Read MUKANDA WANZAMBI MATEU 13 Bible Online

MATEU 13 - MUKANDA WANZAMBI bible

MATEU 13

¹Ifuku dodenodu Yesu hakwidika mwitala, hakushakama kuchi kumu chejiya.

²Mazaza awantu hiyakumupompela, dichi hakwijila nakushakama muwatu; izaza dejima hidikwimana kuchi kumu.

³Hakuhosha nawu yuma yayivulu nayishimu, nindi, Talenu, mukwakukuwa mbutu wayili nakukuwa.

⁴Chakuwiliyi jikwawu jaholokeleli kunsa yanjila; atujila hiyakwinza nakujidya.

⁵Jikwawu jaholokeleli hamalola, habulili maseki amavulu; jibaluka nihohenohu, muloŋa habulili maseki amavulu kwishina.

⁶Itaŋwa chidinashiki mwiwulu hijikubabika, hijikuuma muloŋa jabulili nyiji.

⁷Jikwawu jaholokeleli munyiŋa; oyu nyiŋa hiyikukula, hiyikujika mbutu.

⁸Jikwawu jaholokeleli hamaseki amawahi; hijikusoŋa mbutu, jikwawu nkulakaji, jikwawu makumi atanu nadimu, jikwawu makumi asatu.

⁹Yowu wukweti matu akutiya, atiyi.

¹⁰Atumbanji hiyakwinza nakumwila nawu, Wahoshelaŋadi nawu nayishimu?

¹¹Yena hakuyakula nindi, Enu anayiteji kwiluka nsaŋu jawanta wamwiwulu jajindawu, hakwila wena hiyanayitejuku.

¹²Wukweti akamwinka, wakaheta yayivulu; hakwila wabula akamutambula ninaka kadiyi naku.

¹³Dichi nahoshaŋa nawu nayishimu; muloŋa chamonaŋawu hiyamonaŋaku, chatiyaloŋawu hiyatiyaloŋaku, hela kwiluka hiyelukaŋaku.

¹⁴Hansaŋu yawena, wuprofwetu waIsaya wunalumbuluki, weliliyi nindi, Kutiya mwakatiya, himwakashinshika nihantuku; kumona mwakamona, himwakeluka nihantuku.

¹⁵Muloŋa antu awa nyichima yawu anayisupishi, nimatu awu anajiki, nimesu awu anajimi; akenda kamona namesu awu, akenda katiya namatu awu, akenda kashinshika munyichima yawu; kuchina kubalumuka cheŋi hinukuyuka.

¹⁶Hakwila mesu enwenu anakooleki, muloŋa amonaŋa; nimatu enu, muloŋa atiyaloŋa.

¹⁷Muloŋa nukuyileja chalala nami, atuprofwetu amavulu niantu aloŋa akeŋeli nawu amoni yumiyi yimukumonenu, hiyayimwenuku; nawu atiyi yuma yimukutiyenu, hiyayitiyiluku.

¹⁸Dichi tiyenu chishimu chamukwakukuwa.

¹⁹Muntu wukwila chakutiyayi mazu awanta, yena kumulumbulukila nehi, watama hakwinza nakuhukula yanakuwuwu mumuchima windi. Diyi anakuwuwu kunsa yanjila.

²⁰Anakuwuwu hamalola diyi wukwila chakutiyayi mazu, hakuyitambula namuzaŋalu hohenohu;

²¹ilaŋa hakweti muji mudi yomweninduku, wukukakelahu chanti, chikukwinza lukadi hela ikabisha dahansaŋu yamazu, hohenohu yodimbuka nikudimbuka.

²²Anakuwuwu mukachi kanyiŋa, diyi muntu wukwila chakutiyayi mazu, kwakama kwamakonu nikudimbana kwamaheta hikukuvumbisha mazu, niyena wukwi kala wakasoŋaŋa.

²³Anakuwuwu hamaseki amawahi, diyi muntu wukwila chakutiyayi mazu, hiyakumulumbulukila; chalala diyi wukusoŋa, iwu nkulakaji, iwu makumi atanu nadimu, iwu makumi asatu.

²⁴Hakuyitila chishimu chikwawu nindi, Wanta wamwiwulu wudi neyi muntu wakuwili mbutu yayiwahi mwiha dindi.

²⁵Ilaŋa ntu chakaminuwu tulu, mukwankunyi nindi hakwinza nakukuwa mbutu yamatahu mukachi katidiku, hakudiyila kwindi.

²⁶Ilaŋa chabalukili nyitombu hiyikusakumuna, matahu hiyakumwekana nawa.

²⁷Aŋamba jamwiniitala hiyakwinza nakumwila nawu, Mwanta, hiwakuwili mbutu yayiwahi mwiha deyuku? ndochu matahu anafumihi?

²⁸Yena hakuyila nindi, Anachili kudi mukwankunyi nami. Aŋamba hiyakumwila nawu, Wunakeŋi tuyi nakuyikuŋulamu, tahindi?

²⁹Ilaŋa yena nindi, Nehi, mwakenza kela chimukukuŋulamu matahu, mukubwitila kumu nitidiku.

