Read MUKANDA WANZAMBI MATEU 5 Bible Online

MATEU 5 - MUKANDA WANZAMBI bible

MATEU 5

¹Chanamoniyi mazaza awantu hakukanduka hampidi; chanashakamiyi atumbanji twindi hiyakwinza kudi yena;

²hakuhosha nakuyileja,

³nindi, Atuzweŋi muspiritu anakooleki, muloŋa wanta wamwiwulu wunekali wawu.

⁴Adilaŋa anakooleki, muloŋa akayikundeja.

⁵Ovwaha anakooleki, muloŋa akaswana mpata.

⁶Atiyaloŋa nzala nampwila yakuloŋa anakooleki, muloŋa akayiikutisha.

⁷Akwaluwi anakooleki, muloŋa akayitiyila luwi.

⁸Atooka munyichima anakooleki, muloŋa akamona Nzambi.

⁹Akwakwambulwila akwawu anakooleki, muloŋa akayitena nawu anyana kaNzambi.

¹⁰Akukabishilawu hansaŋu yakuloŋa anakooleki, muloŋa wanta wamwiwulu wunekali wawu.

¹¹Neyi akayihosha chatama, nakuyikabisha, nakuyituŋaula mazu atama ejima, nikuyitwambila hansaŋu yamami, munakooleki.

¹²Zaŋalalenu, luŋenu chacheni, muloŋa akayisomona masomu amaneni mwiwulu; muloŋa dichi chakabishiluwu niatuprofwetu asambililenu.

¹³Enu yenu muŋwa wahanu heseki, ilaŋa neyi muŋwa wunasamuki akuwutoweja nanka? Hiwukweti nawa cheŋi mudimuku, wakunata tuhu hanzi, awudatoli kudi antu.

¹⁴Enu yenu chejeji champata yamunu mwishina. Mukala wakutuŋila hampidi hiyatweshaŋa kuwujindaku.

¹⁵Hela inoŋu hiyadibutulaŋa adisweka mwibaŋuku, chiŋa kudisha hamesa ditoŋekeli ejima adi mwitala.

¹⁶Ninenu nawa chejeji chenu chitoŋekaŋa kumesu awantu, kulonda amonaŋa nyidimu yenu yayiwahi, alemeshaŋa Tata yenu wudi mwiwulu.

¹⁷Bayi mutoŋojoka nenu ami nenzi nakukisaŋana nshimbi hela mazu awatuprofwetuku; hinenzi nakujikisaŋanaku, nenzi nakujikolesha.

¹⁸Nukuyileja chalala nami iwulu namaseki amba kahita, ilaŋa kajotu hela kepaya[1] hikamba kafuma kunshimbuku, chiŋa yuma yejima yinalumbuluki dehi.

¹⁹Dichi muntu wukumotoka kachuma kamu kinayileji, hakulejamu ni akwawu, muwanta wamwiwulu akamutena nawu wasweja kukeha; hakwila muntu wukwilamu, hakulejamu ni akwawu, muwanta wamwiwulu akamutena nawu muneni.

²⁰Muloŋa nukuyileja nami, kuloŋa kwenu chiŋa kubadika kwawansoneki nikwawaFwarisi, mukunkulwayi himwakatwesha kwijila muwanta wamwiwulu nihantuku.

²¹Munatiyi chayililuwu antu ahashankulu nawu, Kujaha muntu chinjila; nawu, yowu wukujaha muntu keŋa ashiki kukusompesha.

²²Ilaŋa mi nukuyileja nami yowu wukuzuwa namana kwindi keŋa ashiki kukusompesha; yowu wukusoza mana kwindi keŋa ashiki muchota; yowu wukwila nindi, Eyi chisupi, wudi kwakwihi nakumona kesi kakaluŋa kachinana.

²³Dichi neyi wudi nakutwala himulambu weyi kukameŋa, kwenoku hiwukwanuka neyi nidi namuloŋa namana kwami,

²⁴shiyaku himulambu weyi kwenoku kukameŋa, wuyi wusambili kutiyaloŋana namana kweyi; winzi dinu nakuhana himulambu weyi.

