Read MUKANDA WANZAMBI MATEU 22 Bible Online

MATEU 22 - MUKANDA WANZAMBI bible

MATEU 22

¹Yesu hakuyakula cheŋi nayishimu,

²nindi, Wanta wamwiwulu wunafwani neyi mwanta wumu, watelekeleli mwanindi weyala mawŋia akusumbwisha.

³Hakutemesha anduŋu jindi ayi nakutambika ashiikiluwu dehi kwinza kumawija; wena kwonti kwawu kwinza.

⁴Hakutemeshaku cheŋi anduŋu amakwawu nindi, Kayilejenu ashiikawu nenu, Mawijami naloŋeshi dehi, najahi dehi aŋombi jami, ni ayimuna jami anuna, yuma yejima yinawahi dehi, inzenu kumawija.

⁵Ilaŋa wena hiyakuchidiwula, hiyakudiyila iwu kwiha dindi, mukwawu kumaseyindi.

⁶Anashali hiyakukwata anduŋu jindi, hiyakuyikoŋa chatama, hiyakuyŋahola.

⁷Owu mwanta hakuzuwa, hakutemesha njita jindi, hakujilumuna wenowu ambanji, ocha niŋanda yawu.

⁸Hakuyila anduŋu jindi henohu nindi, Mawijami anawahi dehi, hakwila awa ashiikiluwu hiyanateluku.

⁹Dichi yenu kumaakenu anyikwakwa; ejima mukumona muyitambiki enzi kumawija.

¹⁰Owu anduŋu hiyakuya munyikwakwa nakupompesha antu amwenuwu ejima, niatama niamawahi; kumawija kwinzala nienyi to-o.

¹¹Owu mwanta chanepiliyi nakutala enyi, hakumonamu muntu nabuli kuvwala chi kovwelu chamawija akusumbwisha.

¹²Hakumwila nindi, Eyi mukwetu, munu wuneŋilumu ŋahi chakadi chikovwelu chamawija? Yena kumona mwakuhosha nehi.

¹³Mwanta hakuyila aŋamba jindi henohu nindi, Mukasenu nikumakasa nikunyendu, mumunatili kumwidima wahanzi, kwakekala kudila nikudisumona kumaji.

¹⁴Muloŋa kutambika anatambiki amavulu; hakwila kutonda anatondi antesha.

¹⁵Henohu aFwarisi hiyakuya nakutiyashana mwakumutila kunsaŋu jakuhoshayi.

¹⁶Hiyakumutemeshela atumbanji twawu hamu nawakwaHerodi nawu, Eyi Nkuluŋaŋa, etu tuneluki netu eyi wumuntu walala, walejaŋa antu njila yaNzambi mwalala hohu, hiwaakamaŋa muntuku, hiwatalaŋa kumesu amuntuku.

¹⁷Dichi tuleji; kusonka kudi Kesari wunachitoŋojoki neyi chaloŋa, tahindi?

¹⁸Yesu welukili mwataminawu, hakuyila nindi, Mukuŋesekeladi, enu anfwikiji?

¹⁹Nlejenu mali akusonka nachu. Hiyakumuletela idali dimu.

²⁰Hakuyila nindi, Ichi chifwikija chanyi? Niniji nsona janyi?

²¹Hiyakumwila nawu, JaKesari. Yena hakuyila nindi, Dichi yuma yaKesari inkenu Kesari; yuma yaNzambi inkenu Nzambi.

²²Chanachitiyuwu hiyakuhayama, amushiya nikumushiya, hiyakuya.

²³Ifuku odu kudi yena hikukwinza aSadusi, elaŋa nawu afu hiyasaŋukaŋaku;

²⁴hiyakumwihula nawu, Eyi Nkuluŋaŋa, Mosi welili nindi, Neyi muntu wukufwa chakadi kushiya anyana, Iŋodindi akamusumbuli kudi mana kwindi kulonda akavweli mana kwindi anyana.

²⁵Dichi twadiŋi nawamayala atanu nayedi ivumu dawu dimu; wakusambila wasumbwili mumbanda, wafwili chakadi kushiya anyana, hakumushiyila mana kwindi Iŋodindi.

²⁶Niwamuchiyedi, niwamuchisatu mwomumu, ndo nikudi wamu chitanu nachiyedi.

²⁷Nkumininaku nimumbanda ofwa ni kufwa.

²⁸Dichi hamba kasaŋukawu afu, awa atanu nayedi, yeniwu mumbanda wakekala iŋoda wumwodihi? Muloŋa wejima wawu amusumbwili.

²⁹Yesu hakwakula nindi, Mwenda muluwa; kuluwa kwenu kunafumi hákubula kwiluka nyikanda yajila, hela Ŋovu yaNzambi.

³⁰Muloŋa hamba kasaŋuka afu hikwakekala kusumbula hela kusumbukaku; akekala neyi chaduwu aŋelu mwiwulu.

³¹Hakwila nsaŋu yakusaŋuka kwawafu, ochu chahosheliyi Nzambi nanenu,

³²nindi, Yami Nzambi yaAbarahama, Nzambi yaIsaka, Nzambi yaYakoba; himunachitaŋuku? Dichi Nzambi hiNzambi yawafuku, hiNzambi yawamomi.

³³Mazaza awantu chanachitiyuwu hiyakuhayama kuleja kwindi.

³⁴AFwarisi chanatiyuwu nawu namweneshi aSadusi, hiyakudipompesha.

³⁵Mwinawu mukwanshimbi wumu, hakumwihula mazu akumweseka,

³⁶nindi, Eyi Nkuluŋaŋa, lushimbi lwabadika nshimbi jejima lushimbinyi?

³⁷Hakumwila nindi, Keŋaku Yehova Nzambi yeyi namuchima weyi wejima, nawumi weyi wejima, namaaneyi ejima.

³⁸Dilu lushimbi lwabadika lwakusambila.

³⁹Kudi nawa lwamuchiyedi lwafwana neyi ilu nawu, Keŋaku mukwenu neyi chiwadikeŋa eyi aweni.

⁴⁰Hanshimbi ŋi jiyedi dihu halemena nshimbi jejima niatuprofwetu ejima.

⁴¹Hadiŋuwu aFwarisi achidi adipompa hamu, Yesu hakuyihula,

⁴²nindi, Kristu munamutoŋojoki nenu wudi ŋahi? Himwana kanyi? Wena hiyakumwakula nawu, Himwana kaDavidi.

⁴³Hakuyila nindi, Indi Davidi hadiŋiyi nakuhosha mudi Spiritu namutenenidi nindi Mwanta?

⁴⁴heliliyi nindi, Yehova wamwilili Mwanta wami nindi, Shakamaku kuchikasa chami chachidiilu, nichinakasha akwankunyi neyi kwishina danyendu yeyi.

⁴⁵Davidi amutena nindi Mwanta, wukutwesha ŋahi kwikala mwanindi?

⁴⁶Hi kwadiŋi muntu watwesheli kumwakula izu nidimuku; kufuma kwifuku odu hikwadiŋi muntu wadiŋi nawulobu wakumwihula yuma yikwawuku.