Read MUKANDA WANZAMBI MATEU 23 Bible Online

MATEU 23 - MUKANDA WANZAMBI bible

MATEU 23

¹Henohu Yesu hakuhosha namazaza awantu niatumbanji twindi hamu,

²nindi, Ansoneki nawaFwarisi ashakama hetanda daMosi, dichi ilenuŋa yuma yejima yakuyilejawu muyihembi,

³ilaŋa bayi mwimbujolaŋa mwelaŋawuku; muloŋa akuminaŋa dakuhosha hohu, kwilamu nehi.

⁴Mwamweni, akasaŋa yiteli yalema yakala kusenda, hiyakutwika antu hamafwiji, hakwila awenawu kwonti kwawu kuyiswija hela namunu wawu.

⁵Nyidimu yawu yejima ayililaŋa yowu kwila nawu ayimoni kudi antu, enda atohesha nyikanda yakumahamawu, ninyikundulu yakumahinawu.

⁶Kuyawija akeŋa kushakama halema, nimumashikola akeŋa kushakama hamatanda alema.

⁷Akeŋa kuyimwosha kuwulandilu, akeŋa kuyitena kudi antu nawu Rabi.

⁸Enu kwenu bayi ayitenaŋa nawu Rabuku, muloŋa nkuluŋaŋa yenu wumu hohu, wejima wenu ivumu denu dimu.

⁹Bayi mutenaŋa muntu hanu heseki nenu tata yetuku, muloŋa Tata yenu wuduku wumu hohu, yowu wamwiwulu.

¹⁰Bayi ayitenaŋa nawa nawu anlomboluku, muloŋa nlomboli yenu wuduku wumu hohu, diyi Kristu.

¹¹Ilaŋa wabadika mukachi kenu ekali mukwakuyikalakela.

¹²Muntu wukuditohesha akamukehesha, muntu wukudikehesha akamutohesha.

¹³O yihuŋu yimwakamonenu ansoneki nawaFwarisi, anfwikiji! Mwenzelelaŋa akwenu hanzi yawanta wamwiwulu; muloŋa enu aweni himweŋilaŋa mwoku, hela akeŋa kwijila himwayitejaŋa kwijila ku.

¹⁴O yihuŋu yimwakamonenu ansoneki nawaFwarisi, anfwikiji! Mwadyaloŋa matala awambanda anfwila, himukulomba kulomba kwakudimbana kwakwila lombe-e; dichi akayitanyisha chakubadika.

¹⁵O yihuŋu yimwakamonenu ansoneki nawaFwarisi, anfwikiji! Mwahitaŋanaŋa nikumeji nikumpata kulonda kubalumuna muntu wumu ekali kaYudeya; chakwilayi chochochu, himukumwilisha mukwakaluŋa kachinana wakubadika enu muyedi.

¹⁶O yihuŋu yimwakamonenu anlomboli aputa mesu! Mwelaŋa nenu, Muntu wukusanyika tembeli hakweti nsaŋuku; hakwila wukusanyika wuru watembeli, nenu diyi wukweti nsaŋu.

¹⁷Enu mwabula maana, mwaputa mesu! Yabadika yika? Wuru, tahindi tembeli yajilika wuru?

¹⁸Cheŋi nenu, Muntu wukusanyika kameŋa hakweti nsaŋuku; hakwila wukusanyika chamukunkulu chiduhu, nenu diyi wukweti nsaŋu.

¹⁹Enu mwaputa mesu, yabadika yika? Chamukunkulu, tahindi kameŋa kajilika chamukunkulu?

²⁰Dichi muntu wukusanyika kameŋa nasanyikili kumu niyuma yejima yiduhu.

²¹Nimuntu wukusanyika tembeli nasanyikili kumu niwashakamamu.

²²Nimuntu wukusanyika iwulu nasanyikili niitanda daNzambi dawanta, niwashakamahu.

²³O yihuŋu yimwakamonenu ansoneki nawaFwarisi, anfwikiji! Mwamwinkaŋa Nzambi himulambu wamafu achimbumba wamwikumi, niwanyiseki, niwakasakwa; munaleki kwila yuma yanshimbi yalema, kwokusompa, niluwi, nikukuhwelela. Neyi mwelaŋa yeniyi, niyikwawu himwadi kukaŋanya kuyilaku.

²⁴Enu anlomboli aputa mesu! Mwakelulaŋa ŋweneni, hakwila nŋameli himukuminya.

²⁵O yihuŋu yimwakamonenu ansoneki nawaFwarisi, anfwikiji! Mwatookeshaŋa hanzi yalupasa nacheŋa, hakwila mukachi chochimwadisoma nanyilami nikubajama.

²⁶Eyi kaFwarisi waputa mesu, sambilaku kutookesha mukachi kalupasa nacheŋa, kulonda nihanzi hatooki nawa.

²⁷O yihuŋu yimwakamonenu ansoneki nawaFwarisi, anfwikiji! Mudi neyi majamu akupembesha, amwekana lubanji hanzi, hakwila mukachi mwenzala mafwaha awafu, niwuzondu wejima.

²⁸Dichi ninenu nawa, hanzi mwamwekana kuloŋa kudi antu, hakwila mukachi mwenzala niwufwikŋi nikuluwa mbe.

²⁹O yihuŋu yimwakamonenu ansoneki nawaFwarisi, anfwikiji! Mwatuŋaŋa majamu awatuprofwetu, mwawahishaŋa majamu awakwakuloŋa;

³⁰mwelaŋa nenu, Neyi twadiŋi hamafuku adiŋuwu ankakulula jetu, mutenowu hitwatiyashanini nawu kupwekesha mashi awatuprofwetuku.

³¹Dichi munadishimuni wunsahu enu aweni, nenu muyanyana kanawa ajahili atuprofwetu.

³²Dichi wanishenu kwenu mwesekeleli ankakulula jenu.

³³Enu atupela, enu anyana katubandayula, mukupuluka ŋahi kukutanya kwamukaluŋa kachinana?

³⁴Talenu, nukuyitemeshela atuprofwetu, niakwamaana, niansoneki; amakwawu mwakayijaha nakuyipopela kumakulusu; amakwawu mwakayivupolela mumashikolenu, mwakayikabisha, aya mukaliwu ayikabisha, aya mukaliwu ayikabisha;

³⁵kulonda mwakamoni muloŋa wamashi awantu aloŋa ejima apwekesheluwu hanu hamaseki, kufumisha kumashi aAbeli, wadiŋi muntu waloŋa, ndo nikumashi aZakariya mwana kaBarakiya, mwajahilili hakachi kamwajila nakameŋa.

³⁶Nukuyileja chalala nami chisakichi chakamona yuma yejimiyi.

³⁷Eyi Yerusalema, Yerusalema, wajahaŋa atuprofwetu, waasaŋa malola antu akutemeshelaŋawu! O mapampa kuvula inakeŋeli kukuŋwija anyaneyi neyi chakuŋwijaŋayi chaadi anyanindi mumpuula jindi, enu kwenu kwonti kwenu!

³⁸Talenu itala denu anayishiyilidu dehi yineli dehi kwachihembi hohu.

³⁹Muloŋa nukuyileja nami, kufumisha hanu himwakanmona cheŋuku, kunmona chiŋa himwakela nenu, Kisu kisu iwu wukwinza mwijina daYehova.