Read MUKANDA WANZAMBI Zakaria 6 Bible Online

Zakaria 6 - MUKANDA WANZAMBI bible

Zakaria 6

¹Hinukufumbula cheŋi mesu ami, nami nitali, hinukumona makálu awana adi nakufuma mukachi kampidi jiyedi. Mpidi oju himpidi jawuneŋu.

²Ikalu dakusambila dadiŋi natuwalu tuchinana, ikalu damu chiyedi dadiŋi natuwalu twiyila;

³ikalu damu chisatu dadiŋi natuwalu tutooka; ikalu damu chiwana dadiŋi natuwalu twela nikutookoloka nikuchinana.

⁴Hinukwakula, hinukumwihula kaŋelu wadiŋi nakuhosha nanami, nami, Eyi Mwanta wami, yeniyi hiyumanyi?

⁵Kaŋelu hakwakula, hakuŋila nindi, Mpepela jamwiwulu jiwana jikwidika mujadiŋi nakwimana kumesu aMwanta weseki dejima.

⁶Ikalu dadiŋi natuwalu twiyila hidikwidika, hidikuya nakutalisha kwituŋa dakukabeta kakuchimunswa; niatooka hiyakwidika, hiyakuya nakulondela mwanayuwu wena; atookoloka hiyakwidika, hiyakuya nakutalisha kukabeta kakuchidiilu.

⁷Niachinana hiyakwidika, hiyakukeŋa kuya kulonda akata mbatambi mwahita iseki. Yena nindi, Fumenu kunu muyi nakutambatamba mwahita iseki. Dichi atambatambili mwahita iseki.

⁸Yena hakumbidika, hakuŋila nindi, Tiya, awa akuya nakutalisha kwituŋa dakukabeta kakuchimunswa, anawundishi dehi Spiritu yami mwituŋa dakukabeta kakuchimunswa.

⁹Izu daYehova denjili kudami,

¹⁰nindi, Kudi ayili muwukoli tambulakuku aHelidayi, naTobiya, naYedaya, anafumi dehi kuBabiloni, winzi ifuku dodimu, wiŋili mwitala damwana kaZefwaniya Yosiya.

¹¹Kudi wena wakatambuluku nisiliva niwuru, wakatuŋi chibaŋula, wakachishi hanamutu wakapristu muneni Yoshuwa mwana kaYehozadaki;

¹²wakahoshi nindi, neyi, Yehova wamazaza nahoshi nindi, Tala muntu wukweti ijina dindi mutayi; wakamenena muchipela chindi, wakatuŋa tembeli yaYehova.

¹³Yena diyi wakatuŋa tembeli yaYehova; wakekala nawukeleŋi, wakashakama nakuyula hetanda dindi dawanta; yena wakekala kapristu hetanda dindi dawanta, mukachi kawena ayedi mwakekala mpùŋa yakumwena.

¹⁴Oyu yibaŋula kudi aHelemi, naTobiya, naHedaya, naHeni mwana kaZefwaniya, yakekalaŋa yakwanuka nachu mutembeli yaYehova.

¹⁵Ninawa adi kwakulehi akenza nakutuŋa mutembeli yaYehova, ninenu mwakeluka nenu, Yehova wamazaza diyi nantemeshi kudenu. Chumichi chakamwekana neyi mwakovwahilaŋa izu daYehova Nzambi yenu chakushaku muchima.