Read MUKANDA WANZAMBI MATEU 19 Bible Online

MATEU 19 - MUKANDA WANZAMBI bible

MATEU 19

¹Dichi chelili Yesu nakumishi dehi mazu awa, hakufuma kuŊaliliya, hakuya kumutambawawa Yudeya wakwishinadi daYodana.

²Mazaza awantu aweni hiyakumulondela; hakuyukila kwenoku.

³AFwarisi hiyakwinza kudi yena nakumweseka nawu, Muntu kuseŋa Iŋodindi hansaŋu jejima chaloŋa, tahindi?

⁴Yena hakuyakula nindi, Himunataŋi nsaŋu yakwila nawu, wayileŋeli hatachi, wayileŋeli niiyala nimumbandaku, tahindi?

⁵nindi, Dichi muntu ashiyi tata yindi nimama yindi, akakeli Iŋodindi, niwena ayedi akekali mujimba wumu.

⁶Hiyadi cheŋi ayeduku, adi mujimba wumu. Dichi anabombuwu kudi Nzambi, bayi ayambula kudi muntuku.

⁷Wena hiyakumwila nawu, Indi Mosi wayilejelelidi nindi akahani mukanda wakuseŋa, akamuseŋi tuhu?

⁸Yesu hakuyila nindi, Mosi kuyiteja kuseŋa aŋodi jenu chafumini hanyichima yenu yachinchika; ilaŋa kufuma hatachi hichadiŋi chochochuku.

⁹Nukuyileja nami, muntu wukuseŋa Iŋodindi, chiŋa namuloŋa wawuvumbi hohu; neyi wukumuseŋa chakadi muloŋa wawuvumbi hakusumbula wacheŋi, neli wuvumbi, nimuntu wukusumbula mumbanda anaseŋuwu neli wuvumbi niyena.

¹⁰Atumbanji hiyakumwila nawu, Neyi nsaŋu yamuntu naŋodindi yidi chochichi, komana kusumbula hichachiwahuku.

¹¹Ilaŋa yena hakuyila nindi, Antu ejima hiyakutwesha kwiteja izu iduku, chiŋa anenkuwu hohu.

¹²Muloŋa kudi ayihewu akuvwali ka nawu mumavumu awamama jawu; kudi ayihewu akuyila kudi antu; kudi nawa ayihewu akudila awenawu hansaŋu yawanta wamwiwulu. Yowu natweshi kutambula, atambuli.

¹³Henohu hiyakumuletela anyana anyanya, kulonda ayinaŋiki makasindi alombi; atumbanji hiyakuyihoshola.

¹⁴Yesu nindi, Itejenu anyana anyanya, bayi muyilekesha kwinza kudamuku, muloŋa wanta wamwiwulu wawena adi chochichi.

¹⁵Hakuyinaŋika makasindi, hakufumaku.

¹⁶Kutala, kudi yena hikukwinza muntu wumu nindi, Eyi Nkuluŋaŋa, chumanyi chachiwahi chinakela kulonda nakamoni wumi wahaya nyaka?

¹⁷Yena hakumwila nindi, Wunaŋihwilidi yuma yayiwahi? Muwahi wuduku wumu hohu; neyi wunakeŋi kwijila muwumi, hembaku nshimbi.

¹⁸Hakumwila nindi, Nshimbinyi? Yesu nindi, Kujaha muntu chinjila; kwila wuvumbi chinjila; kwiya chinjila; kushimuna wunsahu wakutwamba chinjila.

¹⁹Lemeshaku tata yeyi nimama yeyi; niniyi yakwila nawu, Keŋaku mukwenu neyi chiwadikeŋa eyi aweni.

²⁰Owu mukwenzi weyala hakumwila nindi, Yuma yejimiyi nayihemba dehi, kunashalidi?

²¹Yesu hakumwila nindi, Neyi wukukeŋa kwikala walala chikupu, yaku wulandishi yiwudi nayu, wakahani kudi atuzweŋi, wakaheti maheta amwiwulu, winzi wunlondaŋa.

²²Owu mukwenzi chanatiyiyi izu odu, hakufumaku nakuneŋa; muloŋa wadiŋi muntu waheta maheta amavulu.

²³Yesu hakuyila atumbanji twindi nindi, Nukuyileja chalala nami, mukwakuheta kwijila muwanta wamwiwulu chakala.

²⁴Nukuyileja cheŋi nami, nŋameli kuhanuka mudisu dandoŋu chaswayi, hakwila mukwakuheta kwijila muwanta waNzambi chakala.

²⁵Chanachitiyuwu, atumbanji hiyakuhayama nankashi nawu, Indi dinu wukutwesha kuhanda hinyi?

²⁶Yesu hakuyitala, hakuyila nindi, Chumichi chikukaŋanya muntu, hakwila yuma yejima yinatwesheki kudi Nzambi.

²⁷Petulu hakumwakula henohu nindi, Tala, etu tunashiyi yuma yejima, tunakulondeli; indi etu twakatambuladi?

²⁸Yesu hakuyila nindi, Nukuyileja chalala nami, hakuleŋa kwakwiha chakashakamayi Mwana kamuntu hetanda dawanta dakulema kwindi, enu nawa munanlondami mwakashakama hamatanda awanta ikumi nayedi, nakusompesha nyuza yaIsarela ikumi nayiyedi.

²⁹Ejima anashiyi hela matala, hela ana kwawu, hela ahelawu, hela atata jawu, hela amama jawu, hela anyana, hela maha, hansaŋu yejina dami, akatambwilamu nkulakaji, akaswana niwumi wahaya nyaka.

³⁰Ilaŋa mavulu akusambila akekala akukuminina, niakukuminina akekala akusambila.