Read MUKANDA WANZAMBI Zakaria 9 Bible Online

Zakaria 9 - MUKANDA WANZAMBI bible

Zakaria 9

¹Wuprofwetu wezu daYehova wakutena ituŋa daHadaraki, nikuwunookelu windi kuDamakasa. Muloŋa mesu awantu nianyichidi yawaIsarela yejima yinatali kudi Yehova.

²NiHamati wakuma kuŋinza yawu; Tira naZidoni, muloŋa yena wasweja maana.

³Tira watuŋili chipaka chindi chakudikaŋila, walumbikili siliva neyi maseki, wuru wawuwahi neyi maseki amunyikwakwa achakata.

⁴Tiyenu, Yehova wakamumwaŋa, wakanata Ŋovu jindi mukaluŋalwiji, akamulasha kudi kesi.

⁵Ashekeloni wakachimona, wakatiya woma; niGaza nawa, chakamukatisha nankashi kumuchima; niEkeroni nawa, muloŋa wakatiya nsonyi mwadiŋi nakutalilayi. Mwanta walukanu wakanoŋeli kuGaza, kuAshekeloni hikwakashakama nawa muntuku.

⁶Muwanta wamuAshidodi mwakashakama mwana wamuchiputa, aFwilistinu nakayifumisha wanta wawu wadinkawu.

⁷Nakamufumisha nimashi indi adi mukanwa kindi, niyishimashima yindi yidi kumaji indi; kudi yena kwakashala antu aNzambi yetu, yena wakekala neyi chilolu muYuda, niEkeroni wakekala neyi kaYebusi.

⁸Itala dami nakadituŋala chilombu kwi-ndo, kulonda kubuli njita, kulonda kubuli antu kuhitamu hela kufunta. Himwakahita nawa cheŋi mukwakukabisha akwawuku. Muloŋa namoni dehi namesu ami katataka.

⁹Eyi mwana kaZiyona wamumbanda, zaŋalalaku chacheni; eyi mwana kaYerusalema wamumbanda, dikuwi. Tala, Mwanta weyi hakwinza kudeyi. Waloŋa, wukweti wamwinu; wadizoza, wudi nakwendela hachimbulu, hamwana kachimbulu.

¹⁰Ikalu dakuEfweremi nakadifumishahu, nikawalu kakuYerusalema, niwuta wamukunji wanjita nakayifumishahu; yena wakahosha nanyuza nsaŋu yakuwunda. Wanta windi wakafuma kukaluŋalwiji kamu wushika nikukaluŋalwiji kakwawu, wakafuma kuKaloŋa wushika nikunsa jeseki.

¹¹Hakwila eyi nawa ankoli jeyi nayipulwisha dehi muwina wakadi meji, namashi achitiyaŋenu cheyi.

¹²Enu ankoli jachikuhwelela, balumukenu mutali kuchipaka chakudikaŋila. Hela lelu nidi nakukuleja nami, Nukutkufuntishilamu kayedi.

¹³Muloŋa nevula dehi Yuda kulonda nisowi, naŋachikŋa dehi Efweremi muwuta; eyi Ziyona, nukusaŋumuna anyaneyi adasi nanyana keyeyi Heleni, nukukubalumuna kwikala neyi mpoku yakabali yachilobu.

¹⁴Akamumona Yehova hewulu dawu, nsewu yindi yidi nakuya neyi nzaji. Mwanta Yehova wakemba mpùŋa, wakaya nayinjimbi yakukabeta kakuchidiilu.

¹⁵Yehova wamazaza wakayilwila; akavwota, akadatola malola akwasa nachu nanyonji; akanwa, akabobola neyi antu anwaŋa vinyu. Akenzala neyi yikashi, akazowa neyi kumawombu atumeŋa.

¹⁶Hefuku odu Yehova Nzambi yawu wakayamwina neyi mukanka wanyikoku, wowu antu indi. Akekala neyi tumalola twakuchibaŋula tukukejima hewulu detuŋa dindi.

¹⁷Kuwaha kwindi o chikwasweja! Lubanji lwindi chilwasweja! Kudya kwakaluŋisha anyikwenzi, nivinyu yayiha yakaluŋisha yaloŋadima yawambanda.