Read MUKANDA WANZAMBI MATEU 6 Bible Online

MATEU 6 - MUKANDA WANZAMBI bible

MATEU 6

¹Babalenu mubuli kuhana yamukunkulu yenu kulonda ayimoni kudi antu. Neyi mukwila ochu himwakamona wufwetu kudi Tata yenu wudi mwiwuluku.

²Dichi neyi wukuhana yamukunkulu, bayi wimbisha mpùŋa kuwukuya, neyi chelaŋawu anfwikiji mumashikola nimunyikwakwaku, nawu atiyakani mpuhu kudi antu. Nukuyileja chalala nami anatambuli dehi wufwetu wawu.

³Ilaŋa eyi, neyi wukuhana yamukunkulu, chikasa cheyi chachimunswa bayi chiluka chikwila chikasa cheyi chachidiiluku;

⁴kulonda yamukunkulu yeyi yiikali yakumbadi, niTata yeyi wamonaŋa kumbadi wakakwinka wufwetu weyi.

⁵Neyi mukulomba, bayi mwilaŋa neyi chelaŋawu anfwikŋuku, muloŋa wena afwila kwimana nakulomba mumashikola, hela kumaakenu anyikwakwa, kulonda ayimoni kudi antu. Nukuyileja chalala nami anatambuli dehi wufwetu wawu.

⁶Ilaŋa eyi chiwukulomba, iŋilaku mwitala deyi damukachi, wenzeluku, wulombi kudi Tata yeyi wudi kumbadi, niTata yeyi wamonaŋa kumbadi wakakwinka wufwetu weyi.

⁷Chimukulomba, bayi muhitulula nakutenatena mwamukunkulwayi, neyi chelaŋawu aJentiluku; muloŋa wena atoŋojokaŋaa nawu akuyitiya nanochu chakuvulishawu mazu.

⁸Dichi enu bayi mwikala neyi wenaku; muloŋa Tata yenu neluki yuma yimunabuli himuchidi kanda mulombi kudi yena.

⁹Tiyenu chimukulombaŋa; lombenuŋa nenu, Tata yetu wekala mwiwulu, ijina deyi dijili.

¹⁰Wanta weyi winzi. Muchima weyi awili hamaseki neyi chawilaŋawu mwiwulu.

¹¹Twinki kudya kwetu kutukukeŋa lelu.

¹²Twanakeni nyikudi yetu, neyi chituna anakeni akweti nyikudi nanetu.

¹³Bayi wututwala mukwesekaku, ilaŋa twamwini kukutama, muloŋa wanta wekala weyeyi, niŋovu, ni kulema, haya nyaka. Amena.

¹⁴Muloŋa neyi mukwanakena antu nyiloŋa yawu, niTata yenu wamwiwulu wakayanakena ninenu nawa.

¹⁵Neyi mukubula kwanakena antu nyiloŋa yawu, Tata yenu niyena hakayanakena nyiloŋa yenuku.

¹⁶Chimukujiŋa nakuleka kudya, bayi mwikala neyi anfwikiji adihombaŋa kumesuku; muloŋa wena atamishaŋa kumesu awu kulonda ayimoni kudi antu nawu anajiŋi nakuleka kudya. Nukuyileja chalala nami anatambuli dehi wufwetu wawu.

¹⁷Ilaŋa eyi, chiwukujiŋa nakuleka kudya, wayishaku namutu weyi, welaku kumesu eyi,

¹⁸kulonda antu abuli kukumona nawu wunajiŋi nakuleka kudya, chiŋa achimoni kudi Tata yeyi wudi kumbadi, niTata yeyi wamonaŋa kumbadi wakakwinka wufwetu weyi.

¹⁹Bayi mudilumbikilaŋa maheta hanu hamasekuku; hamaseki hadi tububu nindala yanoŋeshaŋa, hadi amakombi alokolaŋa matala nakwiya.

²⁰Chiŋa mudilumbikila maheta mwiwulu, mwabula tububu hela ndala yanoŋeshaŋa, mwabula amakombi alokolaŋa matala nakwiya.

²¹Muloŋa kukwikala maheteyi, diku kuwukusha nimuchima weyi nawa.

²²Inoŋu damujimba disu, dichi neyi disu deyi dikutalaŋa mumu ho-o, mumujimba weyi wejima mwakatooka to-o.

²³Iteŋa neyi disu deyi dikutama, mumujimba weyi wejima mwakela mwidima bwi. Dichi neyi chejeji chidi mudeyi chikwikala mwidima, o mwidima chiwukusweja!

²⁴Kwosi muntu natweshi kukalakela anyanta ayeduku; chiŋa yohelahu wumu, akeŋahu mukwawu; hela yokakelahu wumu, mukwawu amudiwula. Himukutwesha kukalakela niNzambi nimahetaku.

²⁵Dichi nukuyileja nami, kwakama wumi wenu nenu tukudyadi? hela nenu tukunwadi? hela mujimba wenu nenu tukuvwaladi? bayi mwakama mwokuku. Wumi hiwabadika kudyaku? Hela mujimba hiwabadika yakuvwalaku?

²⁶Talenu chachiwahi atujila ahaluzwizu, hiyakuwaŋaku, hiyamunaŋaku, hiyaloŋaŋa munkalaŋaku, ayidiishaŋa kudi Tata yenu wekala mwiwulu. Enu himwayibadika nankashi kulemaku?

²⁷Mwinenwinyi wukwila akame-e, anuŋa kuchiminu chindi chikunku chakweseka munkotweli yachikasa yimu?

²⁸Indi dinu, mwaakaminaŋadi yakuvwala. Toŋojokenu wuluya wamwisaŋa chiwakulaŋa; hiwakabakanaŋaku, hiwashintaŋaku;

²⁹ami nukuyileja nami mwalemeneniyi Solomoni mwejima, havweli chakweseka hela nawuluya iwu wumuku.

³⁰Dichi Nzambi wavwikaŋa matahu amwisaŋa chochichi, akwila lelu adi kwoku kumadiki hiyakuyinatila mukesi, abuli kuyivwikenu chakubadika, enu mukweti kukuhwelela kwantesha?

³¹Dichi kwakama nenu, Tukudyadi? tukunwadi? hela nenu, Tukuvwaladi? bayi mwakama mwokuku.

³²Muloŋa yuma yejimiyi diyi yakeŋaŋawu aJentili; Tata yenu wamwiwulu neluki chimunakaankili yuma yejimiyi.

³³Ilaŋa sambilenu kukeŋa wanta windi nikuloŋa kwindi, niyuma yejimiyi akayishilaku.

³⁴Dichi bayi mwakama ifuku dakumadikuku, muloŋa ifuku dakumadiki dikudakama dadeni. Kurama kwefuku dimu kunawani.