Read MUKANDA WANZAMBI MATEU 3 Bible Online

MATEU 3 - MUKANDA WANZAMBI bible

MATEU 3

¹Wena mafuku owu hikukwinza Yowanu Mpapatishu nakushimuna mwisaŋa damuYudeya,

²nindi, Balumukenu munyichima yenu, muloŋa wanta wamwiwulu wunashiki dehi kwakwihi.

³Diyi atenenuwu mudi kaprofwetu Isaya nawu, Izu damukwakubilela mwisaŋa nindi, Loŋeshenu njila yaYehova, ololenu njila jindi jatulolu.

⁴Yowanu wavwelaŋa mahina amavuji anŋameli, nimwonji wachikaba mumayindi, kudya kwindi wadiilaŋa tubola niwuchi wamwisaŋa.

⁵Dichi antu akuYerusalema, niamuYudeya mwejima, niakumpata yejima yanyeŋumuka Yodana, hiyakuya kudi yena;

⁶hiyakuyipapatisha kudi yena mukaloŋa Yodana, hiyakwiteja mwavulumwinuwu.

⁷Chanamoniyi aFwarisi nawaSadusi amavulu hiyakwinza kuchipapatishu chindi, hakuyila nindi, Enu anyana katubandayula, nayileji kutemuka kuzuwa kwamba kenza hinyi?

⁸Soŋenu nyikabu yatelela kubalumuka mumuchima.

⁹Bayi mutoŋojoka kuhosha munyichima yenu nenu, Tukweti nkakulula yetu Abarahamaku. Tiyenu niyileji, Nzambi natweshi kutetula mumalolawa anyana kaAbarahama.

¹⁰Katataka anashi dehi chizembi kunyiji yanyitondu, dichi nyitondu yejima yikubula kusoŋa nyikabu yayiwahi akuyitemamu, akuyinatila mukesi.

¹¹Chalala ami nidi nakuyipapatisha mumeji kulonda mubalumuki munyichima; ilaŋa owu wukwinza munyima yami wambadika Ŋovu, nkwabilu jindi ami kutela kujisenda nehi; yena wakayipapatisha mudi Spiritu Wajila nimukesi.

¹²Muchikasa chindi mudi lwalu; wakatookesha mwitala dindi dakuhulila, to-o chikupu; wakapompeshela tidiku munkalaŋa, hakwila mafulu wakayocha mukesi kakajimaŋa, bwi-i chikupu.

¹³Henohu Yesu hakufuma kuŊaliliya, hakwinza kuYodana kudi Yowanu, kulonda akamupapatishi kudi yena.

¹⁴Yowanu wakeŋa eli kumulekesha nindi Ami yami nateli kumpapatisha kudeyi, indi eyi winzi kudami?

¹⁵Ilaŋa Yesu hakumwakula nindi, Kumina dakwiteja katataka, muloŋa dichi chinatuteleli, kulonda kuwanisha kuloŋa kwejima. Hakumwiteja.

¹⁶Yesu chanamupapatishuwu, hohenohu azambuka nimumeji. Kutala mawulu hiyakumwenzulukila, hakumona Spiritu yaNzambi wudi nakusuluka neyi katela, hakuwila hadi yena.

¹⁷Kutiya mumawulu himukufuma izu nindi, Diyi Mwanami nakeŋa, natiyaloŋa kuwaha nankashi mudi yena.