Read MUKANDA WANZAMBI MATEU 15 Bible Online

MATEU 15 - MUKANDA WANZAMBI bible

MATEU 15

¹KuYerusalema hikukufuma aFwarisi nawansoneki,

²hiyakwinza kudi Yesu nawu, Atumbanji tweyi amotokelaŋadi chaaku chawawakulumpi, chadyaloŋawu chakadi kwisuka?

³Yena hakuyakula nindi, Indi enu nawa mwamotokelaŋadi mwayilejeliyi Nzambi, mulemeshi chaaku chenu?

⁴Nzambi wayilejeli nindi, Lemeshaku tata yeyi namama yeyi; nindi, Wukutena tata yindi hela mama yindi chatama afwi kwindi.

⁵Hakwila enu nenu, Neyi muntu wukumwila tata yindi hela mama yindi nindi, Chuma chadiŋi chakukukwasha nachu nachinki dehi Nzambi;

⁶nenu bayi alemesha nawa tata yinduku. Munapepeshi lushimbi lwaNzambi nachaaku chenu.

⁷Enu anfwikiji! Komana chaprofweteliyi Isaya waprofweteli chachiwahi,

⁸chayiteneniyi nindi, Antu awa anlemeshaŋa nanyivumbu yawu, hakwila nyichima yawu yidi kwakulehi nanami.

⁹Adifukulaŋa tuhu kudami, chalejaŋawu akwawu yijila yawantu nawu diku kuleja kwalala.

¹⁰Hakutambika izaza dawantu, hakuyila nindi, Tiyililenu mwiluki chachiwahi.

¹¹Cheŋilaŋa mukanwa hidichi chatamishaŋa muntuku; chafumaŋa mukanwa dichi chatamishaŋa muntu.

¹²Atumbanji hiyakwinza nakumwila nawu, Eyi wuneluki neyi aFwarisi chatiyawu mazu awa ahila, tahindi?

¹³Yena hakuyakula nindi, Nyitondu yejima yabulili kutumba Tata yami wamwiwulu, akayibwitamu.

¹⁴Yilekenu tuhu kwawu, hiyanlomboli aputa mesu. Neyi mputamesu wukulombola mukwawu mputamesu, mwayedi wawu akuholokela mwibuku.

¹⁵Petulu hakumwila nindi, Tulumbulwiluku chishimu ichi.

¹⁶Yena nindi, Enu nawa nihanu kanda mukwati maana?

¹⁷Yejima yayaloŋa mukanwa yayaloŋa mwivumu, yanatewaŋa kumpata. Enu kuchiluka nehi?

¹⁸Yuma yedikaŋa mukanwa diyi yatamishaŋa muntu.

¹⁹Muloŋa kumuchima diku kwafumaŋa yitoŋojoka yatama, niwubanji, niwuvumbi, nikubajama, niwukombi, niwunsahu wakutwamba, nikutukana.

²⁰Yeniyi diyi yuma yatamishaŋa muntu, hakwila kudya namakasa akadi kwisuka chachiwahi, hichatamishaŋa muntuku.

²¹Yesu hakufuma kwenoku, hakuwombolokela kumutamba waTira naZidoni.

²²Kutala mumbanda wakuKenani hakufuma kumutambowu, hakubilela nindi, Eyi Mwanta, mwana kaDavidi, ntiyili luwi; mwanami wamumbanda hakukaba nankashi nademoni.

²³Yena kumwakula izu nidimu nehi. Atumbanji twindi hiyakwinza nakumulembelela nawu, Muleji afumuku, wudi nakutulondela nakubilela.

²⁴Yena hakwakula nindi, Antemesheli kunyikoku yajimbala yetala daIsarela hohu.

²⁵Yena mumbanda hakwinza nakumufukamina nindi, Mwanta, nkwashuku.

²⁶Yena hakwakula nindi, Hichinawahi kunona mankendi awanyana nakunatilatutuwaku.

²⁷Yena mumbanda nindi, Mwamweni Mwanta, hela tutuwa twadyaloŋa nkúuku jaholokaŋa kumesa yawankaka jawu.

²⁸Yesu hakumwakula nindi, Eyi mumbanda, kukuhwelela kweyi kwasweja; akukwilila muwunakeŋi. Mwanindi wamumbanda akola niyoyena mpinji oyu.

²⁹Yesu wafumini kwenoku hakuya kwakwihi nejiya daŊaliliya; hakukanduka hampidi, hakushakamaku.

³⁰Kudi yena hikukwinza mazaza awantu amavulu, anasendi niakwakubalakata, niamputamesu, niatumama, niayifwayi, niacheŋi amavulu, hiyakuyitenteka kunyendu yindi, hakuyuka.

³¹Izaza dawantu hiyakuhayama chanamonuwu atumama hiyakuhosha, ayifwayi hiyakukola, akwakubalakata hiyakwenda, amputamesu hiyakumona. Hiyakulemesha Nzambi yaIsarela.

³²Yesu hakutambika atumbanji twindi nindi, Natiyili izaza dawantu wushona, muloŋa anashakami dehi nanami mafuku asatu hiyakweti yakudyaku; hinakeŋi kuyimwaŋa nanzalaku, akenda kafwa chinzeya munjila.

³³Atumbanji hiyakumwila nawu, Mankendi amavulu akwikutisha izaza dawantu dikumaha munu mwisaŋa tukuyiwanahi?

³⁴Yesu hakuyila nindi, Mukweti mankendi aŋahi? Nawu, Atanu nayedi, nitunyisaŋi twanyanya twantesha.

³⁵Hakuleja izaza dawantu nindi shakamenu hamaseki.

³⁶Hakunona owu mankendi atanu nayedi ninoyu nyisaŋi, hakusakilila, hakuhumuna, hakwinka atumbanji, atumbanji hiyakwinka mazaza awantu.

³⁷Adiili wejima wawu, ekutili. Hiyakunona yibalu yasheluku yimpaya yitanu nayiyedi yato-o.

³⁸Adiili adiŋi makombakaji awamayala awana, kubombelaku niambanda nianyana.

³⁹Hakuyila mazaza nindi ayi kwawu. Hakwijila muwatu, hakuya kumutamba waMaŋadana.