Read MUKANDA WANZAMBI MATEU 4 Bible Online

MATEU 4 - MUKANDA WANZAMBI bible

MATEU 4

¹Henohu Yesu hiyakumutwala mwisaŋa kudi Spiritu, kulonda akamweseki kudi diyabolu.

²Cheliliyi naleki dehi kudya mafuku makumi awana nimwaana niwufuku, kukumininaku hakutiya nzala.

³Mukwakweseka hakwinza kudi yena, hakumwila nindi, Neyi eyi wuMwana kaNzambi, hoshaku neyi malolawa abalumuki mankendi.

⁴Yena hakwakula nindi, Anasoneki nawu, Muntu hakuhanda namankendi hohuku, chiŋa namazu ejima akufuma mukanwa kaNzambi.

⁵Diyabolu hakumutwala muŋanda yajila; hakumusha hewulu dambaŋu yatembeli,

⁶hakumwila nindi, Neyi eyi wuMwana kaNzambi dinati mwishina, muloŋa anasoneki nawu, Wakakulejela aŋelu jindi; wena akakwaka namakasawu wakenza kahuma mwendu weyi kwilola.

⁷Yesu hakumwila nindi, Anasoneki cheŋi nawu, Bayi wakamweseka Yehova Nzambi yeyuku.

⁸Diyabolu hakumutwala cheŋi hampidi yayilehi nankashi, hakumuleja mawanta ampata yamunu mwishina ejima, ni kulema kwawu;

⁹hakumwila nindi, Neyi wukudinata heseki nakudifukula kudami, nukukwinka yuma yejimiyi.

¹⁰Yesu hakumwila nindi, Fumaku eyi Satana, muloŋa anasoneki nawu, Kadifukulaŋa kudi Yehova Nzambi yeyi, wakakalakelaŋa yena hohu kanka windi.

¹¹Henohu diyabolu hakumushiya; kutala aŋelu hiyakwinza nakumukalakela.

¹²Yesu chanatiyiyi nawu Yowanu anamukwati, hakufumaku hakuya muŊaliliya.

¹³Chanafumiyi kuNazareta, hakuya nakushakama kuKaperinawu wudi kwijiya, muŋinza jaZebuluni naNafwatali,

¹⁴kulonda mwahosheliyi kaprofwetu Isaya mulumbuluki,

¹⁵mweliliyi nindi, Ituŋa daZebuluni niituŋa daNafwatali, kumbadi yejiya, kwishinadi daYodana, Ŋaliliya yawaJentili;

¹⁶antu ashakamini mumwidima amweni chejeji chacheni, ninawa ashakamini mwituŋa dawulelu wakufwa amweni kucha.

¹⁷Kufuma henohu, Yesu hakutachika kushimuna nindi, Balumukenu munyichima yenu, muloŋa wanta wamwiwulu wunashiki dehi kwakwihi.

¹⁸Chadiŋi nakwendayi kwijiya daŊaliliya, hakumona amayala ayedi ivumu dawu dimu, iwu Shimona atumbiluwu nawu Petulu, iwu mana kwindi Anderi, adiŋi nakuumba wanda mwijiya, muloŋa adiŋi yibinda yanshi.

¹⁹Hakuyila nindi, Inzenu mumondaŋa niyisukuli wubinda wawantu.

²⁰Hohenohu ashiya nimawandawu, hiyakumulonda.

²¹Hakuswilaku cheŋi, hakumona amayala amakwawu ayedi, niwena nawa ivumu dawu dimu, iwu mwana kaZebedewu Yakoba, nimana kwindi Yowanu, adi muwatu natata yawu Zebedewu, adi nakutuŋiulula mawandawu; hakuyitambika.

²²Hohenohu ashiya niwatu nitata yawu, hiyakumulonda.

²³Yesu hakwendujola mwahita Ŋaliliya yejima nakuyilejaleja mumashikolawu, nikushimuna nsaŋu yawanta yayiwahi, nikuuka nyisoŋu yeŋi nayeŋi, niyikatu yeŋi nayeŋi yadiŋi nawantu.

²⁴Mpuhu yindi yitiyakana nimuSiriya kwejima ti-li-li; niwena hiyakumuletela antu akata ejima, akwachika nyisoŋu yeŋi nayeŋi, niamona yihuŋu, niazakukaŋa ademoni, niakwachinkonya, niakwakalepa; yena hakuyikolesha.

²⁵Mazaza awantu hiyakumulonda, afumini kuŊaliliya, nikuDekapoli, nikuYerusalema, nikuYudeya, nikwishinadi daYodana.