Read MUKANDA WANZAMBI MATEU 18 Bible Online

MATEU 18 - MUKANDA WANZAMBI bible

MATEU 18

¹Mpinji yoyenoyu atumbanji hiyakwinza kudi Yesu nawu, Nabadiki akwawu muwanta wamwiwulu hinyi?

²Hakutambika mwana wanyanya, hakumusha mukachi kawu,

³nindi. Nukuyileja chalala nami chiŋa mubalumuka, mwikali neyi anyana anyanya, mukunkulwayi himwakatwesha kwijila muwanta wamwiwuluku.

⁴Dichi yowu wukudizoza neyi mwana wanyanyiwu, diyi nabadiki muwanta wamwiwulu.

⁵Nimuntu wukutambula mwana wanyanya wumu wudi neyi iwu mwijina dami, nantambulami;

⁶hakwila muntu wukudimbwisha mwinawu wanyanya wumu wankuhwelelami, chikuwaha kumukasila ilola dakuhala deneni kunshiŋu, hikumujiyisha mwinyiŋi damukaluŋalwiji.

⁷O yihuŋu yakamona matuŋa ahanu hamaseki nansaŋu jakudimbwisha! Muloŋa nsaŋu jakudimbwisha jakenza hohu; ilaŋa o yihuŋu yakamona muntu wukujileta!

⁸Neyi chikasa cheyi, hela mwendu weyi wakudimbwishaŋa wuketuli, wuwunatili kwakulehi naneyi; chinawahi kwijila muwumi nawufwayi hela nawulema; kukunatila mukesi kahaya nyaka wudi namakaseyi ayedi, hela nanyendu yeyi yiyedi, hichinawahuku.

⁹Neyi disu deyi dakudimbwishaŋa ditubuli, wudinatili kwakulehi naneyi; chinawahi kwijila muwumi nadisu dimu, kukunatila mukesi kamukaluŋa kachinana namesu ayedi hichinawahuku.

¹⁰Babalenu mubuli kudi wula hela mwana wanyanya wumu wudi neyi iwu; muloŋa nukuyileja nami akweti aŋelu jawu atalaŋa mafuku ejima kumesu aTata yami wekala mwiwulu.

¹¹Muloŋa Mwana kamuntu nenzi nakwamwina ajimbala.

¹²Munatoŋojoki ŋahi? Neyi kudi muntu wukweti nyikoku yindi nkulakaji, neyi hanapwapuki wumu, abuli kushiya makumi atanu nawana natanu nawana, ayi kumapidi nakukeŋakeŋa owu napwapuki, tahindi?

¹³Wamba kela wukumuwana, nukuyileja chalala nami, wukuzaŋalala namukoku owu chakubadika awa makumi atanu nawana natanu nawana abulili kupwapuka.

¹⁴Dichi muchima waTata yenu wudi mwiwulu hanakeŋi mwana wanyanya wudi neyi iwu kunoŋaku.

¹⁵Neyi mana kweyi nakuvulumuni, yaku wumukonkololi mwanaluwiyi kwakanka wenu; neyi wukukutiya, wunamoni dehi mana kweyi.

¹⁶Ilaŋa neyi kwonti kwindi kukutiya, yakuku namuntu wumu hela nawantu ayedi, kulonda mazu ejima akakoleli kutunwa twawayinsahu ayedi hela asatu.

¹⁷Neyi kwonti kwindi kutiyilila wena nawa, lejaku chipompelu; neyi saŋa adikaŋilayi, kutiyilila chipompelu nehi, mufwanishi kweyi neyi kaJentili, hela neyi nsonkeshi.

¹⁸Nukuyileja chalala nami, yuma yimwakakasa hanu hamaseki, nimwiwulu akayikasa; yuma yimwakasubula hanu hamaseki, nimwiwulu akayisubula.

¹⁹Cheŋi nawa nukuyileja nami, neyi hadi akwenu ayedi akutiyaloŋana kulomba chuma hanu hamaseki, akayililachu kudi Tata yami wudi mwiwulu.

²⁰Muloŋa kunapompi hela ayedi hela asatu mwijina dami, diku kunidi mukachi kawu.

²¹Henohu Petulu hakwinza nakumwila nindi, Mwanta, mapampa kaŋahi akanvulumunayi mana kwami, ami nimwanakenaŋa ho-o? Kakashika mumapampa katanu nakayedi, tahindi?

²²Yesu hakumwila nindi, Hinukukuleja nami kakashiki mumapampa katanu nakayedi hohuku; ilaŋa nami kakashiki mumakumi atanu nayedi, mapampa katanu nakayedi.

²³Dichi wanta wamwiwulu wudi neyi mwanta wumu wakeŋa eli kushinshika nyikudi yawanduŋu jindi.

²⁴Chatachikiliyi kuyishinshika, hiyakumuletela muntu waihudiilili mukudi wamakombakaji antalenta ikumi.

²⁵Chijinamukaŋi kufuta, nkaka yindi hakuyileja nindi mulandenu niyena, niŋodindi, ni anyanindi hamu, niyahetayi yejima, akafuti.

²⁶Dichi owu nduŋu hakudinata hamaseki, hakumulembelela nindi, Mwanta awundishi muchima, nakakufuta yejima.

²⁷Nkaka yanowu nduŋu hakumutiyila wushona, hakumuumbaku, hakumwanakena mukudi owu.

²⁸Ilaŋa owu nduŋu chanedikiyi, hakumona mukwawu nduŋu nindi wadiŋi nindi namukudi wankulakaji yamali, hakumukwata, amukwata nihanyidiwu, nindi, Futaku mukudi weyi.

²⁹Dichi owu mukwawu nduŋu nindi hakudinata hamaseki, hakumulembelela nindi, Wundishaku muchima, nakakufuta.

³⁰Yena kwonti kwindi, hakuya nakumusha mukaleya, nindi kufumamu chiŋa wunafuti mukudi wejima.

³¹Akwawu anduŋu nindi chanamonuwu ochu cheliliyi, hiyakuneŋa nankashi, hiyakwinza nakumuleja nkaka yawu yuma yejima.

³²Nkaka yindi hakumutambi ka, hakumwila nindi, Eyi nduŋu watama, ami nakwanakena mukudi wuna wejima nachina chiwanlembelela;

³³eyi kutiyila mukwenu nduŋu neyi luwi, neyi china chinakutiyilami nehi?

³⁴Nkaka yindi hakumuzuwila, hakumuhana kudi akwakubabesha, nindi kufumamu chiŋa nafuti mukudi wejima.

³⁵Dichi chakayilayi nawa niTata yami wamwiwulu, neyi enu mukubula kwanakena akwenu nyiloŋa yawu munyichima yenu.