Read MUKANDA WANZAMBI MATEU 26 Bible Online

MATEU 26 - MUKANDA WANZAMBI bible

MATEU 26

¹Chelili Yesu nakumishi dehi mazu ejimawa,

²hakuyila atumbanji twindi nindi, Muneluki chimukuhita mafuku ayedi hipaseka, akahana Mwana kamuntu amupopeli kukulusu.

³Henohu awakulumpi jawatupristu niakulumpi jawantu anapompi dehi kuchipaŋu chakapristu muneni, ijina dindi Kayafwasi.

⁴Hiyakumusha-kamina Yesu hampùŋa, kulonda amukwati mwakudimbana, amujahi.

⁵Hivakwila nawu, Bayi mumafuku achawija aku, antu akenza kaleta ipumba.

⁶Chadiŋiyi Yesu muBetani, mwitala damukwambumba Shimona,

⁷kudi yena hikukwinza mumbanda, namalasha abadika kulema wuseya muchipunda chelola dalubanji; hakuyihuŋunwina kunamutu windi, iku nashakami nakudya.

⁸Ilaŋa tumbanji chana chimonuwu hiyakutiya kutama nankashi nawu, Nayikisaŋenidi chenichi?

⁹Malashawa, neyi ayilandisha, adi kufwika wuseya weneni, ayinki atuzweŋi.

¹⁰Yesu chanachilukiyi hakuyila nindi, Mukumu kabishiladi mumbanda? Nankoŋeli mudimu wawuwahi.

¹¹Muloŋa tuzweŋi mwekala nawu mafuku ejima, ilaŋa ami hinidi nenu mafuku ejimaku.

¹²Muloŋa ichi chanahuŋunwiniyi malashawa hamujimba wami, nalondi kunloŋeshela kunjiika.

¹³Nukuyileja chalala nami, mumatuŋa ejima amba kashimunawu iyi nsaŋu yayiwahi, amba katena nawa ninichichuma chaneliyi mumbandiwu, kulonda kumwanakana nachu.

¹⁴Henohu wumu wahekumi nayedi, ijina dindi Yudasi Isakaroti, hakuya kudi awakulumpi jawatupristu,

¹⁵nindi, Mukwiteja kunyinkadi kulonda nakamuhani kudenu? Wena hiyakumwesekela makumi asatu amali asiliva.

¹⁶Kufuma henohu hakukeŋa hatela kumuhenena.

¹⁷Dichi hefuku damuchimu damankendi akadi iluŋi, atumbanji hiyakwinza kudi Yesu nawu, Wunakeŋi kudiila paseka kudihi, kulonda tuloŋeshi?

¹⁸Yena hakuyila nindi, Yenu muŋanda, mukuwana muntu wumu, mumwili nenu, Nkuluŋaŋa nindi, Mpinji yami yinashi ki dehi kwakwihi; nakeŋi kwinza kwitala deyi nidiiluku paseka hamu nawatumbanji twami.

¹⁹Atumbanji hiyakwila mwayilejeliyi Yesu, hiyakuloŋesha paseka.

²⁰Dichi chikuneli melela hakushakama nakudya hamu nawatumbanji ikumi nayedi.

²¹Hadiŋi nakudyawu hakwila nindi, Nukuyileja chalala nami hadi mwinenu wumu wukunfukeja.

²²Wena hiyakusweja kuneŋa nankashi, hiyakutachika kumwila wejima wawu nawu, Mwanta, yami tahindi?

²³Yena hakwakula nindi, Muntu wudi nakutanta nanami mucheŋa, diyi wukunfukeja.

²⁴Mwana kamuntu hakuya mwomwamusonekeleluwu, ilaŋa o yihuŋu yakamonayi owu muntu wukufukeja Mwana kamuntu! Owu muntu neyi havwalikiluku, mutenowu chawahili.

²⁵Yudasi, wamufukejeli, hakwakula nindi, Rabi, yami tahindi? Yena hakumwila nindi, Mwomu muwunahoshi.

²⁶Hadiŋi nakudyawu, Yesu hakunona dinkendi, hakukisula nkisu, hakudihumuna, hakuyinka atumbanji nindi, Tambulenu mudyi, weniwu diwu mujimba wami.

²⁷Hakunona lupasa, hakusakilila, hakuyinka nindi, Nwenumu wejima wenu;

²⁸muloŋa diwu mashi ami achitiyaŋenu, akupwekela antu amavulu kulonda kuyanakena nachu nyiloŋa.

