Read MUKANDA WANZAMBI MATEU 14 Bible Online

MATEU 14 - MUKANDA WANZAMBI bible

MATEU 14

¹Wena mwakowu nguvulu Herodi hakutiya mpuhu yaYesu;

²hakuyila aŋamba jindi nindi, Diyi Yowanu Mpapatishu, nasaŋukimudi afu, dihu hanafumi kukoŋa nyidimu iyi yaŋovu mudi yena.

³Muloŋa henohu Herodi wamukwata dehi Yowanu, wamukasa dehi, wamusha dehi mukaleya hansaŋu yaHerodiya iŋodamana kwindi Fwilipu.

⁴Muloŋa Yowanu wamwilili nindi, Chinjila eyi kwikala nindi.

⁵Chakeneliyi kumujaha, hakutiya woma wezaza dawantu, muloŋa amutoŋojokeli nawu hikaprofwetu.

⁶Ilaŋa chashikili itaŋwa dakwanuka kuvwalika kwaHerodi, mwana kaHerodiya wamumbanda hakuhaŋana mukachi kawu, hakumutiyisha Herodi kuwaha.

⁷Henohu hakumukana chakusanyika nindi, Nukukwinka yejima yiwukulomba.

⁸Niyena amuleja dehi kudi mama yindi nindi, Nyinki kunu namutu waYowanu Mpapatishu hacheŋa.

⁹Mwanta hakuneŋa, ilaŋa ochu cheliliyi yena nasanyiki dehi, ninowu ashakamayi nawu nakudya, hakuyileja antu nindi, Mwinkenuwu.

¹⁰Hakutemesha antu, hiyakumuketula Yowanu namutu omu mukaleya.

¹¹Mutu windi hiyakuwuletela hacheŋa, hiyakumwinkawu owu mwana wamumbanda, yena hakuwutwala kudi mama yindi.

¹²Atumbanji twindi hiyakwinza nakunona chivuvuma, hiyakuchiika, hiyakuya nakumulejamu Yesu.

¹³Yesu chanachitiyiyi, hakufuma kwenoku muwatu, hakuya mwisaŋa mwakanka wawu. Mazaza awantu chanachitiyuwu, hiyakufumafuma munyikala yamaneni, hiyakumulondela hamaseki.

¹⁴Yesu hakwidika, hakumona izaza deneni, hakuyitiyila wushona, hakuuka antu awu akata.

¹⁵Chikuneli melela, atumbanji hiyakwinza kudi yena nawu, Munu mwisaŋa mwaana wunahiti dehi; yili awa mazaza ayi kwawu, akapawuli yakudya yawu munyikala.

¹⁶Ilaŋa Yesu hakuyila nindi, Akuyiladi? Yinkenu enu aweni yakudya.

¹⁷Wena hiyakumwila nawu, Kunu tukweti kwamankendi atanu hohu, ninshi jiyedi.

¹⁸Yena nindi, Yiletenu kunu kudami.

¹⁹Hakuleja mazaza awantu nindi ashakami hamatahu; hakutambula owu mankendi atanu ninoju inshi jiyedi, hakutala kwiwulu, hakukisula nkisu, hakuhumuna mankendi, hakuyinka atumbanji, atumbanji hiyakwinka mazaza.

²⁰Adiili wejima wawu, ekutili; anoneni yibalu yasheluhu mabaŋu ikumi namabaŋu ayedi ato-o.

²¹Adiili adiŋi amayala kwiji neyi makombakaji atanu, kubombelaku niambanda nianyana.

²²Hohenohu hakushinjila atumbanji nindi epili muwatu, ayaloŋahu dehi kwishinadi; kulonda yena endeshi mazaza ayi kwawu.

²³Chaneliyi nendeshi dehi mazaza, hakukanduka hampidi kwakadi antu, nakulomba; chikuneli melela saŋa ashakaminayi kwenoku kwakanka windi.

²⁴Henohu watu wunashiki dehi mukachi kejiya, hiwukukabakana namankanda, muloŋa mpepela yadiŋi nakufuma kwakuyawu.

²⁵Hachilu chawufuku chamuchiwana yena hakwinza kudi wena nakwenda hewulu dameji.

²⁶Atumbanji chamumwenuwu nakwenda hewulu dameji, hiyakwakama nawu himuŋamu, hiyakukaloka nawoma watiyiluwu.

²⁷Ilaŋa Yesu hakuhosha nawu hohenohu nindi, Tiyenu kuwaha, yami; bayi mutiya womaku.

²⁸Petulu hakumwakula nindi, Mwanta, neyi yeyi, ŋili ninami ninzi kudeyi hewulu dameji.

²⁹Yena nindi, Inzaŋa. Petulu hakufuma muwatu, hakwenda hewulu dameji, nindi ayi kudi Yesu.

³⁰Ilaŋa chamweniyi mpepela, hakutiya woma, hakutachika kunekama, hakukaluka nindi, Mwanta, nhandishi!

³¹Yesu wolola nichikasa chindi hohenohu, hakumukwata, hakumwila nindi, Eyi wukweti kukuhwelela kwantesha, wunalulutidi?

³²Chanakandamuwu muwatu, mpepela yimwena nizo-o.

³³Adiŋi muwatu hiyakumufukamina nawu, Chalala yeyi Mwana kaNzambi.

³⁴Chanazambukuwu kwishinadi, ashika nikuchikumu chakwituŋa daGenesareta.

³⁵Chanamwilukuwu kudi amayala akwenoku, hiyakutemesha temesha mazu kumutamba wejimowu kwi-ndo, hiyakumuletela antu akata ejima;

³⁶hiyakumulembelela nawu akunki hela kumukundulu wehina dindi hohu, ejima akunkiluku akoleli.