Read MUKANDA WANZAMBI MATEU 24 Bible Online

MATEU 24 - MUKANDA WANZAMBI bible

MATEU 24

¹Yesu hakwidika mutembeli. Hadiŋiyi nakuya munjila yindi, atumbanji twindi hiyakwinza kudi yena nakumuleja matala atembeli.

²Yena hakwakula nindi, Munamoni yuma yejimiyi? Nukuyileja chalala nami, kunu hikwamba kashala ilola nidimu dakanaŋamana helola di kwawu dakabula kunatika hesekuku.

³Chashakaminiyi hampidi yaOliveta, atumbanji hiyakwinza kudi yena kwakanka wawu nawu, Tuleji hamba kela yumiyi, nichinjikijilu chakwiluka nachu hiwamba kenzeyi, nihamba kakuma nyaka yamakonu.

⁴Yesu hakuyakula nindi, Babalenu akenda kayiluwaŋesha kudi antu.

⁵Muloŋa mwijina dami mwakenza amavulu akela nawu, yami Kristu, akaluwaŋesha amavulu.

⁶Mwakatiya nsaŋu jamajita, nimbonji jamajita, ilaŋa dinu bayi mwakaakamaku, muloŋa yumiyi chiŋa yimwekana hohu, hakwinza kukumisha kuchidi kanda.

⁷Muloŋa muza wumu wakanyamuka nakulwa namuza wukwawu, wanta wumu nawanta wukwawu. Kwamba kaholoka nzala ninyitentanshi kweŋi nakweŋi.

⁸Ilaŋa yuma yejimiyi diyi yihuŋu yakutachika.

⁹Henohu akayihanahana mwakamoni yihuŋu, akayŋahola, akayihela kudi nyuza yejima kukoola ijina dami.

¹⁰Henohu amavulu akadimboka, akadifukeja nikuhelaŋana.

¹¹Kwakamwekana atuprofwetu akutwamba amavulu, akaluwaŋesha antu amavulu.

¹²Muloŋa kuluwa chikwakavula, kukeŋa kwawantu amavulu kwakaya nakukeha.

¹³Muntu wakakakela nikunsa diyi wakahanda.

¹⁴Ninsaŋu iyi yawanta yayiwahi akayishimwaŋena mwahita matuŋa ejima mwashakamawu antu, kulonda yakayilili nyuza yejima wunsahu; henohu dihu hakenza kukumisha.

¹⁵Dichi chimwakamona chishimashima chakaletesha mahembi, chanatenuwu kudi kaprofwetu Danyeli, chinemani dehi mwajila; muntu wukutaŋa ashinshiki;

¹⁶henohu antu akekala muYudeya akatemukili kumapidi;

¹⁷muntu wakekala hewulu detala bayi akasuluka nakwidisha yuma yamwitaladinduku;

¹⁸nimuntu wakekala mwiha bayi akafunta nakunona kahuma kinduku.

¹⁹O yihuŋu yakamonawu akekala namavumu niakaamwisha hamafuku owu!

²⁰Lombenu kulonda chimwakatemuka chakabuli kwikala hamashika hela hasabata.

²¹Muloŋa henohu hamba kekala lukadi lwasweja, lwakwila kufumisha kutachi yamatuŋa kushika nikulelu, kanda alumonaŋahu dehi, hela kumbidi hiyamba kalumona cheŋuku.

²²Neyi akabula kukehesha wena mafuku owu, hikwakekala antu akahandaku. Ilaŋa mafuku owu akayikeheshela hanyijimba yawatondewa.

²³Henohu neyi akayila kudi antu nawu, Talenu, Kristu wudi kunu; hela nawu, kuna; bayi mwaketiyaku.

²⁴Muloŋa mwakenza aKristu akutwamba niatuprofwetu akutwamba, akaleja antu yinjikijilu yamaneni niyuma yakuhayamisha, kulonda akeseki kuluwaŋesha hela aweni atondewa, neyi chinatwesheki.

²⁵Tiyenu, nayilejaŋahu dehi.

²⁶Dichi neyi akayila nawu, Talenu, ona wudi mwisaŋona; bayi mwakaya mwoku. Hela nawu, Talenu, iwu wudi mukapekiwu; bayi mwaketiyaku.