²⁵Tiyaloŋana swayi nachilumbu cheyi hiwuchidi nindi munjila, kuchina chilumbu cheyi kukutwala kudi mukwakusompesha, mukwakusompesha hakukuhana kudi kalama, yena hakukusha mukaleya.

²⁶Nukukuleja chalala nami hiwamba kafuma mwokuku, kufumamu chiŋa wunafuti muloŋa wejima, nikadali kanyanya kushalaku nehi.

²⁷Munatiyi cheliluwu nawu, Kwila wuvumbi chinjila.

²⁸Ilaŋa mi nukuyileja nami muntu wukutala mumbanda namesu akumufwila, neli dehi nindi wuvumbi mumuchima windi.

²⁹Neyi disu deyi dachidiilu dikukudimbwisha, ditubuli wudinati; chinawahi chidi cheyi chimu kukisika, hichinawahi kunatila mujimba weyi wejima mukaluŋa kachinanaku.

³⁰Neyi chikasa cheyi chachidiilu chikuku dimbwisha, chiketuli wuchinati; chinawahi chidi cheyi chimu kukisika, hichinawahi mujimba weyi wejima kuya muka luŋa kachinanaku.

³¹Elili cheŋi nawu, Muntu wukuseŋa Iŋodindi, amwinki mukanda wakumuseŋa nachu.

³²Ilaŋa mi nukuyileja nami muntu wukuseŋa Iŋodindi, chiŋa hamuloŋa wawuvumbi hohu, namubalumuni dehi nindi hichivumbi; muntu wukusumbula owu mumbanda analekuwu, neli wuvumbi.

³³Cheŋi nawa munatiyi chayililuwu ankakulula ahashankulu nawu, Kusanyika chakudimbana chinjila, chiŋa wumukoŋela Yehova yiwamusanyikilili.

³⁴Ilaŋa mi nukuyileja nami bayi wusanyika nihantuku; helakutena iwulu, muloŋa hiitanda daNzambi dawanta;

³⁵hela kutena iseki, muloŋa hiitanda dakunyendu yindi; hela kutena Yerusalema, muloŋa hiŋanda yaMwanta muneni.

³⁶Bayi wusanyika hela namutu weyuku, muloŋa hiwukutwesha kutookesha lusuki lumu, hela kwiyilishaku.

³⁷Chimukuhoshaŋa, kuminenu dakwila nenu, Eŋa, eŋa; Nehi, nehi; neyi mukushaku mazu eŋi, chinafumi kudi watama.

³⁸Enu munatiyi cheliluwu nawu, Disu nadisu, ŋi neji.

³⁹Ilaŋa mi nukuyileja nami bayi muleta Ŋovu nawatamaku, muntu wukukweta kwikidi dachidiilu, mushetumwini nidikwawu.

⁴⁰Neyi anakuholokeli kudi muntu nindi atambuli chi kovwelu cheyi, mwiteji atambuli nikahuma keyi nawa.

⁴¹Muntu wukukukakela nindi wuyi nindi mpata yimu, yaku nindi ŋijiyedi nawa.

⁴²Muntu wukukulomba, mwinki; muntu wukukeŋa kusondama kudeyi, bayi wumufutalelaku.

⁴³Munatiyi cheliluwu nawu, Keŋaku mukwenu, helaku chilumbu cheyi.

⁴⁴Ilaŋa mi nukuyileja nami keŋenu ayilumbu jenu, ninawa ayikabishaŋa, yilombelenu;

⁴⁵kulonda mwikali anyana kaTata yenu wudi mwiwulu, muloŋa yena watuntwishaŋa itaŋwa dindi nihadi atama nihadi amawahi, wanokeshaŋa nvula nihadi aloŋa nihadi áheŋa.

⁴⁶Muloŋa neyi mukukeŋa antu ayikeŋaŋa hohu, mwakadiila mwodi? Hidimu mwelaŋa ansonkeshuku?

⁴⁷Neyi mukwimwisha ana kwenu hohu munabadikili akwenu hadihi?

⁴⁸Hidimu mwelaŋa aJentiluku? Dichi enu chiŋa mwikala antu alala chikupu, neyi chadiyi Tata yenu wamwiwulu niyena walala chikupu.