Read MUKANDA WANZAMBI Mareka 1 Bible Online

Mareka 1 - MUKANDA WANZAMBI bible

Mareka 1

¹Mwatachikilili nsaŋu yaMwana kaNzambi Yesu Kristu yayiwahi.

²Mwomwasonekeluwu mukaprofwetu Isaya nawu, Tiya, hinukutemesha ntemesha yami kuwukuya, wakaloŋesha njila yeyi.

³Izu damuntu wukubidika mwisaŋa nindi, Loŋeshenu njila yaYehova, ololenu njila jindi jatulolu.

⁴Yowanu wapapatishilaŋa mwisaŋa, wenjili nakushimuna chipapatishu chakubalumuka mumuchima, kulonda kwanakena antu nyiloŋa.

⁵Antu amwituŋa daYudeya dejima, niantu akuYerusalema ejima ayili kudi yena; chanetejuwu mwavulumwinuwu, yena hakuyipapatisha mukalona Yodana.

⁶Yowanu wavwelaŋa mahina amavuji anŋameli, nimwonji wachikaba mumbunda yindi, wadiilaŋa tubola niwuchi wamwisaŋa.

⁷Hakushimuna nindi, Munyima yami mudi nakwinza wambadika Ŋovu, ami hinateli kubandama nakusubula nyonji yankwabilu jinduku.

⁸Ami nayipapatishi mumeji, ilaŋa yena wakayipapatisha mudi Spiritu Wajila.

⁹Hamafuku owu Yesu hakufuma kuNazareta wamuŊaliliya, hiyakumupapatisha kudi Yowanu muYodana.

¹⁰Henohu hadiŋi nakufumayi mumeji wamweni iwulu dinabaluki, Spiritu wudi neyi katela hakuwila hadi yena.

¹¹Mumawulu himukufuma izu nindi, Yeyi Mwanami nakeŋa, natiyaloŋa kuwaha nankashi mudeyi.

¹²Hohenohu Spiritu hakumutemwina mwisaŋa.

¹³Hakwikala mwisaŋa nakumweseka kudi Satana mafuku makumi awana; wadiŋi hamu nawanyama amwisaŋa; apelu hiyakumukalakela.

¹⁴Chanamukwatuwu Yowanu, Yesu hakuya muŊaliliya nakushimuna nsaŋu yaNzambi yayiwahi,

¹⁵nindi, Mwaka wunashiki dehi, wanta waNzambi wudi kwakwihi. Balumukenu munyichima, mwitiyi nsaŋu yayiwahi.

¹⁶Chadiŋi nakuhitayi kwijiya daŊaliliya, hakumona Shimona nimana kwindi Anderi, adi nakuumba wanda mwijiya, muloŋa adiŋi yibinda yanshi.

¹⁷Yesu hakuyila nindi, Inzenu munlondaŋa niyisukuli wubinda wawantu.

¹⁸Hohenohu ashiya nimawanda amulonda nikumulonda.

¹⁹Chanayiyi kumbidi chanti, hakumona mwana kaZebedewu Yakoba, nimana kwindi Yowanu, niwena adi muwatu nakutuŋiulula mawanda.

²⁰Hakuyitambika hohenohu. Hiyakushiya tata yawu Zebedewu muwatu, ni aŋamba jawu afumbiluwu, hiyakuya nindi.

²¹Hiyakuya kuKaperinawu; hohenohu hetaŋwa dasabata hakwijila mushikola hakuyileja.

²²Hiyakuhayama chayilejeliyi, muloŋa wayilejeli neyi wukweti wanta, bayi neyi ansonekuku.

²³Henohu mushikola yawu mwadiŋi muntu wazakukaŋa demoni wazonda;

²⁴hakubilela nindi, Aka! tukweti nsaŋwinyi naneyi Yesu wakuNazareta? Wunenzi nakutukisaŋana tahindi? Nakwiluki, yeyi Mukwakujila wambala waNzambi.

²⁵Yesu hakumuhoshola nindi, Mwenaku, fumaku mudi yena.

²⁶Demoni wazonda hakumukonyesha, hakubilela nezu daŊovu, amufuma nikumufuma.

²⁷Hiyakuhayama wejima wawu, kuhayama kwakudihula nawu, Chenichi chika? Kuleja kwakwiha tahindi? Hela ademoni azonda hakuyihosha nawanta, hiyakumwovwahila.

²⁸Hohenohu mpuhu yindi yitiyakana nikutiyakana mwejima mwahita ituŋa daŊaliliya dejima kwi-ndo.

²⁹Chedikiluwu mushikola hohenohu eŋila nimwitala daShimona niAnderi, hamu nawaYakoba naYowanu.

³⁰Mawenu yaShimona wadiŋi wakama nakukata mashika; hohenohu amulejamu niYesu.

³¹Hakwinza, hakumukwata kuchikasa, hakumuhindwisha; mashika amufuma nikumufuma, hakuyikalakela.

³²Melela hahumini itaŋwa amuleteleli akata ejima, niadiŋi nakuzakuka ademoni.

³³Mukala wejima wupompa nikuchisu vwi-i.

³⁴Hakuuka amavulu adiŋi akata nyisoŋu veŋi nayeŋi, hakufumisha ademoni amavulu; hetejeli ademoni kuhoshaku, muloŋa wena amwilukili.

³⁵Hakuhinduka hankunku yakucha, hakwidika, hakuya mwisaŋa nakulomba.

³⁶Shimona niwena adiŋiyi nawu hiyakumulonda.

³⁷Chanamuwanuwu hiyakumwila nawu, Antu ejima adi nakukukeŋakeŋa.

³⁸Hakuyila nindi, Tuyenu kunyikala yacheŋi yidi kwakwihi, nishimuni nikwenoku nawa; muloŋa dichi chinenjilili.

³⁹Hakwijila mumashikolawu mwahita Ŋaliliya yejima, nakushimuna nsaŋu nikufumisha ademoni.

⁴⁰Kudi yena kwenjili mukwambumba, hakumulembelela, hakumufukamina, hakumwila nindi, Neyi wuneteji, wunatweshi kuntookesha.

⁴¹Watiyili wushona, wolweli chikasa chindi wamukunkili; hakumwila nindi, Neteji, tookaku.

⁴²Hohenohu mbumba yimufuma nikumufuma, yotooka nikutooka.

⁴³Hakumuhosha chakola hohenohu nindi, Yaŋa kweyi.

⁴⁴Hakumwila nindi, Babalaku, bayi wulejamu muntuku; yaloŋa kweyi wakadimwekeshi kudi kapristu, wakahani mushiŋa wayilejeluwu kudi Mosi, kulonda kuyilila wunsahu.

⁴⁵Ilaŋa yena hakufumaku, hakutachika kuchishimununa nankashi, hakutiyakesha nsaŋu oyu kwejima; dichi Yesu hakwikala mwisaŋa mwamukunkulwayi, hatwesheli kwidika cheŋi hamukala hatookaku, antu hiyakufumaŋa kumbadi jejima, hiyakuyaloŋa kudi yena.