Read MUKANDA WANZAMBI MATEU 17 Bible Online

MATEU 17 - MUKANDA WANZAMBI bible

MATEU 17

¹Chimwahitili mafuku atanu nadimu, Yesu hakutwala Petulu niYakoba nimana kwindi Yowanu, hakuyikandwisha hampidi yayilehi kwakanka wawu.

²Hiyakumumona hakubalumuka mwacheŋi, kumesu indi hikukutoŋeka neyi itaŋwa, nimahinindi hiyakutooka neyi mwaana.

³Kutala, kudi wena hikukumwekana aMosi naElija, hiyakuhanjika nindi.

⁴Petulu hakumwila Yesu nindi, Mwanta, chachiwahi chitudi kunu; neyi wuneteji, nituŋa kunu yisolu yisatu, chimu cheyeyi, chimu chaMosi, chimu chaElija.

⁵Iku wuchidi kuhosha, kutala ivu ditooka hidikuyizeŋamina; kutiya niizu hidikufuma mwivu odu nindi, Diyi Mwanami nakeŋa, natiyaloŋa kuwaha nankashi mudi yena; mutiyililenu.

⁶Atumbanji chanaditiyuwu, hiyakudinata chamesu awu hamaseki, atiya niwoma nankashi.

⁷Yesu hakwinza hakuyikunka nindi, Nyamukenu, bayi mutiya womaku.

⁸Chanafumbuwu mesu, kumona muntu nehi, chiŋa yowu Yesu hohu.

⁹Chadiŋi nakukunkumukawu hampidi, Yesu hakuyileja nindi, Bayi muleja muntu chuma chimunamonuku, chiŋa Mwana kamuntu nasaŋuki dehi mudi afu.

¹⁰Atumbanji twindi hiyakumwila nawu, Indi ichi chelaŋawu ansoneki, nawu chiŋa Elija akasambila kwinza?

¹¹Yena hakuyakula nindi, Chalala Elija wakenza, wakafuntisha cheŋi yuma yejima muyadiŋi.

¹²Ilaŋa nukuyileja nami Elija wenza dehi, hiyamwilukiluku, amukoŋeli mwatweluwu nyichima yawu mwejima. Chenochu nawa dichi chakamukabishawu Mwana kamuntu.

¹³Dichi atumbanji hiyakwiluka nawu nateni Yowanu Mpapatishu.

¹⁴Chanashikuwu kwizaza dawantu, hikukwinza nakumufukamina muntu wumu,

¹⁵nindi, Mwanta, amutiyili mwanami luwi, muloŋa himukwachinkonya, wakabaŋa nankashi, wadimbukilaŋa kakavulu mukesi, kakavulu nawa mumeji.

¹⁶Namuleta kudi atumbanji tweyi, anakaŋanyi kumúuka.

¹⁷Yesu hakwakula nindi, Enu chisaka chela nikubula kukuhwelela, nikuluwa, nukwi kala nenu nyaka yiŋahi? Nukukabakana nenu nyaka yiŋahi? Muletenu kunu kudami.

¹⁸Yesu hakumuhoshola, demoni amufuma nikumufuma; owu kansi akola nihohenohu.

¹⁹Atumbanji hiyakwinza kudi Yesu kwakanka wawu nawu, Etu twakaŋenyadi kumufumisha?

²⁰Yena hakuyila nindi, muloŋa wowu wakukuhwelela kwenu kwantesha; muloŋa nukuyileja chalala nami, neyi mukweti kukuhwelela kwakweseka nakalubutu kamostadi, mwadi kuyila mpidi iyi nenu, Tutulukaku kunu wuyi kuna; yadi kututuluka. Kwosi chuma chimwadi kukaŋanyaku.

²¹Ilaŋa wudi neyi iwu hiyafumaŋa tuhuku; kufuma chiŋa nakulomba kwakuleka kudya.

²²Chashakaminuwu muŊaliliya, Yesu hakuyila nindi, Mwana kamuntu akamuhana kumakasa awantu,

²³akamujaha; hetaŋwa damu chisatu wakasaŋuka mudi afu. Wena hiyakuneŋa nankashi.

²⁴Chanashikuwu kuKaperinawu, owu atambwilaŋa lushekeli lwahafu hiyakwinza kudi Petulu nawu, Nkuluŋaŋa yenu walambulaŋa lushekeli lwahafu, tahindi?

²⁵Yena nindi, Eŋa walambulaŋa. Chanepiliyi mwitala, Yesu hakusambila kumwihula nindi, Eyi Shimona, indi eyi wunatoŋojokidi? Anyanta ahanu hamaseki atambulaŋa musonku hela himulambu kudanyi? Kudi anyanawu tahindi kudi antu acheŋi?

²⁶Cheliliyi nindi, Kudi antu acheŋi. Yesu hakumwila nindi, Komana anyana anayiŋi kwawu.

²⁷Hitunakeŋi kuyihilishaku, dichi yaku kwijiya, wakombilumu ilowa, inshi yiwukusambila kulowa wakayasamishi mukanwa, wakanonumu lushekeli lumu, wulunoni wuyinki, lwetu mwayedi wetu nineyi ninami.