²⁹Nukuyileja nami, kufuma hanu hinukunwa cheŋi yanyikabu yamuvinyuku, kuyinwa chiŋa ifuku dinakanwa nenu yayiha muwanta waTata yami.

³⁰Chanembuwu kamina, hiyakwidika, hiyakuya kumpidi yaOliveta.

³¹Henohu Yesu hakuyileja atumbanji twindi nindi, Wufuku iwu wejima wenu mukudimboka hansaŋu yami; muloŋa anasoneki nawu, Nakatapa kabiŋa, nyikoku yeyinda akayipalaŋesha ndu-ndu.

³²Chinakela nasaŋuki dehi mudi afu, nakayaloŋahu dehi kuŊaliliya.

³³Petulu hakumwakula nindi, Neyi antu ejima akudimboka hansaŋu yeyeyi, ami kwami hinamba kadimbukaku.

³⁴Yesu hakumwila nindi, Nukukuleja chalala nami wufuku iwu, hakela ikombu kanda edi kili, eyi wakadikala kasatu neyi hinamwiluka Yesuku.

³⁵Petulu hakumwila nindi, Hela kufwa naneyi, ami hinakadikaleyuku. Niatumbanji ejima ahosheli mwomumu nawa.

³⁶Henohu Yesu hakuya chimu nawu kwatenaŋawu nawu ŋesemani; hakuyila atumbanji twindi nindi, Shalenu kunu, ami niyi nakulomba kuna.

³⁷Hakuya naPetulu nianyana kaZebedewu ayedi, hakutachika kuneŋa kwakutiya nikumuchima bwi.

³⁸Henohu hakuyila nindi, Muchima wami wunaneŋi chakubadika, neyi keŋa nifwi; shalenu kunu, mutoneni hamu nanami.

³⁹Hakuswila kumbidi chanti, hakudinata chamesu heseki, hakulomba nindi, Eyi Tata yami, neyi chinatwesheki itejaku lupasa lunu lunfumi; hela chochu, bayi chinakeŋamuku, chiŋa chiwunakeŋeyi.

⁴⁰Hakwinza kudi atumbanji kuyiwana adi namutulu; hakumwila Petulu nindi, Aka! kutwesha kutonena hamu nanami hela mpinji yimu nehi?

⁴¹Tonenu mulombi, kulonda mubuli kwijila mukweseka; spiritu chalala yinakeŋi, ilaŋa mujimba wunazeyi.

⁴²Hakufumaku cheŋi kamuchiyedi, hakulomba nindi, Eyi Tata vami, neyi lupasilu kutwesha kunfuma nehi, chiŋa nilwinwa hohu, kumina dakwila muwunakeŋi.

⁴³Hakwinza cheŋi, kuyiwana saŋa akaminawu tulu, muloŋa mesu awu alemeni natulu.

⁴⁴Hakuyishiya cheŋi, hakufumaku, hakulomba kamuchisatu, hakuhosha cheŋi mazu wowamu.

⁴⁵Hakwinza kudi atumbanji twindi, hakuyila nindi, Kamenu tulu twenu munooki; talenu, mpinji yami yinashi ki dehi kwakwihi, Mwana kamuntu hiyakumuhana kumakasa awakwanshidi.

⁴⁶Nyamokenu tuyenu; talenu, wukunfukeja hadi kwakwihi.

⁴⁷Iku wuchidi kuhosha, kukasumuka Yudasi wahekumi nayedi nenzi dehi, nezaza dawantu dadeni, anasendi nimpoku jatubali ninyitondu, anafumi kudi awakulumpi jawatupristu nikudi awakulumpi jawantu.

⁴⁸Yena wamufukejeli wayileja dehi chinjikijilu nindi, Yowu nakapwepula, diyi mwakakwata.

⁴⁹Hohenohu hakwinza kudi Yesu, hakumwila nindi, Kolenu Rabi. Hakumupwepujola.

⁵⁰Yesu hakumwila nindi, Eyi mukwetu, ilaku chiwunenjili. Dichi enza nikwinza, amukwata nikumukwata, hiyakumutwala.

⁵¹Kutala mwinawu wumu wadiŋi naYesu, hakwolola chikasa chindi, hakuhola mpoku yindi yakabali, hakutapa nduŋu yakapristu muneni kutapa kwakumuketula itu dindi.

