Read MUKANDA WANZAMBI MATEU 9 Bible Online

MATEU 9 - MUKANDA WANZAMBI bible

MATEU 9

¹Hakwijila cheŋi muwatu, hakuzambukila kwishinadi, hakushika mumukala windi yomweni.

²Kutala hiyakumuletela muntu wakata kalepa, nakami hakadidi. Yesu chanamoniyi kukuhwelela kwawu, hakumwila owu wakata kalepa nindi, Eyi mwanami, tiyaku kuwaha; anakwanakeni nyiloŋa yeyi.

³Ansoneki amu hiyakwila munyichima yawu nawu, Iwu muntu wudi nakutuka Nzambi.

⁴Yesu hakwiluka yitoŋojoka yawu, hakuyila nindi, Muloŋanyi mudi nakutoŋojokela yatama munyichima yenu?

⁵Chaswayi kumwila muntu nami, Anakwanakeni nyiloŋa yeyi, tahindi chaswayi kumwila nami, Hindukaku, endaku?

⁶Ilaŋa nalondi mwiluki nenu Mwana kamuntu wukweti wanta wakwanakena antu nyiloŋa hanu hamaseki. Hakumwila owu wakata kalepa nindi, Hindukaku, nonaku kadidi keyi wuyi kwitala deyi.

⁷Hakuhinduka, hakuya kwitala dindi.

⁸Mazaza awantu chanamonuwu ochu, hiyakutiya woma, hiyakumulemesha Nzambi wenkeli antu wantowu.

⁹Chadiŋi nakupandakanayi Yesu nakufuma kwenoku, hakumona muntu ijina dindi Matewu, nashakami kwakutambwila nyombu; hakumwila nindi, Nlondi. Hakunyamuka, hakumulonda.

¹⁰Chashakaminiyi mwitala nakudya, kutala ansonkeshi nawakwanshidi amavulu hiyakwinza nakushakama chimu naYesu niatumbanji twindi.

¹¹Chanachimonuwu aFwarisi, hiyakuyila atumbanji twindi nawu, Nkuluŋaŋa yenu wadiilaŋadi nawansonkeshi nawakwanshidi?

¹²Chanachitiyiyi, hakwila nindi, Akola hiyakeŋakeŋaŋa chimbukuku, chiŋa akata.

¹³Yenu mwakashinshiki mazu elawu nawu, Nakeŋi luwi, bayi chimuna chakuketulaku; muloŋa hinenzi nakutambika aloŋaku, nenzi nakutambika akwanshidi.

¹⁴Henohu atumbanji twaYowanu hiyakwinza kudi yena nawu, Etu nawatumbanji twawaFwarisi twasweja kujiŋojoka nakuleka kudya, hakwila atumbanji tweyi hiyajiŋaŋaku. Chafumaŋa hanka?

¹⁵Yesu hakuyila nindi, Adi nansumbuli akuneŋa ŋahi hachiduwu nansumbuli? Mafuku akenza akafumishawu nsumbuli kudi wena, dihu hakajiŋojokawu nakuleka kudya.

¹⁶Hikudi muntu wukusha chitabu chehina dadiha kuchikovwelu chachikuluku; mukunkulwayi ochu chadiŋi chakujikamu nachu chikutabula chi kovwelu, chiloku chikusweja kutoha.

¹⁷Hikudi muntu wukulona vinyu yayiha munjeki jayitembi yayikuluku; neyi wukwila ochu, njeki jayitembi jikubuzika, vinyu yikumwaŋala, ninjeki jayitembi jikukisika; vinyu yayiha ayiloŋaŋa munjeki jajiha, dichi yejima yikwikala yayiwenyi.

¹⁸Chahoshelaŋayi nawu yumiyi, kutala hikukwinza nyuli wumu, hakudifukula kudi yena nindi, Mwanami wamumbanda nafwi dehi katatakichi; hela chochu, inzaku wumunaŋiki chikasa cheyi, wukuhanda.

¹⁹Yesu hakunyamuka, hakumulondela niatumbanji twindi hamu.

²⁰Kutala mumbanda wapwekelaŋa mashi nyaka ikumi nayiyedi, hakwinza kunyima yindi, hakukunka kumukundulu wehina dindi;

²¹muloŋa welili mumuchima windi nindi, Hela nukukunka kwakwihina dindi hohu, nukukola.

²²Ilaŋa Yesu hakushetumuka, hakumumona; hakumwila nindi, Eyi mwanami, tiyakukuwaha; kukuhwelela kweyi kunakukoleshi dehi. Kufuma hampinji oyu owu mumbanda akola nikukola.

²³Chanenziyi Yesu mwitala danowu nyuli, hakumona akwakwimba yisanji, niizaza dawantu adi nakuleta ipumba.

²⁴Hakuyila nindi, Fumenumu; mwana hanafuku, wudi namutulu. Hiyakumuseha chakumudiwula.

²⁵Izaza chidinediki, yena hakwijila mu, hakumukwata kuchikasa, owu mwana wamumbanda hakunyamuka.

²⁶Mpuhu yachumochu yitiyakana ni mwituŋa dejima.

²⁷Chadiŋi nakuhitayi Yesu nakufuma kwenoku, amayala amputamesu ayedi hiyakumulonda nakubilela nawu, Eyi Mwana kaDavidi, tutiyili luwi.

²⁸Chanepiliyi mwitala, owu amputamesu hiyakwinza kudi yena; Yesu hakuyila nindi, Enu munetiyi nenu ami natweshi kwila chumichi, tahindi? Hiyakumwila nawu, Eŋa Mwanta.

²⁹Dichi hakuyikunka kumesu awu nindi, Mwashika kukuhwelela kwenu dimu mwakuyililawu.

³⁰Nimesu awu atona nikutona. Yesu hakuyihosha chakola nankashi nindi, Bayi achiluka kudi muntuku.

³¹Ilaŋa wena hiyakuya nakutiyakesha mpuhu yindi mwituŋa odu dejima.

³²Hayilaŋawu, kutala hiyakumuletela kamama wazakukaŋa demoni.

³³Owu demoni chanafumiyi, kamama hakuhosha; mazaza awantu hiyakuhayama nawu, muIsarela kanda amonaŋahu dehi chuma chidi neyi ichuku.

³⁴Ilaŋa Fwarisi nawu, Wudi nakufumisha ademoni naŋovu jamwanta wawademoni.

³⁵Yesu hakutambatamba munyikala yejima, niyamaneni niyanyanya, nakuyileja mumashikolawu, nakushimuna nsaŋu yawanta yayiwahi, nakuuka nyisoŋu yejima niyikatu yejima.

³⁶Ilaŋa chanamoniyi mazaza awantu, hakuyitiyila wushona, muloŋa akabakeni, apalaŋeni neyi nyikoku yakadi kabiŋa.

³⁷Henohu hakuyila atumbanji twindi nindi, Chalala mbutu jajivulu jinahi dehi, ilaŋa akwakukalakala anakehi.

³⁸Dichi lombenu kudi Mwanta wakumuna atemeshi akwakukalakala kukumuna kwindi.