Read MUKANDA WANZAMBI MATEU 16 Bible Online

MATEU 16 - MUKANDA WANZAMBI bible

MATEU 16

¹AFwarisi nawaSadusi hiyakwinza nakumweseka, hiyakumulomba nawu ayileji chinjikijilu chamwiwulu.

²Yena hakuyakula nindi, Chikwelaŋa melela nenu, Mwakacha, muloŋa mavu anachinani.

³Habudidi nenu, Lelu mudi muzowa, chalala mavu achinana hiyakudikuŋa. Enu mweluka kushinshika yamwekanaŋa mwiwulu, hakwila yinjikijilu yamafuku awa kutwesha kuyiluka nehi.

⁴Chisaka chela nikutama niwuvumbi hichikulomba chinjikijilu, hiyakayileja chinjikijiluku, chiŋa chochinjikijilu chaYona hohu. Hakuyishiya hakufumaku.

⁵Atumbanji hiyakushika kwishinadi, anavulameni dehi kusenda mankendi.

⁶Yesu hakuyila nindi, Shinshikenu, mubabeli iluŋi dawaFwarisi nawaSadusi.

⁷Wena hiyakudihujola nawu, Chochu chitunabuli kusenda mankendi?

⁸Yesu chanachilukiyi, hakuyila nindi, Enu mukweti kukuhwelela kwantesha, mudi nakudihujoleladi chimwabula kusenda mankendi?

⁹Nihanu saŋa mwayambila hohu, munavulameni dehi ana mankendi atanu anana makombakaji awantu atanu, mwanonenuku mabaŋu aŋahi?

¹⁰Hela ana mankendi atanu nayedi anana makombakaji awantu awana, mwanonenuku yimpaya yiŋahi?

¹¹Munabulilidi kwiluka chinadiŋi nakuhosha nanenu hinadiŋi nakutena mankenduku? Nadiŋi nakwila nami babelenu iluŋi dawaFwarisi nawaSadusi.

¹²Eluka nikwiluka nawu komana hanatuleji kubabela iluŋi damankenduku, natuleji kubabela kuleja kwawaFwarisi nawaSadusi.

¹³Yesu chanashikiyi kumutamba waKesareya Fwilipi, hakuyihula atumbanji twindi nindi, Ami Mwana kamuntu, antu elaŋa nawu yaminyi?

¹⁴Wena nawu, Amakwawu elaŋa nawu yeyi Yowanu Mpapatishu; amakwawu nawu yeyi Elija; acheŋi nawu yeyi Yeremiya, indi kwiji wumu wahadi atuprofwetu.

¹⁵Hakuyila nindi, Indi enu aweni mwelaŋa nenu yaminyi?

¹⁶Shimona Petulu hakwakula nindi, Yeyi Kristu, Mwana kaNzambi wamumi.

¹⁷Yesu hakumwakula nindi, Eyi Shimona Barayo wanu wunakooleki, muloŋa anakumwekeshelichu kudi Tata yami wudi mwiwulu, bayi kudi muntuku.

¹⁸Ninami nukukuleja nawa nami, yeyi Petulu, helolidi dihu nakatuŋila chipompelu chami, niyisu yakaluŋa yakachikaŋanya.

¹⁹Nakakwinka nsapi jawanta wamwiwulu, yonsu yiwakakasa hanu hamaseki, nimwiwulu akayikasa; yonsu yiwakasubula hanu hamaseki, nimwiwulu akayisubula.

²⁰Henohu hakuyileja atumbanji chakola nindi, Bayi muleja muntu nenu yami Kristuku.

²¹Kufuma henohu Yesu hakutachika kuleja atumbanji twindi nindi, Chiŋa nakaya kuYerusalema, nakakaba yuma yayivulu kudi awakulumpi, nikudi awakulumpi jawatupristu, nikudi ansoneki; akanjaha, hetaŋwa damu chisatu nakasaŋuka mudi afu.

²²Petulu hakumutwala kumbadi, hakutachika kumukaanda nindi, Chinjila Mwanta. Bayi wakamona yumiyuku!

²³Yena hakushetumuka hakumwila Petulu nindi, Eyi Satana hitaku kunyima yami, keŋa wunlabishi, muloŋa hiwunati muchima kuyuma yaNzambuku, wunati muchima kuyuma yawantu.

²⁴Yesu hakuyila atumbanji twindi henohu nindi, Muntu nakeŋi kunlondami, adibondi, anyamuni kulusu yindi, anlondaŋa.

²⁵Muloŋa muntu wukukeŋa kuhemba wumi windi wakawujimbesha; niwukujimbesha wumi windi hansaŋu yamami wakawuwana.

²⁶Neyi muntu wukuheta mpata yamunu mwishina yejima, ajimbeshelaku wumi windi, wakadiila kwodi? Chumanyi chakahanayi muntu akahimpi nawumi windi?

²⁷Muloŋa Mwana kamuntu wakenza mulubanji lwakulema kwaTata yindi nawaŋelu jindi, wakenka antu ejima mwashikila nyidimu yawu.

²⁸Nukuyileja chalala nami kudi amakwawu anemani kunu, hiyakafwaku chiŋa anamoni dehi Mwana kamuntu chakwinzayi muwanta windi.