Read MUKANDA WANZAMBI Zakaria 8 Bible Online

Zakaria 8 - MUKANDA WANZAMBI bible

Zakaria 8

¹Izu daYehova wamazaza denjili kudami,

²nindi, Yehova wamazaza nahoshi nindi, Namutiyili Ziyona mukawu wasweja, namutiyili mukawu wakulendumuka nankashi.

³Yehova nindi, Ami nafunti dehi kuZiyona, nukushakamaŋa muYerusalema. NiYerusalema akawutenaŋa, nawu mukala wansaŋu yalala, nimpidi yaYehova wamazaza akayitenaŋa, nawu mpidi yajila.

⁴Yehova wamazaza nindi, MuYerusalema mwakashakama cheŋi tushinakaji twamayala nitwawambanda, wejima wawu nanyikombu yawu kumakasa nakukula kwanakuluwu.

⁵Munyikwakwa yamumukala mwakenzala anyana amayala nawambanda nakuhemena munyikwakwa yawu.

⁶Yehova wamazaza nindi, Hela neyi chikwikala chuma chakuhayama kumesu awantu awa anashaluku mafuku awa, chiikali chuma chakuhayama kumesu ami, tahindi? Dimu mwanahoshiyi Yehova wamazaza.

⁷Yehova wamazaza nindi, Tiyenu, nakaamwina antu ami nikwituŋa dakumusela, nikwituŋa dakumujika.

⁸Nakayileta, akashakama muYerusalema, akekala antu ami, ninami nakekala Nzambi yawu, nimunsaŋu yalala, nimukuloŋa.

⁹Yehova wamazaza nindi, Enu mudi nakutiya mafuku awa mazu awa kutunwa twawatuprofwetu, kufumisha kwifuku daaliluwu chikuku chetala daYehova wamazaza kulonda atuŋi tembeli, koleshenu makasenu.

¹⁰Muloŋa hadiŋi mafuku owu achidi kanda, hikwadiŋi chakufweta muntu hela chakufwetela kanyamaku; hikwadiŋi hela kumwena kudi wukwidika hela kudi wukwijila ku, nansaŋu yachilumbu. Muloŋa nazuŋishili antu ejima, iwu nakuzuŋa namukwawu, iwu nakuzuŋa namukwawu.

¹¹Ilaŋa ichi dinu kudi antu awa anashaluku hinukwikala neyi chinadiŋi hakusambilaku. Dimu mwanahoshiyi Yehova wamazaza.

¹²Muloŋa kwakekala mbutu yakumwena; muvinyu wakasoŋa nyikabu yawu, iseki dakahana yakudya yadu, nimawulu akahana wuumi wawu; awa antu anashaluku nakayihetesha yuma yejimiyi.

¹³Enu akwamutaŋa waYuda, ninenu akwamutaŋa waIsarela, china chimwadiŋi ishiŋu mukachi kanyuza, dichi nawa nakayamwina, nakayibalumuna kwikala nkisu. Bayi mutiyaloŋa womaku, koleshenu makasenu.

¹⁴Muloŋa Yehova wamazaza nahoshi nindi, Munatoŋweli kuyikoŋa chatama hanvulokelaŋawu ankakulula jenu nizuwi, ami nawa kulekamu nchi;

¹⁵Yehova wamazaza nindi, Ichi dinu nukulekamu, mafuku awa natoŋoli dehi kukoŋa akwaYerusalema nawakwamutaŋa waYuda chachiwahi. Bayi mutiyaloŋa womaku.

¹⁶Tiyenu yuma yimwakelaŋa. Kahoshenuŋa yalala muntu namukwawu; kasompenuŋa muyota yenu wuŋaji walala wakuwunda.

¹⁷Muntu bayi atoŋojokaŋaa mukwawu yatama mumuchima winduku; bayi mukeŋaŋa kusanyika kwakutwambaku. Muloŋa yuma yejimiyi nayihela. Dimu mwanahoshiyi Yehova.

¹⁸Izu daYehova wamazaza denjili kudami,

¹⁹nindi, Tiyenu chanahoshiyi Yehova wamazaza, nindi, Kujiŋa nanzala kwamukakweji kamuchiwana, nikujiŋa nanzala kwamukakweji kamuchitanu, nikujiŋa nanzala kwamukakweji kamuchitanu nachiyedi, nikujiŋa nanzala kwamukakweji kekumi, kwakekalaŋa kudi akwamutaŋa waYuda kuluŋa nakutiya kuwaha, niyawija vakuzaŋajala; dichi keŋenu ninsaŋu yalala nikuwunda.

²⁰Yehova wamazaza nindi, Kwamba kenza nyuza yawantu, niakwakushakama munyikala yayivulu.

²¹Ashakama mukala wumu akayaloŋa kudi ashakama hamukala wukwawu, nakwila nawu, Tuyenu swayi twakalembeleli wuselewa wakudi Yehova, twakakeŋakeŋi Yehova wamazaza. Ninami nawa nukuya.

²²Mwalala antu amavulu, ninyuza yaŋovu, yakenza nakukeŋakeŋa Yehova wamazaza muYerusalema, nakulembelela wuselewa wakudi Yehova.

²³Yehova wamazaza nindi, Hamafuku owu ikumi dawamayala akunyuza yamadimi ejima, akakwata kwihina dakaYudeya, nawu, Tuyi nenu, Muloŋa tunatiyi nawu Nzambi mwekala nindi.