Read MUKANDA WANZAMBI MATEU 25 Bible Online

MATEU 25 - MUKANDA WANZAMBI bible

MATEU 25

¹Henohu wanta wamwiwulu akawufwikŋi neyi ikumi dawambanda ajiki asendeli manoŋu awu, hiyakuya nakukinkilila nsumbuli.

²Atanu adiŋi abula maana, atanu adiŋi nama ana.

³Abula maana asendeli manoŋu akadi manji.

⁴Hakwila adiŋi nama ana asendeli manoŋu awu nimanji muyipunda yawu.

⁵Chalabiliyi nsumbuli, hiyakunoŋaoka wejima wawu, akama nitulu.

⁶Mukachi kawufuku hiyakutiya ipumba nawu, Tiyenu, nsumbuli owu! Idikenu muyi nakumukinkilila!

⁷Owu ajiki ejima ahindoka nihohenohu, akombojola nimanoŋu awu.

⁸Abula maana hiyakuyila akweti maana nawu, Twinkenuhu manji, muloŋa manoŋu etu hiyakuya nakujima.

⁹Akweti maana hiyakwakula nawu, Hadaha hitukuwaninaku; yenu mwakadilandili enu aweni kudi alandishaŋa.

¹⁰Hayilaŋawu nakulanda, nsumbuli enza nikwinza; adiŋi nakumutalila eŋila nimumawŋia, enzela nichenzelu.

¹¹Nkumininaku owu ajiki amakwawu hiyakwinza, hiyakwila nawu, Mwanta, Mwanta, twenzulwiluku.

¹²Yena hakuyakula nindi, Nukuyileja chalala nami hinayilukaku.

¹³Dichi dinu tonenu, muloŋa himuneluki hela ifuku hela mpinjuku.

¹⁴Muloŋa chidi neyi muntu wukukeŋa kuya kwituŋa dacheŋi, liakutambika anduŋu jindi, hakuyishiyila yuma yindi.

¹⁵Wumu hakumwinka ntalenta jitanu, mukwawu jiyedi, mukwawu yimu, mwomwesekela Ŋovu jawu; hakuya nimunjila yindi.

¹⁶Hohenohu owu watambwili ntalenta jitanu hakunyamuka, hakuya nakujila ndujola, hakuwaninahu jikwawu jitanu.

¹⁷Chochimu nawa niwatambwili jiyedi, waheteleluhu nawa jikwawu jiyedi.

¹⁸Ilaŋa owu watambwili yimu hakuya nakupunda heseki, hakuswekahu mali ankaka yindi.

¹⁹Chihanalehi nankashi, nkaka yanowu anduŋu hakwinza, hakuchinda mali awu.

²⁰Owu watambwili ntalenta jitanu hakwinza, hakumuletela jikwawu jitanu, nindi, Eyi nkaka, wanyinkeli ntalenta jitanu; tala, naheteluhu jikwawu jitanu.

²¹Nkaka yindi hakumwila nindi, Chachiwahi, wunduŋu wamuwahi washinshika; wunashinshiki nayuma yantesha, nukukwinka wanta wayuma yayivulu; iŋila mumuzaŋalu wankaka yeyi.

²²Watambwili ntalenta jiyedi hakwinza nawa, nindi, Eyi nkaka, wanyinkeli ntalenta jiyedi; tala, naheteluhu ntalenta jikwawu jiyedi.

²³Nkaka yindi hakumwila nindi, Chachiwahi, wunduŋu wamuwahi washinshika; wunashinshiki nayuma yantesha, nukukwinka wanta wayuma yayivulu; iŋila mumuzaŋalu wankaka yeyi.

²⁴Watambwili ntalenta yimu hakwinza nawa, nindi, Eyi nkaka, nakwilukili nami wumuntu wakala, wamunaŋa kuwabulili kukuwa, wakuŋulaŋa kuwabulili kumwaŋila.

²⁵Dichi natiyili woma, hinukuya nakuvumbika ntalenta yeyi heseki, tala, yuma yeyi iyi.

²⁶Nkaka yindi hakumwakula nindi, Eyi nduŋu watama wakatala, welukili neyi namunaŋa kunabulili kukuwa, nakuŋulaŋa kunabulili kumwaŋila;

²⁷walekelelidi kusha mali ami mubanki, kulonda ichi chinenzi nitambuli yami niyakulunjikahu?

²⁸Dichi mutambulenu ntalenta yadiŋi nayu, mwinki wukweti ntalenta ikumi.

²⁹Muloŋa wukweti akamwinka, wakaheta yayivulu; hakwila wabula akamutambula ninaka kadiyi naku.

³⁰Iwu nduŋu wamukunkulwayi múumbilenu kumwidima wahanzi; kwakekala kudila nakudisumona kumaji.

³¹Ilaŋa chakenzayi Mwana kamuntu nalubanji lwakulema kwindi, hamu nawaŋelu jindi ejima, wakashakama hetanda dawanta dakulema kwindi.

³²Akapompesha nyuza yejima kumesu indi; wakaambola muza namuza, neyi chaambulaŋayi kabiŋa anyikoku nawampembi.

³³Anyikoku wakayisha kuchikasa chindi chachidiilu, ampembi kuchimunswa.

³⁴Henohu Mwanta wakayila akuchikasa chindi chachidiilu nindi, Inzenu enu anakoolekeshuwu kudi Tata yami, swanenu wanta wenu wayiloŋesheleluwu kufumisha haaliluwu chikuku champata yamunu mwishina.

³⁵Muloŋa hinatiyili nzala, enu mwanyinkeli yakudya; hinatiyili mpwila, enu mwanyinkeli yakunwa; hinadiŋi mwenyi, enu mwantambwili;

³⁶hinadiŋi nawuvu, enu mwanvwikili; hinakatili, enu mwenjili nakuntala; hinadiŋi mukaleya enu mwenjili kudami.

³⁷Henohu aloŋa akamwakula nawu, Mwanta, ifukwinyi twakumweni nanzala, etu tukudiishi? hela nampwila, etu tukunwishi?

³⁸Ifukwinyi twakumweni nawenyi, etu tukutambuli? hela nawuvu, etu tukuvwiki?

³⁹Ifukwinyi twakumweni nakukata hela mukaleya, etu twinzi kudeyi?

⁴⁰Mwanta wakayakula nindi, Nukuyileja chalala nami, chimwakalakeleli mana kwami wumu, chalala yowu wadiŋi wakehelamu, mwakalakelelami.

⁴¹Henohu wakayila akuchikasa chachimunswa nindi, Nfumenu enu mwashiŋcwa, yenu mukesi kahaya nyaka kaloŋesheleluwu diyabolu nawaŋelu jindi.

⁴²Muloŋa hinatiyili nzala, enu kunyinka yakudya nehi; hinatiyili mpwila, enu kunyinka yakunwa nehi;

⁴³hinadiŋi mwenyi, enu kuntambula nehi; hinadiŋi nawuvu, enu kunvwika nehi; hinakatili, nihinadiŋi mukaleya, enu kwinza nakuntala nehi.

⁴⁴Henohu niwena nawa akaakula nawu, Mwanta, ifukwinyi twakumweni nanzala, hela nampwila, hela nawenyi, hela nawuvu, hela nakukata, hela mukaleya, etu tubuli kukukalakela?

⁴⁵Henohu hakuyakula nindi, Nukuyileja chalala nami, chimwabulili kukalakela wumu wahadi awa akehelamu, mwabulili kukalakelami.

⁴⁶Wenawa akaya kwawu mukubabesha kwahaya nyaka; aloŋa akaya muwumi wahaya nyaka.