Read MUKANDA WANZAMBI MATEU 27 Bible Online

MATEU 27 - MUKANDA WANZAMBI bible

MATEU 27

¹Dichi chikuneli budidi, awakulumpi jawatupristu ejima, niakulumpi jawantu hiyakumushakamina Yesu hampùŋa, kulonda amujahi;

²hiyakumukasa, hiyakumutwala nakumuhana kudi nguvulu Pilatu.

³Henohu owu Yudasi wamufukejeli, chamweniyi anamuhishi dehi, hakubalumuka mumuchima windi, hakufuntisha cheŋi owu mali asiliva makumi asatu kudi awakulumpi jawatupristu nikudi awakulumpi,

⁴nindi, Chinafukeji mashi akadi muloŋa navulumuni. Wena hiyakumwila nawu, Nsaŋu yetu wanyi; oji jeyi.

⁵Hakunatila owu mali asiliva mutembeli, hakufumaku, hakuya nakudikudika.

⁶Akulumpi jawatupristu hiyakunona owu mali asiliva, hiyakwila nawu, kuyisha mwaswekelaŋawu mali ajila chinjila, muloŋa hiwuseya wamashi.

⁷Hiyakutiyaloŋana, hiyakulanda nachu kapata kakaŋemi, kulonda ajiikaŋamu enyi.

⁸Dichi kapatoku hiyakukatumba ijina nawu, Kapata kamashi; nikwifuku dalelu.

⁹Henohu mwahosheliyi kaprofwetu Yeremiya mwalumbulukili, mweliliyi nindi, Anoneni mali asiliva makumi asatu, diwu wuseya wayena esekeleluwu, wuseya wafuukwiluwu kudi aIsarela;

¹⁰alandili nachu kapata kakaŋemi, mwomwanlejeliyi Yehova.

¹¹Yesu hakwimana kumesu anguvulu; nguvulu hakumwihula nindi, Eyi yeyi Mwanta wawaYudeya, tahindi? Yesu hakumwila nindi, Mwomwenomu muwunahoshi.

¹²Chamwinkeluwu muloŋa kudi awakulumpi jawatupristu nikudi awakulumpi, haakwili izuku.

¹³Pilatu hakumwila henohu nindi, Iyi yuma yayivulu yidi nakukushimunawu hiwunayitiyuku?

¹⁴Hamwakwili hela izu nidimuku; nguvulu hakuhayama nankashi.

¹⁵Dichi hachawija ochu nguvulu wombililaŋa antu muntu wamukaleya wumu akutondawu.

¹⁶Henohu adiŋi namuntu wamukaleya wumu watiyakana, ijina dindi Baraba.

¹⁷Dichi chanapompuwu, Pilatu hakuyila nindi, Munakeŋi niyumbilinyi? Baraba, tahindi Yesu atenaŋawu nawu Kristu?

¹⁸muloŋa welukili nindi anamuheni ichima danatiyuwu.

¹⁹Chanashakamiyi hetanda dakusompela, Iŋodindi hakumutemeshela muntu nindi, Bayi wukwata hansaŋu janowu muntu waloŋaku, muloŋa nsaŋili yindi lelu nayimweni yuma yakala yayivulu mukulota.

²⁰Akulumpi jawatupristu niakulumpi hiyakukanjikŋa mazaza alombi Baraba, Yesu amujahi.

²¹Nŋuvulu hakuyakula nindi, Awa ayedi munakeŋi niyumbiluhu wumwodihi? Nawu, Baraba.

²²Pilatu hakuyila nindi, Indi Yesu atenaŋawu nawu Kristu nukumwila ŋahi? Wejima wawu nawu, Amupopeli kukulusu.

²³Yena nindi, muloŋanyi? Chuma chatama chanakoŋiyi chumanyi? Wena asweja nikubideka nawu, Amupopeli kukulusu.

²⁴Pilatu chanamoniyi nayikaŋanyi dehi, hihakusweja niipumba, hakutambula meji, hakwisuka kumakasindi, iku izaza didi nakumutala, nindi, Ami hinidi namuloŋa wamashi aniwu muntu waloŋaku; hinsaŋu yenu.

²⁵Antu ejima hiyakwakula nawu, Mashi indi atukumini etu aweni nawanyanetu.

²⁶Ayumbilaku niBaraba. Chanamuvupoliyi Yesu yikoti, hakumuhana nindi amupopeli kukulusu.

²⁷Mashidika anguvulu hiyakumutwala Yesu mwibulu dawu, amupompeshela nichendu chejima.

²⁸Amuvúula nimahinindi, hiyakumuvwika ihina dawusombu;

²⁹atuŋa nichibaaba chanyiŋa, hiyakuchisha kunamutu windi; amusha niiteti muchikasa chindi chachidiilu, hiyakumufukamina, hiyakumuseha nawu, Kolenu, Mwanta wawaYudeya!

³⁰Hiyakumufwŋila mazeŋi, hiyakumutambula cheŋi iteti odu, hiyakumweta nachu kunamutu.

³¹Chanamanishuwu kumuseha, hiyakumuvúula odu ihina damuvwikiluwu, hiyakumuvwika cheŋi mahinindi, hiyakumutwala nakumupopela kukulusu.

³²Hadiŋi nakwidikawu, hiyakuwana muntu wakuKireni, ijina dindi hiihina davwelaŋa anyanta. Shimona, hiyakumukwata nawu amusendeluku kulusu yindi.

