Read MUKANDA WANZAMBI MATEU 12 Bible Online

MATEU 12 - MUKANDA WANZAMBI bible

MATEU 12

¹Hamafuku owu Yesu wahitili mumaha atidiku hasabata; atumbanji twindi chanatiyuwu nzala, hiyakutachika kukotola nyitu yatidiku, hiyakudya.

²AFwarisi chanachimonuwu, hiyakumwila nawu, Tala, atumbanji tweyi hiyakwila chuma chajila kwila hasabata.

³Yena hakuyila nindi, Himunataŋi cheliliyi Davidi hatiyiliyi nzala hamu nanowu adiŋiyi nawuku?

⁴Hepililiyi mwitala daNzambi, hadiiliyi mankendi akutenteka kumesu aNzambi, adiŋi ajila kuyidya kudi yena ninowu adiŋiyi nawu, yawatupristu hohu.

⁵Himunataŋi munshimbi mwelawu nawu atupristu ajilolaŋa sabata mutembeli chakadi hakuyinkela muloŋaku?

⁶Nukuyileja nami kunu kudi wabadika tembeli.

⁷Neyi mwadiŋi mweluka mwaya mazu elawu nawu, Nakeŋa luwi, hinakeŋa chimuna chakuketulaku; himwadi kuhishaŋa muntu wakadi muloŋaku.

⁸Muloŋa Mwana kamuntu diyi Mwanta wasabata.

⁹Hakufuma kwenoku, hakwijila mushikola yawu.

¹⁰Kutala mudi muntu wukweti chikasa chawulepa. Hiyakumwihula nawu, Kúuka muntu hasabata chaloŋa, tahindi? kulonda amwinki muloŋa.

¹¹Yena hakuyila nindi, Hadenu hadinyi wukwila neyi mukoku windi wumu naholokeli mwibuku hasabata, abula kumukwata anamutupulumu?

¹²Muntu wabadika mukoku kulema nankashi! Dichi kwila chachiwahi hasabata chaloŋa.

¹³Hakumwila owu muntu nindi, Ololaku chikasa cheyi. Hakucholola; chinakoli dehi ngu neyi chikwawu.

¹⁴AFwarisi hiyakwidikamu hiyakukwata mpùŋa yakumujaha.

¹⁵Yesu chanachilukiyi hakufuma kwenoku, antu amavulu hiyakumulondela, hakuyikolesha wejima wawu.

¹⁶Hakuyileja naŋovu nindi bayi muntiyakeshaku;

¹⁷kulonda mwahosheliyi kaprofwetu Isaya mulumbuluki,

¹⁸mweliliyi nindi, Talenu kambuŋami inatondi, wami nakeŋa nankashi; muchima wami watiyaloŋa kuwaha chacheni mudi yena. Nakasha Spiritu yami hadi yena, wakashimwina aJentili kusompa.

¹⁹Hakatadikaŋa hela kubilelaku; hela izu dindi hosi wakaditiya munyikwakwaku.

²⁰Iteti dachikeka hakadikotolaku; wanda wudi nakufwinda wishi hakawujimaku, nichichakashikŋayi kusompa hakwimika mushindu.

²¹AJentili akakuhwelela ijina dindi.

²²Henohu hiyakumuletela muntu wazakukaŋa demoni, wela niwuputamesu, niwumama; hakumúuka kuuka kwakwila owu kamama hakuhosha nikumona.

²³Mazaza awantu ejima hiyakuhayama nankashi nawu, Yeniwu diyi mwana kaDavidi, tahindi?

²⁴AFwarisi chanachitiyuwu hiyakwila nawu, Iwu muntu hafumishaŋa demoni naŋovu jinduku, wayifumishaŋa naŋovu jamwanta wawademoni Belezebuli.

²⁵Yesu welukili yitoŋojoka yawu, hakuyila nindi, Mawanta ejima akudambula, akushala kwamahembi; ninyikala yejima hela matala akudambula, hiyakukolaku.

²⁶Satana neyi wukufumisha yomweni Satana nadambuli dehi; wantawindi wukukola ŋahi?

²⁷Neyi ami nafumishaŋa demoni naŋovu jaBelezebuli, indi anyanenu ayifumishaŋa naŋovu janyi? Dichi wena diwu akayisompesha.

²⁸Hakwila neyi ami nafumishaŋa demoni naSpiritu yaNzambi, komana wanta waNzambi wunayiwani dehi.