³⁰Jikulili tuhu kumu jejima nihakumuna; hachila aka chakumuna nakayila akwakumuna nami, Sambilenu kukuŋulamu matahu, muyikasi yita mwakayochi; hakwila tidiku muyiku-ŋwili munkalaŋa yami.

³¹Hakuyitila chishimu chikwawu nindi, Wanta wamwiwulu wudi neyi kalubutu kamostadi kamu kanoneni muntu, hakukatumba mwiha dindi;

³²chalala diku kalubutu kakuminamu kukeha hambutu jejima, ilaŋa chikakukula hikakubadika yisakola yejima, hikakwikala mutondu hindi, wakwila niatujila ahaluzwizu hiyakwinza nakutuŋila yisakala yawu kunyitayi yawu.

³³Hakuyitila chishimu chikwawu nindi, Wanta wamwiwulu wudi neyi iluŋi danoneni mumbanda, hakusha mumabaŋu awuŋa asatu, wuŋa wejima winila niiluŋi.

³⁴Yesu walejeli mazaza awantu yuma yejimiyi nayishimu hohu; hayileŋa jeli chakadi chishimuku;

³⁵kulonda mwahosheliyi kaprofwetu mwakalumbuluki, mweliliyi nindi, Nakahosha nayishimu, nakahosha yuma yajindiluwu kufumisha haaliluwu chikuku champata yamunu mwishina.

³⁶Henohu hakushiya mazaza, hakwijila mwitala. Atumbanji twindi hiyakwinza kudi yena nawu, Tulumbulwili chishimu chamatahu amwiha.

³⁷Hakuyakula nindi, Wakuwaŋa mbutu yayiwahi diyi Mwana kamuntu;

³⁸iha diyi mpata yamunu mwishina; mbutu yayiwahi diwu anyana kawanta; matahu diwu anyana kawatama;

³⁹mukwankunyi wayikuwili diyi diyabolu; kumuna dihu hamba kakuma nyaka yinu; akwakumuna wowu aŋelu.

⁴⁰Chakuŋulaŋawu matahu nakuyocha mukesi, dichi chichakela nihamba kakuma nyaka yinu.

⁴¹Mwana kamuntu wakatemesha aŋelu jindi akafumishi muwanta windi yuma yadimbwishaŋa yejima, nialuwaŋa.

⁴²Akayinatila muluteŋi lwakesi, mwakekala kudila nakudisumona kumaji.

⁴³Henohu aloŋa akatoŋeka muwanta waTata yawu neyi itaŋwa. Yowu wukweti matu akutiya atiyi.

⁴⁴Wanta wamwiwulu wudi neyi chuma chalema wuseya chaswekawu mwiha, chanachiwanuwu kudi muntu hakuchisweka; namuzaŋalu watiyiliyi hakuya nakulandisha yuma yadiŋiyi nayu yejima, hakulanda ihodu.

⁴⁵Cheŋi nawa, wanta wamwiwulu wudi neyi mukwakulandisha wudi nakukeŋakeŋa mperola jajiwahi.

⁴⁶Chanawaniyi mperola yimu yasweja kulema wuseya, hakuya nakulandisha yuma yadiŋiyi nayu yejima, hakuyilanda.

⁴⁷Cheŋi nawa, wanta wamwiwulu wudi neyi wanda walalumwinuwu mukaluŋalwiji, hiyakupompeshelamu yanyichidi yejima.

⁴⁸Chiwunenzali mbe, hiyakuwukokela kuchi kumu; hiyakushakama, hiyakupompeshela yayiwahi mumabaŋu, yatama hiyakuyinata.

⁴⁹Dichi chichakela nihamba kakuma nyaka yinu; aŋelu amba kenza nakwambula atama kudi aloŋa.

⁵⁰Amba kayinatila muluteŋi lwakesi, mwamba kekala kudila nakudisumona kumaji.

⁵¹Yuma yejimiyi yinayilumbulukili, tahindi? Hiyakumwila nawu, Eŋa.

⁵²Yena hakuyileja nindi, Dichi ansoneki ejima analejuwu yawanta wamwiwulu, adi neyi mukwetala wukwidisha yuma yindi yalema yaswekeliyi, niyayiha niyayikulu.

⁵³Cheliliyi Yesu nakumishi dehi yishimu iyi, hakufuma kwenoku.

⁵⁴Chanenziyi mwituŋa dindi yomweni, hakuyileja mushikola yawu; hiyakuhayama nankashi nawu, Iwu muntu, awa maana niniyi nyidimu yaŋovu nayiwanihi?

⁵⁵Hidiyi mwana kamukwakusoŋaku? Mama yindi hiyamutcnaŋa nawu Mariyaku? Ana kwindi hidiwu aYakoba naYosesi naShimona niYudaku?

⁵⁶Niahelindi hitudi nawu wejima wawuku? Indi iwu muntu, iyi yuma yejimiyi nayiwanihi?

⁵⁷Hiyakumona mudi yena chuma chakuyidimbwisha. Ilaŋa Yesu hakuyila nindi, Kaprofwetu hiyamudiwulaŋaku, kumudiwula chiŋa mwituŋa dindi yomweni, nimwitala dindi yomweni.

⁵⁸Chelili wena kwitiya nehi, yena nawa kwila nyidimu yaŋovu yayivulu kwenoku nehi.