³³Chanashikuwu kwatenaŋawu nawu, Goloŋota; chaya mukwila nawu Kuchaŋu;

³⁴hiyakumwinka walwa wabatuka wabombashana nandulu anwi; chanawutompiyi, kuwinwa kwonti kwindi.

³⁵Chanamupopeluwu kukulusu, adipaŋila nimahinindi.

³⁶Hiyakushakama kwenoku nakumuhemba.

³⁷Kwiwulu danamutu windi, ashiluku mukanda wamuloŋa wamwinkeluwu; awusonekeli nawu, Iwu diyi Yesu Mwanta wawaYudeya.

³⁸Henohu apopeleli kumakulusu chimu nayena atupondu ayedi, wumu kuchikasa chindi chachidiilu, mukwawu kuchimunswa.

³⁹Hiyakunamutukola kudi antu ahitilaŋaku, hiyakumulembola nanyitu yawu,

⁴⁰nawu, Eyi wasandaŋa tembeli, hiwukuyituŋa cheŋi mumafuku asatu, damwini; neyi wuMwana kaNzambi, sulukaku kukulusu.

⁴¹Niawakulumpi jawatupristu amuseheli nawa mwomumu, niansoneki niakulumpi,

⁴²elili nawu, Waamwinini akwawu, yomweni hanatweshi kudamwinaku. Yena hiMwanta wawaIsarela asuluki kukulusu katataka, tumwitiyi.

⁴³Wakuhwelelaŋa Nzambi; neyi namukeŋi amupulwishi katataka; muloŋa yena welaŋa nindi ni mwana kaNzambi.

⁴⁴Niatupondu, apopeleluwu kumakulusu chimu nindi, amuhosholeli nawa mwomumu.

⁴⁵Dichi kufuma kuora yamuchitanu nayimu, mwituŋa dejima mushishita nimwidima, kushika nikuora yamuchitanu nachiwana.

⁴⁶Chelili neyi hikwakwihi naora yamuchitanu nachiwana, Yesu hakubilela nezu daŊovu nindi, Eli, Eli, lama sabakatani; chaya mukwila nawu, Nzambi yami, Nzambi yami, wunanshiyilidi kanka wami?

⁴⁷Amakwawu emenuku, chanachitiyuwu, hiyakwila nawu, Iwu iyala hakutambika Elija.

⁴⁸Wumu hakunyakala kunona siponja, hakuyisha muwalwa wabatuka hakuyisha kwiteti, hakumwinka nindi anwi.

⁴⁹Anashali nawu, Leka tutali neyi Elija wukwinza nakumwamwina.

⁵⁰Yesu hakubilela cheŋi nezu daŊovu, yotula niwumi windi.

⁵¹Ihina dadiŋi dakujika mutembeli mwajila ditabuka nihakachi, kufumisha kwiwulu ndo nikwishina; maseki hiyakukanka, nimalola hiyakubaloka;

⁵²kumajamu hikukwenzuluka; akwakujila akamini dehi tulu amavulu hiyakusaŋuka nanyijimba yawu.

⁵³Helili Yesu nasaŋuki dehi hiyakwijila muŋanda yajila, hiyakumwekana kudi antu amavulu.

⁵⁴Senturinu ninowu ahembelaŋa yinawu Yesu, chanamonuwu mutentanshi niyuma yahitiluku, hiyakutiya woma nankashi, nawu, Chalala iwu wadiŋi Mwana kaNzambi!

⁵⁵Kwadiŋi ambanda amavulu emeni kwakulehi nakumutala, wowu afumini naYesu kuŊaliliya, amukalakelelaŋa.

⁵⁶Hadiŋi niMariya Mandaleni, ni Mariya mama yaYakoba naYosesi, nimama yawanyana kaZebedewu.

⁵⁷Chikuneli melela hikukwinza muntu waheta, wafumini kuAramateya, ijina dindi Yosefu, niyena nawa wadiŋi kambanji kaYesu.

⁵⁸Yena muntu iwu hakuya nakulomba mujimba waYesu kudi Pilatu; Pilatu hakuyila nindi mwinkenuwu.

⁵⁹Yosefu hakutambula mujimba, hakuwujiŋajiŋa mwihina ditooka dakadi majilu,

⁶⁰hakuwukamika mwijamu dindi dadiha dapokweliyi yomweni mwilola; kuchisu chejamu hakukunkumwinaku ilola deneni, hakufumaku.

⁶¹NiMariya Mandaleni wadiŋi kwoku, niMariya mukwawu, ashakamini nakutala mesu kwijamu.

⁶²Chashikili ifuku dalondelaŋa mwifuku dakuloŋesha paseka, awakulumpi jawatupristu niaFwarisi hiyakupompa kudi Pilatu,

⁶³nawu, Eyi Mwanta tunaanuki dehi netu iwu mukwakudimbana hadiŋiyi wamumi welilaŋa nindi, Neyi munahiti dehi mafuku asatu nakasaŋuka mudi afu.

⁶⁴Dichi lejenu antu akakoleshi kwijamu kushika nikwifuku damu chisatu, mukunkulwayi atumbanji twindi akenza nakumwiyamu, akaleja antu nawu nasaŋuki mudi afu; kuluwaŋesha kwakukuminina kwakabadika kwakusambila.

⁶⁵Pilatu hakuyila nindi, Mashidika akwakuhemba mudi nawu, yenu mwakakoleshuku mwonsu mumunatwesheli.

⁶⁶Dichi wena hiyakuya, hiyakukolesha kwijamu, hiyakusha chilamiki kwilola, mashidika akwakuhemba saŋa aduwu nawu.