Read MUKANDA WANZAMBI MATEU 7 Bible Online

MATEU 7 - MUKANDA WANZAMBI bible

MATEU 7

¹Bayi musompeshaŋa akwenuku, kulonda abuli kuyisompesha ninenu.

²Muloŋa kusompesha kumukusompesha akwenu diku kwakayisompeshawu nachu ninenu; chesekelu chimukuyesekela akwenu dichi chakayesekelawu ninenu.

³Wukutaliladi kachibalu kadi mudisu damana kweyi, kwinza chipamba chidi mudisu deyeyi aweni hiwachimonaŋaku?

⁴Indi wukumwililadi mana kweyi neyi, Tali nikufumishi kachibalu kadi mudisu deyi; indi chipamba chidi mudisu deyeyi aweni?

⁵Eyi nfwikŋi! Sambilaku kufumisha chipamba chidi mudisu deyeyi aweni, mwaka wumoni chachiwahi kufumisha kachibalu kadi mudisu damana kweyi.

⁶Bayi mwinka atuwa yuma yajilaku, hela kunatila aŋulu mperola jenu, akenda kajidatola, hiyakuyibalumukila nakuyisansanya.

⁷Lombenu akuyinka; keŋakeŋenu mukuwana; dondomwenenu akuyenzulwila.

⁸Muloŋa ejima akulomba akutambula; muntu wukukenakeŋa wukuwana; niwukudondomwena akumwenzulwila.

⁹Mwinenwinyi wukwila mwanindi weyala namulombi dinkendi, yena amwinki ilola?

¹⁰Hela namulombi inshi, amwinki kapela?

¹¹Dichi neyi enu atama mweluka kwinka anyanenu yamukunkulu yayiwahi, Tata yenu wudi mwiwulu abuli kubadika kuyinka akumulomba yuma yayiwahi?

¹²Dichi yejima yimunakeŋi antu kuyililenu, ninenu nawa yililenu mwomumu, muloŋa dimu mwaya nshimbi niatuprofwetu.

¹³Iŋililenu kuchisu chanyanya; muloŋa chisu cheneni, ninjila yabwambaŋana yaya kukujilumuka, mweŋilaŋa amavulu.

¹⁴Muloŋa chisu chanyanya, ninjila yanyanya yaya kuwumi, ayimonaŋa antesha.

¹⁵Babelenu atuprofwetu akutwamba, enzaŋa kudenu avwala yitembi yanyikoku, ilaŋa mukachi hiyatuŋiwidi atuhuka.

¹⁶Mukuyilukila kunyikabu yawu. Antu akumunaŋa nyikabu yavinyu kunyiŋa? hela yikuyu kunzonzonzu, tahindi?

¹⁷Dichi nyitondu yayiwahi yejima yasoŋaŋa nyikabu yayiwahi, ilaŋa mutondu watama wasoŋaŋa nyikabu yatama.

¹⁸Mutondu wawuwahi hiwukutwesha kusoŋa nyikabu yatamaku, nimutondu watama hiwukutwesha kusoŋa nyikabu yayiwahuku.

¹⁹Nyitondu yejima yabulaŋa kusoŋa nyikabu yayiwahi ayitemaŋa, ayinatilaŋa mukesi.

²⁰Dichi dinu mukuyilukila kunyikabu yawu.

²¹Antu ejima akuntenatena nawu, Mwanta, Mwanta; hiyakawanina kwijila muwanta wamwiwuluku, chiŋa muntu welaŋa muchima waTata yami wudi mwiwulu.

²²Amavulu amba kaŋila hefuku odu nawu, Mwanta, Mwanta, hitwaprofweteli mwijina deyuku? Hitwafumishili ademoni mwijina deyuku? Hitwakoŋeli nyidimu yaŋovu yayivulu mwijina deyuku?

²³Henohu nakayakula nami, Hinayilukili hela ifuku nidimuku; fumenu kudami enu mwakoŋaŋa yakuluwa.

²⁴Dichi antu ejima akutiya awa mazu amami hiyakuyila, akayifwikija neyi mukwamaana watuŋilili itala dindi helola.

²⁵Ninvula yachabumukili, nimabaji enjili, nimpepela jakunkili, jeteli hetalodu; hidahumukiluku, muloŋa adituŋalili helola.

²⁶Niantu ejima akutiya awa mazu amami nákubula kuyila, akayifwikija neyi muntu wabula maana, watuŋilili itala dindi hawusekulula.

²⁷Ninvula yachabumukili, nimabaji enjili, nimpepela jakunkili, jeteli hetalodu; dahumukili, nikuhumuka kwadu kwaswejeli.

²⁸Chelili Yesu nakumishi dehi mazu awa, mazaza awantu hiyakuhayama kuleja kwindi.

²⁹Muloŋa wadiŋi nakuyileja neyi wukweti wanta, bayi neyi ansonekuku.