Read MUKANDA WANZAMBI Zakaria 7 Bible Online

Zakaria 7 - MUKANDA WANZAMBI bible

Zakaria 7

¹Mumwaka wamwanta Dariyusa wamuchiwana, izu daYehova denjili kudi Zekariya, hefuku damu chiwana dakakweji kamuchitanu nachiwana, yowu kakweji Chisilevi.

²Henohu akwaBeteli atemesha dehi aSharezeri naReŋemi Meleki nawantu awu, akalembeleli wuselewa kudi Yehova,

³akahoshi nawatupristu amwitala daYehova wamazaza, nawatuprofwetu, nawu, Nidilaŋa mukakweji kamuchitanu nakudambula kwakanka wami, neyi chineli nyakiyi yayivulu, tahindi?

⁴Henohu izu daYehova wamazaza hidikwinza kudami,

⁵nindi, Hoshaku nawantu ejima amwituŋa, nawatupristu, neyi, Chimwajiŋilaŋa nanzala nakudila mukakweji kamuchitanu, nimukakweji kamuchitanu nachiyedi, munyakoyu makumi atanu nayedi, komana mwanjiŋililaŋa ami? Mwaŋilililaŋa ami?

⁶Chimwadyaloŋa nichimwanwaŋa, himwadidiilaŋa nakudinwina enu awenuku?

⁷Awa mazu abidikila ŋayi Yehova kutunwa twawatuprofwetu akusambila, hadiŋi Yerusalema wuchidi watuŋika, wuchidi wafuka, ninyikala yindi yichidi yatuŋatuŋa kwakwihi nayena, nimumpata yakukabeta kakuchidiilu, nimunkulu muchidi mwatuŋa antu, himwadi kuyitiyaku?

⁸Izu daYehova denjili kudi Zekariya,

⁹nindi, Tiya chanahoshiyi Yehova wamazaza, nindi, Sompeshenuŋa mwaya wuŋaji walala, mumwekeshi luwi nawushona, muntu namana kwindi, muntu namana kwindi.

¹⁰Bayi mukabishaŋa ntuluwa, hela nshona, hela mwenyi, hela kazweŋuku. Hadenu bayi hamwekana muntu wakutoŋojoka mana kwindi chuma chatama mumuchima winduku.

¹¹Ilaŋa wena alekeli kutiyilila, hiyakusekula kuchifwiji, hiyakujika mumatu awu kulonda abuli kutiya.

¹²Eŋa, akolesheli nyichima yawu neyi ilola dadiyamondi, kuchina kutiya nshimbi nimazu ayitemesheleliyi Yehova wamazaza naSpiritu yindi, kutunwa twawatuprofwetu akusambila. Dichi kudi Yehova wamazaza kwafumini ndombu yasweja.

¹³Yehova wamazaza nindi, Chatambikilaŋayi yena, wena kwonti kwawu kutiya, yena nawa nindi, Niwena akatambika, ami nawa hinakatiyaku.

¹⁴Nakayipalaŋesha nachinjimbi mukachi kanyuza yejima yabulili kwilukawu. Dichi ituŋa dasheli kwamahembi hohu, nimuntu wakuhitamu hela wakufuntamu kwosi; niituŋa dadiwahi hiyakudibalumuna kwamahembi.