⁵²Yesu hakumwila henohu nindi, Somekaku cheŋi mpoku yeyi yakabali muchindalu chayu; muloŋa antu ejima akukwata kumpoku yakabali akafwa kumpoku yakabali.

⁵³Eyi wunatoŋojoki neyi ami nikaŋanyi kumulembelela Tata yami, antemesheli katatakichi aŋelu akubadika nyikanka ikumi nayiyedi?

⁵⁴Indi nyikanda yajila yelawu nawu dichi chakelawu, yakalumbulukila hadihi?

⁵⁵Yena mpinji oyu Yesu hakuyila mazaza awantu nindi, Munenzi nakunkwata nampoku jatubali ninyitondu! Ami niikombi? Nashakamini mutembeli hefuku hefuku nakuleja antu, enu kunkwata nehi.

⁵⁶Ilaŋa yuma yejimiyi yinalondi nyikanda yawatuprofwetu yajila yakalumbuluki. Hohenohu atumbanji ejima amushiya nikumushiya, atemoka nikutemoka.

⁵⁷Awa akwatili Yesu amutweli kwitala dakapristu muneni Kayafwasi, kwadipompela dehi ansoneki nawawakulumpi.

⁵⁸Ilaŋa Petulu wamulondeleli munyima kwakulehi, lwe nikuchipaŋu chakapristu muneni, hakushakama nawatupita, kulonda atali muchakakumina.

⁵⁹Dichi awakulumpi jawatupristu, niakwachota ejima, hiyakukeŋakeŋa nsaŋu yakumutwambila Yesu, kulonda amujahi nachu;

⁶⁰hiyayimwenuku, hela kwenjili ayinsahu akutwamba amavulu. Nkumininaku hikukwinza ayedi,

⁶¹elili nawu, Iwu iyala welaŋa nindi, Ami nukutwesha kusanda tembeli yaNzambi, hinukuyituŋa cheŋi mumafuku asatu.

⁶²Kapristu muneni hakwimana, hakumwila nindi, Eyi niizu diwukwakula nehi? Iyi yuma yidi nakukushimunawu hiyumanyi?

⁶³Yesu saŋa amwenenayi zo. Kapristu muneni hakumwila nindi, Nakusanyikishi Nzambi wamumi, tuleji neyi yeyi Kristu, Mwana kaNzambi.

⁶⁴Yesu hakumwila nindi, Mwomwenomu muwunahoshi; nukuyileja nami, mwamba kamona Mwana kamuntu nashakami kuchikasa chachidiilu chaŋovu, hakwinza hamavu amwiwulu.

⁶⁵Kapristu muneni hakutabola mahinindi nindi, Nahoshi mazu akutuka Nzambi, tukukeŋeladi nawa ayinsahu amakwawu? Enu aweni munatiyi chanatukaniyi.

⁶⁶Munatoŋojoki ŋahi? Wena hiyakwakula nawu, Nateli kufwa.

⁶⁷Hohenohu hiyakumufwŋila mazeŋi kumesu indi, hiyakumweta makonyi, amakwawu hiyakumweta makahi,

⁶⁸nawu, Eyi Kristu, tuprofweteli, nakweti hinyi?

⁶⁹Henohu Petulu nashakami muchipaŋu hanzi; kudi yena hikukwinza chaŋadima wumu, hakumwila nindi, Eyi nawa wadiŋi naniwu kaŊaliliya Yesu.

⁷⁰Yena hakudikala kumesu awu wejima wawu nindi, Ichi chiwunahoshi ami kwami kuchiluka nehi.

⁷¹Chanedikiyi mwikeki, mukwawu nawa hakumumona, hakuyila owu adiŋuku nindi, Iwu muntu niyena wadiŋi nakaNazareta Yesu.

⁷²Hakudikala cheŋi nikusanyika chikupu nindi, Yeniwu muntu ami kwami hinamwilukaku.

⁷³Chihanahiti kapinji kantesha antu emenuku hiyakwinza, hiyakumwila Petulu nawu, Chalala yeyi mwinawu; muloŋa idimi deyi dinakushimuni.

⁷⁴Hohenohu atachika nikudishiŋola nikusanyika chikupu nindi, Yeniwu muntu ami kwami hinamwilukaku. Hohenohu ikombu edikila nikwidikila.

⁷⁵Petulu hakwanuka izu damwililiyi Yesu nindi, Eyi wakadikala kasatu hakela ikombu kanda edi kili. Hakwidika nakudila nankashi.