Read MUKANDA WANZAMBI MATEU 20 Bible Online

MATEU 20 - MUKANDA WANZAMBI bible

MATEU 20

¹Muloŋa wanta wamwiwulu wudi neyi muntu mwini itala, wamenekeli nakukwata akwakukalakala budidi, kulonda ayitemeshi mwitempa dindi danyivinyu.

²Chanatiyaloŋaniyi nawakwakukalakala kuyinka idali dimu dimu mwifuku, hakuyitemesha mwitempa dindi danyivinyu.

³Hakwidika cheŋi kwakwihi naora yamuchisatu, hakumona amakwawu endemajala tuhu kuwulandilu.

⁴Hakuyila nindi, Ninenu nawa yenu mwitempa danyivinyu, nukuyifweta mwaloŋa. Hiyakuya.

⁵Hakwidika cheŋi kwakwihi naora yamuchitanu nayimu, niora yamuchitanu nayiwana, hakwila mwomumu.

⁶Kwakwihi naora yamwikumi nayimu hakwidika, hakuwana amakwawu anemani, hakuyila nindi, Mudi nakwimajaliladi kunu mwaana wejima chakadi nyidimu?

⁷Hiyakumwila nawu, Hikudi muntu natwinki mudimuku. Hakuyila nindi, Ninenu nawa yenu mwitempa.

⁸Chikuneli melela, owu mukwetempa hakumwila kalama kindi nindi, Tambikaku akwakukalakala wuyinki wufwetu wawu, wutachikili kudi akuminina, ndo nikudi asambila.

⁹Chanenzuwu owu enkeluwu mudimu kwakwihi naora yamwikumi nayimu, hiyakutambula idali dimu dimu.

¹⁰Chanenzuwu owu ásambilili, hiyakutoŋojoka nawu tukutambula wufwetu wabadika, niwena nawa hiyakutambula mwomumu, idali dimu dimu.

¹¹Chanatambuluwu, hiyakumutobela mwini itala,

¹²nawu, Awa akuminina anakalakali ora yimu hohu, eyi wuyesekeji nanetu tunakabakani mwaana wejima ninkanza yetu?

¹³Yena hakwakula, hakwila mwinawu wumu nindi Eyi mukwetu, hinakutamishuku; hitwatiyaloŋana naneyi idali dimuku?

¹⁴Nonaku idali deyi, wuyaloŋa kweyi; ami aweni nakeŋi kuyinka awa akuminina neyi chinakwinkeyi.

¹⁵Chinjila kwila muchima wami nayuma yami, tahindi? Wunatiyi ichima nanichi chinawaha, tahindi?

¹⁶Dichi akukuminina akekala akusambila, akusambila akekala akukuminina.

¹⁷Yesu chayilaŋayi nakukanduka kuYerusalema, hakutwala atumbanji ikumi nayedi hambadi omu munjila,

¹⁸hakuyila nindi, Talenu, hitukuya nakukanduka kuYerusalema. Mwana kamuntu akamuhana kudi awakulumpi jawatupristu nikudi ansoneki, akamwinka muloŋa wakwila nawu afwi hohu.

¹⁹Akamuhana nikudi aJentili akamusehi, akamuvupoli, akamupopeli kukulusu; itaŋwa damu chisatu wakasaŋuka.

²⁰Kudi yena hikukwinza mama yawanyana kaZebedewu hamu nawanyanindi, hakufukama kudi yena, amulombi chuma chimu.

²¹Yena hakumwila nindi, Wunakeŋidi? Yena mumbanda hakumwila nindi, Hoshaku izu dakushakamisha awa anyanami ayedi muwanta weyi, wumu kuchikasa cheyi chachidiilu, mukwawu kuchikasa cheyi chachimunswa.

²²Yesu hakwakula nindi, Chuma chimunalombi himunachilukuku. Mukutwesha kunwa mulupasa lunukukeŋa kunwami, tahindi? Hiyakumwila nawu, Tukutwʼesha.

²³Hakuyila nindi, Chalala mwakanwa mulupasa lwami, hakwila kushakama kuchikasa chami chachidiilu, hela kuchikasa chachimunswa, hichuma chakuhana amuku, chambala chawaloŋeshelawu dehi kudi Tata yami.

²⁴Awa ikumi chanachitiyuwu, hiyakutiya kutama nankashi nanowu ayedi avwalika ivumu dimu.

²⁵Yesu hakuyitambika nindi, Mweluka dehi anyanta jawaJentili chayiyulaŋawu; niantu awu alema chekalaŋawu nawanta hadi wena.

²⁶Ilaŋa mukachi kenu bayi chakekala chochochuku; yowu wukukeŋa kwikala muneni mukachi kenu ekali mukwakuyikalakela;

²⁷yowu wukukeŋa kwikala mukwakubadika mukachi kenu ekali nduŋu yenu.

²⁸Muloŋa chalala chenjiliyi Mwana kamuntu halondeli nindi akamukalakeluku, ilaŋa nindi akakalakeli akwawu, akahani wumi windi wakukuula nachu antu amavulu.

²⁹Chadiŋi nakufumawu muYeriku, izaza dawantu hidikumulonda.

³⁰Kutala amputamesu ayedi anashakami kunsa yanjila, chanatiyuwu nawu Yesu hakuhita, hiyakubilela nawu, Eyi Mwanta, mwana kaDavidi, tutiyili luwi.

³¹Izaza hidikuyihoshola nawu, Mwenenu zo. Ilaŋa wena asweja nikubilela nawu, Eyi Mwanta, mwana kaDavidi, tutiyili luwi.

³²Yesu hakwimana ku-ka, hakuyitambika nindi, Munakeŋi niyilili chumanyi?

³³Hiyakumwila nawu, Mwanta, atutoneshi mesu etu.

³⁴Yesu hakuyitiyila wushona, hakuyikunka kumesu awu; atona nihohenohu, hiyakumulonda.