Read MUKANDA WANZAMBI MATEU 11 Bible Online

MATEU 11 - MUKANDA WANZAMBI bible

MATEU 11

¹Chelili Yesu nakumishi dehi kulejaleja atumbanji twindi ikumi nayedi, hakufuma kwenoku hakuya nakuleja antu, nikushimuna munyikala yawu.

²Dichi Yowanu chanatiyiyi omu mukaleya nyidimu yaKristu, hakutemeshaku atumbanji twindi,

³nakumwila nindi, Eyi yeyi elaŋawu nawu wakenza, tahindi tutalili wacheŋi?

⁴Yesu hakuyakula nindi, Yenu mumuleji Yowanu yuma yimunatiyi niniyi yimunamoni.

⁵Amputamesu hiyakutona, akwakubalakata hiyakwenda, akwambumba hiyakutooka, ajika matu hiyakutiya, afu hiyakuyisaŋula, atuzweŋi hiyakuyishimwina nsaŋu yayiwahi.

⁶Muntu wukubula kumona mudami chuma chakumudimbwisha, nakooleki.

⁷Chadiŋi nakuyawu, Yesu hakutachika kutenena mazaza awantu nsaŋu yaYowanu, nindi, Mwayili mwisaŋa nakutaladi? Iteti datepokaŋa nampepela, tahindi?

⁸Indi mwayili nakumonadi? Muntu navwali yayiwahi, tahindi? Avwalaŋa yayiwahi ekalaŋa mumatala awanyanta.

⁹Indi mwayililidi? Nakumona kaprofwetu, tahindi? Mwamweni, nukuyileja nami yena wabadika nankashi mukaprofwetu.

¹⁰Diyi yeniwu asonekeluwu nawu, Talenu, hinukutemeshaŋahu dehi ntemesha yami kuwukuya, akakuloŋeshelaŋahu dehi njila yeyi.

¹¹Nukuyileja chalala nami, hadi antu anavwaliki kudi ambanda, hikunamwekani nabadiki Yowanu Mpapatishuku; hela chochu, nakehi muwanta wamwiwulu namubadiki yena.

¹²Kufumisha kumafuku aYowanu Mpapatishu nakushi ka kumafuku anu akatataka, wanta wamwiwulu adi nakuwukwata naŋovu nankashi, awukwataŋa naŋovu kudi akwaŋovu.

¹³Muloŋa atuprofwetu ejima ninshimbi aprofweteli kushika nikudi Yowanu.

¹⁴Dichi neyi munakeŋi kwitejamu, yena diyi Elija mwatiyaloŋa nawu wukwinza.

¹⁵Yowu wukweti matu akutiya, atiyi.

¹⁶Chisakichi nukuchifwikija nachumanyi? Chinafwani neyi atwansi anashakami kuwulandilu,

¹⁷enda atambika akwawu nawu, Tunayimbili mapeleli, enu kuhaŋana nehi; tunatumpi, enukudishonanehi.

¹⁸Yowanu wenjili nákubula kudya hela kunwa, nawu, Wukweti demoni.

¹⁹Mwana kamuntu nenzi nakudya nakunwa, nawu, Talenu muntu wafwa hakudya, wasweja kunwa walwa, ibwambu dawansonkeshi nawakwanshidi! Maana alumbulukaŋa nanyidimu yawu.

²⁰Henohu hakutachika kuhoshola nyikala yelililiyi nyidimu yindi yaŋovu yayivulu, nanochu chabuliluwu kubalumuka munyichima.

²¹Nindi, O yihuŋu yiwakamoneyi Korasi! Oyihuŋu yiwakamoneyi Beteseda! Muloŋa nyidimu yaŋovu yeliluwu mudenu, neyi ayililili muTira naZidoni, mutenowu abalumukili munyichima nakuvwala masaka nikudisukwila mawuti.

²²Ilaŋa enu nukuyileja nami, hefuku dakusompesha yihuŋu yaTira naZidoni yakakuminamu, yenwenu yakabadika.

²³Nineyi Kaperinawu, akakutúumbakesha chakushika nikwiwulu, tahindi? Wakakunkumuka mukaluŋa; muloŋa nyidimu yaŋovu yelililuwu mudeyi, neyi ayililili muSodoma mutenowu wudi kwoku nilelu.

²⁴Ilaŋa enu nukuyileja nami, hetaŋwa dakusompesha yihuŋu yaSodoma yakakuminamu, yeyeyi yakabadika.

²⁵Hamafuku owu Yesu hakwila nindi, Eyi Tata, Mwanta wewulu niiseki, nakusakilili chiwajindili yumiyi kudi akwamaana nikudi ashinshika, hiwukuyimwekesha kudi anyikeki.

²⁶Mwamweni Tata, dichi chiwamweni kuwaha.

²⁷Ananyinki yuma yejima kudi Tata yami. Kwosi muntu wamwiluka Mwanaku, chiŋa yowu Tata; kwosi nawa wamwiluka Tataku chiŋa yowu Mwana, nianakeŋiyi Mwana kuyimwekeshela.

²⁸Inzenu kudami enu ejima mudi nakukabakana, mwasenda yalema, ami nukuyinookesha.

²⁹Ditwikenu mpanda yami, mudizili kudami muloŋa ami nawunda, nadizoza mumuchima, ninenu mukumona kuno-oka munyichima yenu.

³⁰Muloŋa mpanda yami yaswayi, nichisenda chami chapepela.