Read MUKANDA WANZAMBI MATEU 10 Bible Online

MATEU 10 - MUKANDA WANZAMBI bible

MATEU 10

¹Hakutambika atumbanji twindi ikumi nayedi, hakuyinka wanta wakufumisha ademoni azonda, niwakuuka nyisoŋu yejima niyikatu yejima.

²Tiyenu majina anowu apostolu ikumi nayedi: watachi Shimona, atumbiluwu nawu Petulu, namana kwindi Anderi; mwana kaZebedewu Yakoba, namana kwindi Yowanu;

³Fwilipu naBatolomewu; Tomasi nansonkeshi Matewu; mwana kaAlafwewu Yakoba, naTadewu;

⁴mukwaKenani Shimona, naYudasi Isakaroti, diyi wamufukejeli nawa.

⁵Yesu hakutemesha wenawa ikumi nayedi, hakuyileja nindi, Bayi muya munjila jawaJentili, hela kwijila mumukala wawaSamariyaku;

⁶chiŋa kuya kudi anyikoku amutaŋa waIsarela ajimbala.

⁷Chimukuya, muyaloŋa nakushimuna nenu, Wanta wamwiwulu wudi kwakwihi.

⁸Kayukenu akata, kasaŋulenu afu, katookeshenu akwambumba, kafumishenu ademoni. Kutambula, munatambuli chamukunkulu; kuhana, kahanenu nawa chamukunkulu.

⁹Bayi mudikeŋela hela wuru, hela siliva, hela wuneŋu muyikwama yenuku;

¹⁰hela ipakumuna dakuya nachu munjila yenu, hela tuhuma tuyedi, hela nkwabilu, hela mbwechi nehi, muloŋa mukwakukalakala watela yakudya yindi.

¹¹Nimunyikala yejima yimwakeŋa ila, hela yeneni, hela yanyanya, mwakakeŋakeŋamu yowu wudumu watela, kwoku kumwakashakama nichimwakafumaku.

¹²Chimwakeŋa ila mwitala mwakemwisha akwetalodu.

¹³Neyi akwetalodu atela, kuwunda kwenu kwakekalumu; ilaŋa neyi hiyatelaku, kuwunda kwenu kwakayifuntili cheŋi.

¹⁴Yowu wakabula kuyitambula hela kutiyilila mazu enu, chimwakafuma mwitalodu, hela mumukalowu, wakadikumuna lunkuŋu ludi kunyendu yenu.

¹⁵Nukuyileja chalala nami, hefuku dakusompesha ihuŋu detuŋa daSodoma naGomora dakakuminamu, damukalowu dakabadika.

¹⁶Tiyenu, hinukuyitemesha neyi anyikoku mukachi kawatuŋiwidi, dichi ikalenu nama ana neyi atupela, kuwunda wundenu neyi atutela.

¹⁷Hakwila antu yibabelenu, muloŋa akayihana kuyota, akayivupola mumashikolawu;

¹⁸mwamweni, akayitwala ni kumesu awanguvulu, ni kumesu awanyanta, kukoola nsaŋu yamami, kulonda chakayilili wunsahu niwena niaJentili.

¹⁹Ilaŋa chakayihanawu kudi antu, bayi mwakaakama nenu tukuhoshadi? hela nenu tukuhosha mazwinyuku? Muloŋa akayinka mazu akuhosha yoyena mpinji oyu.

²⁰Muloŋa hiyenu mwakahoshaku, Spiritu yaTata yenu diyi wakahosha mudenu.

²¹Muntu wakahana mana kwindi kudi akwawu akamujahi, nitata yawantu wakahana mwanindi; nianyana akanyamukila anvwali jawu nakuyijahisha.

²²Ninenu akayihela kudi antu ejima kukoola ijina damami; ilaŋa muntu wakakakela nikunsa diyi wakahanda.

²³Chakayikabishawu mumukala wumu mwakatemukila mumukala wukwawu; muloŋa nukuyileja chalala nami, chakenzayi Mwana kamuntu, yena wakawana kanda muhiti munyikala yawaIsarela yejima.

²⁴Kambanji habadikaŋa nkuluŋaŋa yinduku, hela nduŋu habadikaŋa nkaka yinduku.

²⁵Kambanji wukukumina dakwesekana nankuluŋaŋa yindi, ninduŋu wukwesekana nankaka yindi. Neyimwanta wetala anamuteni nawu Belezebuli; indi akwetala dindi hiyakubadika kuyitena chochochuku?

²⁶Dichi bayi muyitiyaloŋa womaku; muloŋa hikwekala chuma chabutaŋawu chikubula kujikukaku, hela chajindaŋawu chikubula kutiyakanaku.

²⁷Chuma chinukuyilejela mumwidima, chihoshelenu hamwaana; chuma chimukutiyila mwitu, chibidikilenu hamawulu amatala.

²⁸Dichi bayi mutiyaloŋa woma ajahaŋa mujimbaku, hiyanatweshi kujaha muntu wamukachuku; ilaŋa tiyenu woma yena natweshi kukisaŋana nimuntu wamukachi nimujimba mukaluŋa kachinana.

²⁹Tujila twanyanya tuyedi hiyatulandishaŋa nakadaluku? Hosi kakajila kamu kaholokelaŋa heseki chakadi Tata yenuku;

³⁰Ilaŋa ninsuki jakunyitu yenu jajeni ajichinda dehi jejima.

³¹Dichi bayi mutiyaloŋa womaku; enu mwalema chakubadika tujila twatuvulu.

³²Dichi yowu wakaŋiteja kumesu awantu, ninami nawa nakamwiteja kumesu aTata yami wudi mwiwulu.

³³Ilaŋa yowu wakadikalami kumesu awantu, ninami nawa nakadikalayi kumesu aTata yami wudi mwiwulu.

³⁴Bayi mutoŋojoka nenu nenzi nakuleta kumwena hanu hesekuku, hinenzi nakuleta kumwenaku, chiŋa mpoku yakabali.

³⁵Muloŋa nenzi nakwambula iyala natata yindi, mwana wamumbanda namama yindi, nimuku windi wamumbanda namuku windi wamumbanda.

³⁶Akwankunyi namuntu akekala wowu amwitala dindi yomweni.

³⁷Muntu wakeŋa a tata yindi hela mama yindi chakubadika chankeŋayi ami, hananteli amuku; niwakeŋa a mwanindi weyala, hela mwanindi wamumbanda chakubadika chankeŋayi ami, hananteli amuku.

³⁸Muntu wukubula kunona kulusu yindi nakunlondami, hananteli amuku.

³⁹Muntu wukumona wumi windi wakawujimbesha; niwukujimbeshela wumi windi hansaŋu yamami wakawumona.

⁴⁰Muntu wukuyitambulenu nantambulami, muntu wukuntambulami natambuli niyena wantemesheli.

⁴¹Muntu wukutambula kaprofwetu hansaŋu yejina dakaprofwetu, wakatambula wufwetu wakaprofwetu; wukutambula muntu waloŋa hansaŋu yejina damuntu waloŋa, wakatambula wufwetu wamuntu waloŋa.

⁴²Yowu wukwinka iwu wanyanya wumu lupasa lwameji atuuta hansaŋu yejina dakambanji, nukuyileja chalala nami, hakabula wufwetu winduku.