²⁷Muloŋa china chakenaŋa nvula kumusela yimwekana nikumujika, dichi chamba kela nihamba kenzayi Mwana kamuntu.

²⁸Kunafwili kanyama diku kukupompela makubi.

²⁹Mafuku akalondashana mulukadi olu chakadi nikuleha, itaŋwa dakeyila, nikakweji hikakatoŋekaku, nitutumbwa twakaholoka mwiwulu, niŋovu jamumawulu jakakanka.

³⁰Kulondela henohu, mwiwulu mwakamwekana chinjikijilu chaMwana kamuntu; kulondela henohu, nyuza yahamaseki yejima akatumpa, akamona Mwana kamuntu wudi nakwinza hamavu amwiwulu, naŋovu nilubanji lwakulema kwakweni.

³¹Wakatemesha aŋelu jindi nampùŋa yasweja kuvuma, akapompeshi indi atondewa kumpepela jiwana, kufumisha kunsa yewulu yimu, ndo nikunsa yi kwawu.

³²Dichi kwatilenu maana kumutondu wachikuyu. Chiwelaŋa neyi mutayi wawu wunovwahi dehi, hiwukusapuka mafu awu, himukwiluka nenu mayinza adi kwakwihi.

³³Dichi ninenu nawa chimwakamona yuma yejimiyi, kelukenu nenu yena wudi kwakwihi, kwokuyisu kachi.

³⁴Nukuyileja chalala nami chisakichi hichakahitaku, chiŋa yuma yejimiyi yinamani.

³⁵Iwulu neseki amba kahita, mazu ami hiyamba kahitaku.

³⁶Ilaŋa itaŋwodu hela mpinji oyu hosi wayilukaku, hela aŋelu amwiwulu, chiŋa Tata hohu.

³⁷Chadiŋi hamafuku aNowa, dichi chakela nihakenzayi Mwana kamuntu.

³⁸Muloŋa chakela neyi mafuku adiŋi akuleta kudibaji, adiilaŋa, anwinaŋa, asumbwilaŋa, asumbwishilaŋa, nikwifuku depililiyi Nowa muwatu,

³⁹nichichenjili dibaji nakuyikumpula wejima wawu, wena kuchiluka nehi; dichi chakela nihakenzayi Mwana kamuntu.

⁴⁰Henohu amayala ayedi akekala mwiha, wumu akamutwala, mukwawu wakashala.

⁴¹Ambanda ayedi akekala kwiyanda, wumu akamutwala, mukwawu wakashala.

⁴²Dichi tonenu, muloŋa himuneluki ifuku dakenzayi Mwanta wenuku.

⁴³Kuminenu dakwiluka nenu neyi mwini itala welukili chilu chikwinza ikombi, mutenowu watoneni, hadi kwiteja kumupundila itala dinduku.

⁴⁴Dichi ninenu nawa babalenu, muloŋa mpinji yimukubula kutoŋojoka diyi yakenzayi Mwana kamuntu.

⁴⁵Indi nduŋu washinshika wukweti maana, anenkuwu kudi nkaka yindi mudimu wakuhemba mukala windi, akenkaŋa akwetala dindi yakudya yawu hayinkelaŋawu hayinkelaŋawu, hinyi?

⁴⁶Owu nduŋu akawanawu nakwila mwenomu hakenzayi mwanta windi, diyi wakakooleka.

⁴⁷Nukuyileja chalala nami wakamwinka mudimu wakuhemba yuma yindi yahetayi yejima.

⁴⁸Ilaŋa neyi kudi nduŋu watama wakela mumuchima windi nindi nkakayami hakulaba,

⁴⁹hakutachika kweta akwawu anduŋu nindi, hakudya nakunwa nawakwakusheta;

⁵⁰nkaka yayenowu nduŋu hakwinza hefukudá kubula kutalilayi, nihampinji yákubula kwilukayi;

⁵¹wakamuvupolachacheni, wakamusha kwijiku dawanfwikiji akadyaloŋa nawu; kwakekala kutumpa nikudisumona kumaji.