Read MUKANDA WANZAMBI MATEU 8 Bible Online

MATEU 8 - MUKANDA WANZAMBI bible

MATEU 8

¹Chanakunkumukiyi hampidi oyu, mazaza awantu hiyakumulondela.

²Mukwambumba hakwinza nakudifukula kudi yena nindi, Mwanta, neyi wuneteji, wukutwesha kuntookesha.

³Yesu hakwolola chikasa chindi, hakumukunka nindi, Neteji, tookaku. Hohenohu musoŋu windi wambumba wutooka nikutooka.

⁴Yesu hakumwila nindi, Babalaku, bayi wulejamu muntuku; ilaŋa yaloŋa kweyi wakadimwekeshi kudi kapristu, wakahani mushiŋa wayilejeluwu kudi Mosi, kulonda chakayilili antu wunsahu.

⁵Chanepiliyi muKaperinawu, kudi yena hikukwinza senturinu,

⁶hakumulembelela nindi, Mwanta, ŋamba yami nakami kwaami, wakata musoŋu wakalepa, wudi nakukaba nankashi.

⁷Yesu hakumwila nindi, Nukwinza nakamúuki.

⁸Senturinu hakumwakula nindi, Mwanta, ami hinatela eyi kwijila mwitala damuku, kumina dakuhosha kwezu hohu, ŋamba yami wukukola.

⁹Muloŋa ninami nawa ni kweti anyanta jami, ni kweti mashidika aŋovwahilaŋa, nelaŋa iwu nami, Yaŋa, hakuya; mukwawu nami, Inzaŋa, hakwinza; nduŋu yami hinukumwila nami, Ilaku ichi, hakuchila.

¹⁰Yesu chanachitiyiyi hakuhayama, hakuyila adiŋi nakumulonda nindi, Nukuyileja chalala nami kanda nimonaŋahu dehi kukuhwelela kwatoha chochichuku, hela muIsarela mwamweni.

¹¹Nukuyileja nami amavulu amba kafuma kumusela nikumujika, akashakama naAbarahama naIsaka niYakoba muwanta wamwiwulu;

¹²hakwila anyana kawanta aweni akayumbila kumwidima wahanzi, kwakekala kutumpa nikudisumona kumaji.

¹³Yesu hakumwila owu senturinu nindi, Yaŋa kweyi; muwunakuhweleli dimu mwakukwililawu. Owu ŋamba wakoleli mpinji yoyenoyu.

¹⁴Chanepiliyi Yesu mwitala daPetulu, wamweni mawenu yaPetulu nakami, wakata mashika.

¹⁵Hakumukunka kuchikasa chindi, mashika amufuma nikumufuma, hakuhinduka nakumukalakela.

¹⁶Chikuneli melela, hiyakumuletela amavulu adiŋi nakuzakuka ademoni, hakufumisha ademoni nezu, hakuuka adiŋi akata ejima;

¹⁷kulonda mwahosheliyi kaprofwetu Isaya mwakalumbuluki, mweliliyi nindi, Yomweni watambwili kuzeyazeya kwetu, wasendeli nyisoŋu yetu.

¹⁸Nochu Yesu chanamoniyi mazaza awantu amavulu hiyakumuwuŋila, hakwila nindi, Tuyenu mwishinadi.

¹⁹Hikukwinza nsoneki wumu, hakumwila nindi, Eyi Nkuluŋaŋa, nukukulonda kwejima kuwukuya.

²⁰Yesu hakumwila nindi, Anyumbu akweti menawu, niatujila ahaluzwizu akweti yisakala yawu, hakwila Mwana kamuntu hakweti nihakusachila namutu winauku.

²¹Kambanji mukwawu hakumwila nindi, Mwanta, leki nisambili kuya nakajiiki tata yami.

²²Ilaŋa Yesu hakumwila nindi, Nlondami; yileki afu ajiiki afu jawu awenawu.

²³Chanepiliyi muwatu atumbanji twindi hiyakumulonda.

²⁴Hikukwinza mpepela yeneni nankashi hameji, yakwila watu hiwukujimina mumankanda; ilaŋa yena kwindi wadiŋi namutulu.

²⁵Wena hiyakwinza kudiyena, hiyakumuhindwisha nawu, Mwanta twamwini, tunafwi!

²⁶Yena hakuyila nindi, Enu mukweti kukuhwelela kwanti, munatiyi woma wanka? Hakuhinduka, hakuhoshola mpepela nimeji, kuwunda nizo-o nankashi.

²⁷Antu owu hiyakuhayama nawu, Yeniwu muntu wekala ŋahi, chamwovwahilaŋawu kudi mpepela nimeji?

²⁸Chanashikiyi mwishinadi mwituŋa dawaGadareni, antu ayedi hiyakumubulakana, azakukaŋa ademoni, adi nakufuma kumajamu, asweja kuzuwa nankashi, kuzuwa kwakukaŋesha antu kuhita njiloyu.

²⁹Kutiya wena hiyakubilela nawu, Tukwiladi naneyi, eyi Mwana kaNzambi? Eyi wunenzi kunu nakutukabisha hachidi mwaka kanda wushiki, tahindi?

³⁰Dichi hahalehi nawena hadiŋi izanvu dawaŋulu amavulu enda adya.

³¹Owu ademoni hiyakumulembelela nawu, Neyi wukutufumishamu, tutemeshi mwizanvu dawaŋulu.

³²Hakuyila nindi, Yenu. Hiyakufumamu, hiyakwijila mudi aŋulu; izanvu dejima danduka nikwanduka, hidikuya mwakunkumuka nankashi nimwijiya chu-u, afwa nimumeji.

³³Owu ayidiishilaŋa hiyakutemuka, hiyakuya kumukala, hiyakuleja antu yuma yejima, niyamwenuwu owu adiŋi azakuka ademoni.

³⁴Kutala antu amumukala wejima hiyakwinza nawu amubulakani Yesu; chanamuwanuwu, hiyakumulembelela nawu afumi mwituŋa dawu.