYuda ejima, akekala ajila aYehova wamazaza. Antu ejima akaketulaŋa yimuna akenzaŋa nakuyinona nakutelekamu. Dena ifuku odu himwakekala nawa cheŋi kaKenanimwitala daYehova wamazazaku.