Read MUKANDA WANZAMBI MATEU 1 Bible Online

MATEU 1 - MUKANDA WANZAMBI bible

MATEU 1

¹Iwu diwu mukanda wakujichika mavumu avwalikiliyi Yesu Kristu, mwana kaDavidi, mwana kaAbarahama.

²Abarahama wavweli Isaka; Isaka wavweli Yakoba; Yakoba wavweli Yuda niana kwindi;

³Yuda wavweli Perezi niZera naŋodindi Tamari; Perezi wavweli Hezeroni; Hezeroni wavweli Arama;

⁴Arama wavweli Aminadabi; Aminadabi wavweli Nashoni; Nashoni wavweli Salimoni;

⁵Salimoni wavweli Bowazi naŋodindi Rahaba; Bowazi wavweli Obedi naŋodindi Luti; Obedi wavweli Jesi;

⁶Jesi wavweli mwanta Davidi. Davidi wavweli Solomoni nanowu wadiŋi iŋoda Uriya;

⁷Solomoni wavweli Rehobowami; Rehobowami wavweli Abiya; Abiya wavweli Asa;

⁸Asa wavweli Yehoshafwati; Yehoshafwati wavweli Yehorami; Yehorami wavweli Uziya;

⁹Uziya wavweli Yotami; Yotami wavweli Ahazi; Ahazi wavweli Hezekiya;

¹⁰Hezekiya wavweli Manase; Manase wavweli Amoni; Amoni wavweli Yosiya;

¹¹Yosiya wavweli Yekoniya niana kwindi hayitweluwu kuBabiloni.

¹²Cheliluwu anayitwali dehi kuBabiloni, Yekoniya hakuvwala Sheyaleteli; Sheyaleteli wavweli Zerubabeli;

¹³Zerubabeli wavweli Abiyudi; Abiyudi wavweli Eliyakimi; Eliyakimi wavweli Azori;

¹⁴Azori wavweli Sadoki; Sadoki wavweli Akimi; Akimi wavweli Eliyudi;

¹⁵Eliyudi wavweli Eleyazari; Eleyazari wavweli Matani; Matani wavweli Yakoba;

¹⁶Yakoba wavweli Yosefu, nfumwaMariya wavweli Yesu atenaŋawu nawu Kristu.

¹⁷Dichi makiŋu ejima akufumisha kudi Abarahama nakushi ka kudi Davidi, makiŋu ikumi nawana; kufumisha kudi Davidi nakushi ka hayitweluwu kuBabiloni, makiŋu ikumi nawana; kufumisha hayitweluwu kuBabiloni nakushi ka kudi Kristu, makiŋu ikumi nawana.

¹⁸Tiyenu mwavwalikililiyi Yesu Kristu. Chamwoteluwu mama yindi Mariya kudi Yosefu, henohu kanda amusokeji, amuweni wudi nevumu dakudi Spiritu Wajila.

¹⁹Nfumwindi Yosefu wadiŋi muntu waloŋa, hakeŋeli kumusawisha kumesu awantuku, hakutoŋojoka nindi amulekeli kumbadi.

²⁰Ilaŋa chadiŋi nakutoŋojokayi yumiyi, kaŋelu kaYehova hakumwekana kudi yena mukulota nindi, Eyi Yosefu, mwana kaDavidi, bayi wutiya woma wakutambula iŋodeyi Mariyaku; muloŋa idi ivumu danabaabiyi dakudi Spiritu Wajila.

²¹Yena wakavwala mwana weyala; eyi wakanamutumba ijina dindi neyi, Yesu; muloŋa yena diyi wakaamwina antu indi kunyiloŋa yawu.

²²Elili mwejimimu kulonda mwahosheliyi Yehova mudi kaprofwetu mwakalumbuluki,

²³mweliliyi nindi, Tiyenu, mujiki wakabaaba ivumu, wakavwala mwana weyala, akanamutumba ijina dindi nawu, Emanuweli; daya mukwila nawu, Nzambi wudi nanetu.

²⁴Yosefu hakuhinduka namutulu, hakwila mwamulejeluwu kudi kaŋelu kaYehova, hakutambula Iŋodindi.

²⁵Hadimweni ninduku, kudi mona nindi chiŋa navwali dehi mwana weyala; hakunamutumba ijina dindi nindi, Yesu.