²⁹Indi muntu wukutwesha kwijila ŋahi mwitala damukwaŋovu nakubuwa yuma yindi, chiŋa yosambila kumukasa owu mukwaŋovu? nkumininaku hakubuwa mwitala dindi.

³⁰Wabulaŋa kwikala chimu nanami hichilumbu chami; niwabulaŋa kupompesha chimu nanami wapalaŋeshaŋa.

³¹Dichi nukuyileja nami nyiloŋa yejima nimatuka akatu kaNzambi ejima, akayanakena antu; hakwila matuka akunamutuka Spiritu hiyakayanakenaku.

³²Dichi muntu wukuhosha mazu akumusoŋelela Mwana kamuntu, akamwanakenawu; hakwila muntu wukuhosha chakumusoŋelela Spiritu Wajila, hiyakamwanakenachuku, hela makonu, hela kunyaka yamba kenza.

³³Mutondu chiŋa wikala wawuwahi, ninyikabu yawu yikuwaha; neyi wukwi kala watoka, ninyikabu yawu yikutoka; muloŋa mutondu awilukilaŋa kunyikabu yawu.

³⁴Enu anyana katubandayula, enu atama, mukutwesha kuhosha ŋahi yuma yayiwahi? Muloŋa kanwa kahoshaŋa yuma yinalumbami mumuchima.

³⁵Muntu muwahi wukwidisha yuma yayiwahi kuyuma yindi yayiwahi; nimuntu watama wukwidisha yuma yatama kuyuma yindi yatama.

³⁶Dichi nukuyileja nami mazu akuhemesha ejima akuhosha antu, amba kashimunamu hetaŋwa dakusompesha.

³⁷Muloŋakakuyiŋisha namazu eyi, akakuhisha namazu eyi nawa.

³⁸Henohu ansoneki amakwawu niaFwarisi hiyakumwakula nawu, Eyi Nkuluŋaŋa, tunakeŋi tumoni chinjikijilu chiwukwila.

³⁹Yena hakuyakula nindi, Chisaka chatama chawuvumbi hiyakukeŋa chinjikijilu; hiyakayinka chinjikijiluku, chiŋa chinjikijilu chakaprofwetu Yona.

⁴⁰Muloŋa chadiŋiyi Yona mwivumu danshi muneni mafuku asatu, nimwaana niwufuku, dichi chakekala ni mwana kamuntu mukachi kamaseki mafuku asatu, nimwaana niwufuku.

⁴¹Antu akuNineve amba kemana nakuhisha antu achisakichi hakusompesha; muloŋa wena abalumukili munyichima hayishimwininuwu kudi Yona; talenu, kunu kudi wabadika Yona.

⁴²Mwanta wamumbanda wakukabeta kakuchidiilu wamba kemana nakuhisha antu achisakichi hakusompesha, muloŋa yena wafumini kwakumina maseki enzi nakutiya maana aSolomoni; talenu, kunu kudi wabadika Solomoni.

⁴³Demoni wazonda chakufumayi mudi muntu, wukuhitahita mwamuvulu mwakadi meji nakukeŋakeŋa kwakunookela.

⁴⁴Chakukaŋanyayi nindi, Tali nifunti mwitala dami munafumini. Chakwinzayi, kuwana mwamukunkulu, anakombumu, anapoŋomwenumu dehi.

⁴⁵Hakuya nakukeŋelaku ademoni amakwawu atanu nayedi, abadika yomweni kutama, hiyakwijila mu, hiyakushakamamu; kukuminina kwanowu muntu kukubadika kutama hadiŋiyi hakusambila. Dimu nawa mwakekalila ichi chisaka chatama.

⁴⁶Iku wuchidi kuhosha namazaza awantu, kutala mama yindi nawana kwindi anemani hanzi, anakeŋi kuhosha nayena.

⁴⁷Muntu wumu hakumwila nindi, Tala, mama yeyi nawana kweyi, awa anemani hanzi awa, anakeŋi kuhosha naneyi.

⁴⁸Yena hakwakula owu muntu wamulejeli nindi, Mama yami hinyi? Ana kwami anyi?

⁴⁹Hakwolola chikasa chindi kudi atumbanji twindi nindi, Talenu mama yami, niana kwami!

⁵⁰Muloŋa yowu wukwila muchima waTata yami wudi mwiwulu, diyi mana kwami, diyi muhelami, diyi mama yami.